SUP

[lagmit, Mga Tangbo].

Usa sa mga lokasyon nga gihisgotan aron mahibaloan kon diin si Moises namulong ngadto sa mga Israelinhon sa ika-40 nga tuig sa ilang paglatagaw sa kamingawan. (Deu 1:​1, ftn sa Rbi8) Inay nga “Sup,” ang mabasa sa Gregong Septuagint (Bagster) ug sa Latin nga Vulgate mao ang mga pulong nga “ang Pulang Dagat,” tingali tungod kay gituohang gitangtang man ang Hebreohanong pulong nga yam (nagkahulogang “dagat”), ug Suph na lamang ang nahibilin ingong pinamubo sa yam-suphʹ (Pulang Dagat). Kon mao, ang gitumong niini mao ang bahin sa dagat nga gitawag ug Gulpo sa ʽAqaba. Apan, kon sabton sumala sa kon unsa ang kahulogan niini, ang Hebreohanon nga Masoretikong teksto nag-ingon nga si Moises namulong sa Israel “sa desyertong kapatagan atubangan sa Sup.” Ug ang bersikulo 5 nagdugang nga kini maoy “sa rehiyon sa Jordan sa yuta sa Moab.” Busa, bisan tuod ug ang eksaktong dapit niini wala mahibaloi, ang Sup lagmit maoy usa ka dapit sa S sa Jordan. Gituohang lagmit mao kini ang Khirbet Sufa, mga 6 km (3.5 mi) sa HHS sa Madaba.