Ang Relihiyon Nagatagbaw ba sa Imong mga Panginahanglan?
HANGIN, tubig, pagkaon, puy-anan—kini giila sa tibuok kalibotan ingong mga panginahanglan sa tawo. Kon wala kini sila ikaw mag-atubang ug kakulang sa mga kinahanglanon ug kamatayon. Hinuon, dugay na kanhi ang Israelinhong lider nga si Moises naghisgot sa laing panginahanglan sa tawo, usa nga labi pang hinungdanon kay sa pagkaon o tubig. Matud ni Moises: “Dili sa tinapay lamang nga ang tawo mabuhi kondili sa matag pulong sa baba ni Jehova ang tawo mabuhi.”—Deuteronomio 8:3.
Pinaagi niining tulukibong mga pulong, gipakita ni Moises ang pagkahinungdanon sa pagtagbaw sa atong relihiyoso o espirituwal nga mga panginahanglan. Gipakita niya nga ang atong mga kinabuhi mismo nagdepende sa pagtagbaw niini nila! Sulod sa ilang 40-ka-tuig nga paglakbay sa kamingawan, ang mga Israelinhon sa literal nabuhi pinaagi sa ‘mga pulong gikan sa baba ni Jehova.’ Sila nakalabang-buhi sa makamatay unta nga kasinatian. Sa sugo sa Diyos, ang pagkaon nga gitawag ug mana sa milagrosong paagi nahulog gikan sa mga langit. Ang tubig migula gikan sa mga bato aron sa pagtagbaw sa ilang kauhaw. Apan ang Diyos mihimo ug labaw pa kay sa pag-atiman sa ilang pisikal nga mga panginahanglan. Si Moises miingon: “Maingon nga ang usa ka tawo magtul-id sa iyang anak, si Jehova nga inyong Diyos nagtul-id kaninyo.”—Deuteronomio 8:4, 5; Exodo 16:31, 32; 17:5, 6.
Ang mga Israelinhon wala pasagding magbanabana kon unsay husto o sayop, sa moral o sa relihiyosong paagi. Sila nakadawat ug pagtultol gikan sa Diyos mismo. Gihatagan niya sila sa Moisesnong Kasugoan, usa ka linaing legal nga lagda nga naglaraw sa makapahimsog nga pagkaon, estriktong lagda sa panghinlo, ug maayong moral ug relihiyosong mga prinsipyo. Busa ang Diyos nagpasiugda sa kahimsog ug espirituwal nga kaayohan sa Israel. Sila nabuhi pinaagi sa ‘mga pulong gikan sa baba ni Jehova.’
Busa ang Israel bug-os nga nalahi sa ubang mga nasod. Sa adlaw ni Moises ang Ehipto nagmando ingong pangunang gahom sa kalibotan. Kadto maoy usa ka relihiyoso kaayong nasod. Matud sa World Book Encyclopedia: “Ang karaang mga Ehiptohanon nagtuo nga ang lainlaing mga diyosdiyos (mga diyos ug mga diyosa) nag-impluwensiya sa matag bahin sa kinaiyahan ug matag tawhanong kalihokan. Busa sila nagsimba sa daghang diyosdiyos. . . . Sa matag Ehiptohanong siyudad ug lungsod, ang katawhan nagsimba sa ilang kaugalingong linaing diyos dugang pa sa dagkong mga diyosdiyos.”
Kini bang pagsimba sa daghang diyos nagtagbaw sa espirituwal nga mga panginahanglan sa mga Ehiptohanon? Wala. Ang Ehipto nahimong nasod nga nahupong sa patuotuo ug makauulawng mga buhat sa sekso. Halayo sa pagpasiugda sa kinabuhi ug kahimsog, ang Ehiptohanong paagi sa pagkinabuhi mitultol sa “daotang mga sakit.” (Deuteronomio 7:15) Nan, dili ikahibulong nga ang Bibliya naghisgot bahin sa mga diyos sa Ehipto nga may pagbiaybiay, nga nagtawag kanilang “walay-pulos nga mga diyosdiyos.”—Ezekiel 20:7, 8.
Ang samang kahimtang naglungtad karon. Kadaghanang tawo nagbaton ug labing menos usa ka matang sa relihiyosong pagtuo; ang pipila magtawag sa ilang kaugalingon nga walay diyos. Nan, tin-aw nga ang relihiyon sa kadaghanan napakyas sa pagtagbaw sa espirituwal nga mga panginahanglan sa katawhan. Ang mga suliran sa gubat, rasismo, kakulang sa pagkaon, ug tumang kakabos maglungtad ba karon kon ang mga tawo tinuod nga nabuhi “pinaagi sa matag pulong sa baba ni Jehova”? Siyempre dili! Bisan pa niana, pipila lang ka tawo ang maghunahunang bag-ohon ang ilang relihiyon. Aw, ang pipila dili gani buot nga maghisgot ug relihiyon o maghatag ug pagtagad sa bag-ong relihiyosong mga ideya!
Pananglitan, gisultihan sa usa ka tawo sa Ghana, Kasadpang Aprika, ang usa ka Kristohanong ministro: “Ako nagtuo nga ang Diyos nagpadayag sa iyang kaugalingon kanatong mga Aprikano pinaagi sa atong gamhanang mga paring lalaki ug babaye, maingon nga iyang gipadayag ang iyang kaugalingon ngadto sa mga Hudiyo pinaagi sa ilang mga manalagna. Makapasubo nga ang pipila kanatong mga Aprikano napakyas sa pag-ila sa atong kaugalingong mga pari apan naghisgot hinuon kang Jesus, Muhammad, ug sa uban.”
Sa daghang tradisyonal nga Aprikanhong mga katilingban, ang Kristiyanidad giisip ingong relihiyon sa mga puti—usa ka sistemang gidala sa Aprika nga nakahimog labawng kadaot kay sa kaayohan. Apan ang siradong-hunahuna nga tinamdan makatabang ba o makababag sa imong mga paningkamot sa pagtagbaw sa imong espirituwal nga mga panginahanglan? Usa ka Aprikanhong panultihon nag-ingon: “Dili nimo ituslob ang duha ka kamot ngadto sa panaksan tungod lang kay gigutom ka.” Ang maong batasan sa pagkaon dili subay sa maayong pamatasan ug peligroso—ilabina kon ikaw wala masayod kon unsay anaa sa panaksan! Bisan pa niana, daghan ang mopili sa ilang relihiyon, dili pinasikad sa mahunahunaong pagsusi, kondili pinasikad sa emosyon o tradisyon sa pamilya.
Ang pagsimba nga nagtagbaw sa imong espirituwal nga mga panginahanglan kinahanglang “usa ka balaang pag-alagad uban sa imong gahom sa pangatarongan.” (Roma 12:1) Kana kinahanglang usa ka may kahibalo, intelihenteng pagpili. Busa susihon nato ang isyu sa pagpili sa relihiyon sa usa gikan sa Aprikanhong panglantaw. Apan, ang mosunod makapainteres sa mga magbabasa sa bisan diin.
[Hulagway sa panid 3]
Si Moises nagpakita sa pagkahinungdanon sa pagtagbaw sa atong espirituwal nga panginahanglan
[Hulagway sa panid 4]
Ang kasinatian sa Aprika sa mga misyonaryo sa Kakristiyanohan nakapasira sa mga hunahuna sa pipila bahin sa Bibliya