Ang Bakak nga Relihiyon Mao ang Bigaon
1. Unsay paglantaw sa kadaghanan bahin sa pagpamampam?
GITAWAG kini sa uban nga mao ang labing karaang trabaho—kanang sa bigaon, pampam, o puta. Sama sa komung paggamit, kining mga pulonga managsamag kahulogan, nga nagpunting sa usa ka imoral nga babaye nga namaligya sa paggamit sa iyang lawas alang sa mga lalaki. Apan dihay panahon nga gilantaw kini ingong usa ka dungganong trabaho!
2, 3. Sa unsang paagi gidula sa mga babayeng pari ang ilang papel diha sa karaang Babilonya kon itandi sa kasugoan ni Jehova sa Israel bahin sa pagpamampam sa lalaki ug babaye?
2 Sa naghisgot bahin sa pagkapari sa karaang Babilonya, si Propesor S. H. Hooke, usa ka awtoridad bahin sa arkeolohiya sa Bibliya, miingon: “Ang pagkapari dili iya lamang sa mga lalaki, kondili ang mga babaye napormang bahin sa trabahante sa dagkong mga templo. Gilantaw nga usa ka dungog nga mahisakop sa orden sa mga pari nga babaye, ug nakadungog kitag daghang hari kinsa nagpahinungod sa ilang mga anak nga babaye alang sa pagkapari. . . . Ang ilang pangunang buluhaton mao ang pag-alagad ingong balaang mga pampam sa dagkong sesonal nga mga piyesta. . . . Ang templo ni Ishtar [diyosa sa pertilidad ug gubat], dayag, dunay daghan niining klaseha sa mga babaye ingong trabahante.”
3 Dako kaayo kinig kalainan sa pagsimba nga gihatag kang Jehova nga Diyos sa nasod sa Israel. Ang Kasugoan klarong nag-ingon: “Walay bisan kinsa sa mga anak nga babaye sa Israel ang mahimong pampam sa templo, ni mga anak nga lalaki sa Israel ang mahimong pampam sa templo [nagapraktis ug homoseksuwalidad]. Dili ka magdala ug suhol sa bigaon bisan suhol sa iro ngadto sa balay ni Jehova nga imong Diyos tungod sa bisan unsa nga panaad, kay kining mga butanga dulumtanan kang Jehova nga imong Diyos.” (Deuteronomio 23:17, 18) Busa, ang suhol sa bigaon dili-madawat ingong amot sa sangtuwaryo sa Diyos. Bisan ang pagpamampam nga walay kalangkitan sa relihiyon makauulaw gayod. Ang mga Israelinhon gisugo: “Dili mo pagbulingan ang imong anak nga babaye pinaagi sa paghimo kaniya nga pampam, aron dili mapuno ang yuta sa iyang pagkamapatuyangon sa moral.” Ang balaod batok sa pagpamampam ug homoseksuwalidad, nga gibatbat nga “dulumtanan,” maoy panalipod sa nasod, sa espirituwal ug sa pisikal nga paagi.—Levitico 19:29; 20:13.
Mas Daotan pa ang Espirituwal nga Pagpamampam
4. Unsa ang labing ngil-ad nga porma sa pagpamampam?
4 Apan, sa tinamdan sa Diyos, dunay laing mas ngil-ad pa nga porma sa pagpamampam—ang espirituwal nga pagpamampam, o nagaangkong nagsimba sa matuod nga Diyos apan sa aktuwal nagsimba ug nagmahal sa ubang mga diyos. Ang karaang Jerusalem mihimo pag dugang pagpamampam. Siya nanghatag ug mga gasa sa mga nasod nga nakighilawas kaniya sa espirituwal nga paagi, nagahugaw sa iyang matuod nga pagsimba.—Ezekiel 16:34.
5, 6. Kinsa ang nagahimog espirituwal nga pagpamampam niining ika-20ng siglo, nga motultol ug unsang mga pangutana?
5 Bisan niining ika-20ng siglo, ang espirituwal nga pagpamampam komun sa relihiyosong sistema sa kalibotan. Ang Kakristiyanohan mao ang labing prominenteng bahin niana nga sistema—usa ka sistema nga gitawag sa Bibliya nga “Dakong Babilonya, ang inahan sa mga bigaon ug sa dulumtanang mga butang sa yuta.”—Pinadayag 17:5.
6 Apan unsa ang kataposang dangatan sa Dakong Babilonya? Ug sa unsang paagi kanang kataposang sangpotanan nagaapektar kanimo ug sa imong mga minahal? Kon gisilotan sa Diyos ang mga bigaon sa karaang Israel, unsay iyang himoon bahin sa modernong espirituwal nga pagpamampam? Ang mosunod nga mga artikulo motuki niadtong mga pangutanaha ug sa ubang nalangkit.