MASAHAN NGA PASONG

Usa ka mabaw ug sagad madaladala nga pormag-panaksan nga kagamitan. Sagad nga kini gama sa kahoy apan usahay gama sa yutang-kulonon o gama sa bronse. Diha niini sagolon ang harina ug tubig ug himoong minasa. Sa pag-andam ug tinapay nga may lebadura, ang minasa sagad patuboon pinaagig pagsagol niinig minasang igpapatubo nga gisalin sa naunang pagluto. Ang minasa pasagdan nga motubo diha sa masahan nga pasong una pa lutoon. (Gen 18:6; 1Sa 28:24) Ang kasagarang paagi mao ang pagmasa niini pinaagi sa kamot, bisan tuod ang mga Ehiptohanon usahay migamit usab sa ilang mga tiil kon magmasa diha sa dakong pasong.​—Os 7:4.

Ang gidak-on sa masahan nga pasong nagkalainlain. Apan, ang usa ka matang sa yutang-kulonon nga pasong nga sagad gigamit maoy mga 25 sm (10 pul.) ang diyametro ug mga 8 sm (3 pul.) ang giladmon.

Ang tinapay maoy usa ka mahinungdanong bahin sa pagkaon sa mga Hebreohanon ug giluto kanunay. Tungod niana, ang masahan nga pasong maoy usa ka mahinungdanong kagamitan taliwala sa mga Israelinhon ug sa ubang mga katawhan sa kakaraanan. Ang mga baki nga milukop sa Ehipto sa panahon sa ikaduhang hampak nga gipadangat ni Jehova sa adlaw ni Moises misulod sa mga balay ug gani nakasulod pa sa mga masahan nga pasong. (Ex 8:3) Ang mga Israelinhon, nga sa ulahi nagdali nga mibiya sa Ehipto, ‘nagdala sa ilang minasa nga harina sa wala pa kini mabutangi ug lebadura, uban sa ilang masahan nga mga pasong nga pinutos sa ilang mga kupo ibabaw sa ilang abaga.’ (Ex 12:​33, 34) Sanglit ang masahan nga pasong maoy usa ka mahinungdanong kagamitan sa balay, nga gigamit sa pag-andam sa ‘adlaw-adlaw nga tinapay,’ ang pagpanalangin ni Jehova niini dayag nga nagkahulogan ug pasalig sa igo nga pagkaon sa balay, samtang ang iyang pagtunglo niini naglarawan sa gutom.​—Deu 28:​1, 2, 5, 15, 17.