BALAS

Ang buhaghag nga mga lugas nga mas gagmay kay sa graba apan mas dagko kay sa yutang binanlas. Si Jehova nga Diyos, pinaagi sa iyang dakong kaalam, “nagpahimutang sa balas ingong utlanan sa dagat, usa ka regulasyon nga mohangtod sa panahong walay tino aron kini dili makalabang.” (Jer 5:22) Dili sama sa solidong bato, ang balas mopahiuyon ug busa makasustiner sa paghapak sa mga balod nga modabodabo niini. Ang puwersa sa nagpungasi nga mga balod mabungkag ug mapusgay, mao nga ang dagat mapugngan.

Sa pagpanalangin sa mga tribo ni Zabulon ug Isacar, si Moises miingon nga “suyopon nila ang dagayang bahandi sa kadagatan ug ang tinagong mga manggad diha sa balas.” (Deu 33:​18, 19) Lagmit nga kini nagkahulogan nga sila panalanginan ug mga bahandi sa dagat ug sa yuta.

Sa daghang higayon ang “balas sa dagat” gigamit sa Bibliya sa pagpaila sa pagkadili-maihap o sa hilabihang kadagaya. (Gen 22:17; 32:12; 41:49; Jos 11:4; Sal 78:27; 139:​17, 18; Jer 15:8; Heb 11:12) Apan ang gidaghanon nga gihisgotan diha sa matag teksto dili gayod sobra ka daghan. Hinunoa, alang sa nagtan-aw, ang gidaghanon sa mga tawo o mga butang nga nalangkit hilabihan ka daghan nga tungod niana dili na kini matino. Pananglitan, ang usa ka bahin sa Filistehanong kasundalohan nga misulong sa Israel sa mga adlaw ni Haring Saul gihubit ingong “katawhan nga sama sa balas sa baybayon ang gidaghanon.” (1Sa 13:5) Ang gidaghanon niadtong mapahisalaag ni Satanas human siya buhii gikan sa kahiladman, sumala sa nakita ni Juan diha sa panan-awon, gikaingon nga “ingon sa balas sa dagat,” sa ato pa, daghan kaayo nga tungod niana si Juan dili makatino kon unsa unya sila ka daghan.​—Pin 20:8.

Sa paghubit sa kadako sa iyang kagul-anan, ang matinumanong si Job mipahayag: “Kini bug-at pa kay sa balas sa kadagatan.” (Job 6:3) Sa aberids, ang 1 lamang ka m ku (1.3 yd ku) nga basang balas motimbang ug 1,900 kg (4,200 lb). Bisan tuod bug-at nga palas-anon ang usa ka luwan nga balas, ang kagul-anan nga ipahinabo sa usa ka buangbuang nga tawo mas bug-at pa alang niadtong mopas-an niini. Kini gihisgotan diha sa Proverbio 27:3: “Ang kabug-at sa usa ka bato ug ang usa ka luwan nga balas​—apan ang kagul-anan nga ipahinabo sa usa nga buangbuang mabug-at pa kay niining duha.”