GEDEROTAIM

Usa ka ngalan nga nagkahulogang “Duha ka Toril nga Bato.” Kini makita lakip sa mga siyudad sa Juda diha sa Sepela, apan ang nahimutangan niini wala mahibaloi karong adlawa. (Jos 15:​20, 33, 36) Inay nga Gederotaim, gihubad kini sa Gregong Septuagint nga “ug ang iyang mga toril,” buot ingnon, ‘ang mga toril’ sa nahaunang gitala nga dapit, nga mao, ang Gedera. Kini nga hubad magkunhod sa katibuk-ang gidaghanon sa mga siyudad diha sa talaan gikan sa 15 ngadto sa gihisgotan nga 14. (Jos 15:33-36) Sanglit kini nga ekspresyon dili kasagaran diha sa maong talaan, gisugyot sa pipila nga ang maong teksto mahimong hubaron nga “Gedera o Gederotaim” inay nga “Gedera ug Gederotaim.”