BET-JESIMOT

[Balay sa mga Kalaglagan].

Ang kinatumyang dapit sa habagatan nga naabot sa kampo sa mga Israelinhon sa dihang sila nagkampo sa Kapatagan sa Moab una pa motabok sa Jordan paingon sa Canaan. (Num 33:​48, 49) Ang kampo nakaabot gikan sa Bet-jesimot ngadto sa Abel-sitim, mga 8 km (5 mi) ang gilay-on sumala sa gituohang mga nahimutangan niining mga dapita. Ang Bet-jesimot gituohan karong adlawa nga mao ang Tell el-ʽAzeimeh duol sa AS nga kiliran sa Patayng Dagat ug 19 km (12 mi) sa HS sa Jerico. Duol niana mao ang Khirbet Sweimeh, nga ingong usa ka Romanhong balangay nailhan sa Gregong ngalan nga Besimot. Adunay usa usab ka kusog nga tubod haduol sa maong dapit. Ang Tell el-ʽAzeimeh nahimutang sa usa ka patag nga yuta sa ibabawng dapit nga nag-umbaw sa kapatagan sa ubos, ug gikan niini mabantayan ang mga agianan nga pagawas gikan sa usa sa mga bul-oganang walog nga padulhog gikan sa kabukiran paingon sa S.

Ang Bet-jesimot nahimong bahin sa gingharian ni Haring Sihon sa mga Amorihanon ug, human sa pagpanakop sa Israel sa maong rehiyon, kini gipahat ngadto sa tribo ni Ruben. (Jos 12:1-3; 13:15-21; itandi ang Huk 11:13-27.) Sa panahon ni manalagnang Ezequiel, gilakip kini sa pipila ka siyudad sa Moab nga nahimutang sa bakilid sa utlanan niini ug gihubit ingong “ang dayandayan sa yuta.” (Eze 25:8-10) Ang tagna nagpakita nga ipahinabo ni Jehova nga mabuksan kining utlanan nga mga siyudad, nga magladlad sa Moab sa pag-atake sa “mga taga-Sidlakan,” o “mga anak nga lalaki sa Sidlakan,” ang tigbalhinbalhin nga mga tribo nga nanimuyo sa Desyerto sa Arabia. (Itandi ang Huk 6:​3, ftn sa Rbi8; 8:10.) Lagmit nga giilog sa Moab ang Bet-jesimot ug ang ubang mga siyudad ni Ruben human madestiyero ang maong tribo ngadto sa Asirya o kaha sa mas sayo pa niana.​—1Cr 5:26.