OPRA

1. [Nati [nga Laking Osa]]. Usa ka kaliwat ni Juda pinaagi kang Meonotai.​—1Cr 4:​1, 14.

[2, 3: lagmit, Dapit sa Abog]

2. Usa ka siyudad sa Benjamin. (Jos 18:​21, 23) Ang nahimutangan niini tingali mahibaloan gikan sa asoy bahin sa mga pakiggubat sa Israel batok sa mga Filistehanon panahon sa paghari ni Saul. Gikan sa ilang kampo sa Mikmas, ang mga pundok sa Filistehanong mga manunulong miatake paingon sa tulo ka lainlaing mga direksiyon. Ang usa ka pundok misulong agi sa dalan paingon sa Opra. Ang lain mipadulong sa kasadpan sa dalan paingon sa Bet-horon, ug ang lain mipadulong sa sidlakan sa “dalan paingon sa utlanan nga nag-atubang sa walog sa Zeboim.” Sanglit diha pay nahibilin nga kasundalohan sa Israel nga nagkampo sa Geba sa H sa Mikmas, lagmit nga ang Filistehanong pundok nga misubay sa dalan padulong sa Opra mipaingon sa amihanan. Busa, lagmit ang Opra nahimutang sa A sa Mikmas.​—1Sa 13:16-18.

Sagad nga giisip sa mga eskolar nga ang Opra mao ra usab ang siyudad nga gitawag ug Epraim (2Sa 13:23; Ju 11:54) ug Eprain (2Cr 13:19), nga gituohang mao ang et-Taiyiba (mga 6 km [3.5 mi] sa SAS sa Bethel).

3. Ang pinuy-anan ni Gideon ug ang dapit diin ang manulonda ni Jehova nagsugo kaniya sa pagluwas sa Israel gikan sa kamot sa Midian. (Huk 6:11-32) Human sa iyang kadaogan batok sa mga kaaway, si Gideon naghimo ug usa ka epod gikan sa giamot nga mga inagaw ug gipasundayag kini didto sa Opra. Human niana kini nga epod gihimong idolo nga gisimba. (Huk 8:24-27) Sa ulahi, human sa kamatayon ug paglubong kang Gideon didto sa Opra, ang iyang ambisyosong anak nga lalaking si Abimelek “nagpatay sa iyang mga igsoon . . . kapitoan ka tawo, ibabaw sa usa ka bato, apan nahibilin si Jotam nga kamanghorang anak.” (Huk 8:32; 9:5) Kon dili iapil si Abimelek, si Gideon adunay 70 ka anak nga lalaki. (Huk 8:​30, 31) Busa, sanglit si Jotam nakaikyas sa pagpamatay, mopatim-aw nga 69 lamang ka anak ang napatay ni Abimelek didto sa Opra. Ang ulahing mga pulong ni Jotam bahin niini nga panghitabo nagpakita nga tuyo ni Abimelek nga patyon ang tanang 70 ka anak. (Huk 9:18) Apan, ingon sa tukmang gipahayag sa usa ka Hudiyohanong komentaryo: “Husto gihapon ang paghisgot sa katibuk-ang gidaghanon nga ‘kapitoan’ ang gipamatay.”​—Soncino Books of the Bible, giedit ni A. Cohen, London, 1950 (Joshua and Judges, p. 234).

Mopatim-awng kini nga Opra nahimutang sa K sa Jordan. Gituohang kini lagmit mao ang el-ʽAffuleh (ʽAfula), mga 45 km (28 mi) sa A sa Sekem.