BEZEK

1. Ang dapit diin gipildi sa Juda ug Simeon ang 10,000 ka kasundalohang Canaanhon ug Perizihanon ilalom ni Adoni-bezek. (Huk 1:3-7) Kini nga Bezek gituohan sa pipila nga mao ang gihisgotan sa 1 Samuel 11:8 (Num. 2), nga nahimutang sa kinatumyang bahin sa amihanan gikan sa Jerusalem ug sa teritoryo nga giokupahan sa Juda ug Simeon. Ang maong panglantaw nagpasabot nga tingali si Adoni-bezek miadto sa H aron moduyog sa ubang Canaanhong kasundalohan apan siya gisugat sa Juda ug Simeon, gigukod paingon sa A ngadto sa Bezek, ug gipildi didto. Apan, ang konteksto daw nagpaila nga kini maoy usa ka lugar diha sa dapit mismo sa Jerusalem. Tungod niini nga mga kahimtang, ang Bezek, ang siyudad ni Adoni-bezek, gibanabana nga nahimutang sa rehiyon sa Sepela sa dapit sa Khirbet Bezqa, mga 5 km (3 mi) sa AS sa Gezer.

2. Ang dapit diin si Saul nagtigom sa mga anak sa Israel ug Juda aron makig-away sa mga Ammonhanon nga nagkampo batok sa Jabes didto sa Gilead. (1Sa 11:8-11) Sanglit dili ra man moabot ug usa ka gabiing pagbaktas ang gilay-on niining dapita gikan sa Jabes, kini nagpaluyo sa panglantaw nga kini nahimutang sa modernong dapit sa Khirbet Ibziq, 21 km (13 mi) sa AS sa Sekem. Adunay usa ka bukid sa K sa Khirbet Ibziq nga may gihabogong 713 m (2,339 p) ibabaw sa lebel sa dagat ug kini lagmit nahimong usa ka maayong dapit aron matigom ni Saul ang iyang kasundalohan.