Mga Pangutana Gikan sa mga Magbabasa
Ang pagkaon ba ni David ug sa iyang mga sundalo sa pasundayag nga mga tinapay nagpaila nga dili kita makaagom ug silot sa dihang supakon nato ang balaod sa Diyos ubos sa malisod nga mga kahimtang?—1 Samuel 21:1-6.
Sumala sa Levitico 24:5-9, ang pasundayag nga mga tinapay nga pulihan matag Igpapahulay gitagana ingong pagkaon sa mga saserdote. Ang prinsipyo luyo niini mao nga ang mga tinapay balaan ug nagsilbing pagkaon sa mga tawong nag-alagad sa Diyos—ang mga saserdote. Sayop gayod ang paghatag niini ngadto sa ordinaryong obrero o pagkaon niini aron lang matilawan. Apan, ang saserdoteng si Ahimelek wala makasala sa dihang ang pasundayag nga tinapay gipakaon niya kang David ug sa iyang mga sundalo.
Mopatim-aw nga dunay linaing buluhaton nga gipahimo si Haring Saul kang David niadtong tungora. Si David ug ang iyang mga sakop gigutom. Gitino ni Ahimelek nga hinlo sila sa seremonyal nga paagi. Bisan tuod sa estriktong pagkasulti supak sa balaod ang ilang pagkaon sa pasundayag nga mga tinapay, nahiuyon kini sa pangunang katuyoan sa maong mga tinapay. Busa, base niini nga pagtimbangtimbang si Ahimelek mihimog eksepsiyon sa maong balaod. Bisan si Jesu-Kristo naghisgot niini nga hitabo sa pag-ilustrar sa pagkasayop sa sobra ka estriktong pagpadapat sa balaod sa Igpapahulay nga maoy interpretasyon sa mga Pariseo niini.—Mateo 12:1-8.
Apan, ang gihisgotang hitabo wala magpasabot nga mahimong lapason ang balaod sa Diyos kon malisod na ang kahimtang. Pananglitan, morag nahimong apeke ang kahimtang sa Israelinhon nga mga manggugubat sa dihang nakig-away sila sa mga Filistehanon. Si Haring Saul nag-ingon: “Tinunglo ang tawo nga mokaon ug tinapay sa dili pa ang kagabhion ug hangtod kapanimaslan ko ang akong mga kaaway!” Ang Bibliya miingon: “Niadtong adlawa ilang gipamatay ang mga Filistehanon.” Ang mga sundalo nangaluya tungod sa gubat ug gipanggutom, ‘ug giihaw sa katawhan ang mga hayop sa yuta ug gikaon kini apil ang dugo.’ (1 Samuel 14:24, 31-33) Sila nakasala kang Jehova tungod sa ilang paglapas sa iyang balaod labot sa dugo. Ang ilang gihimo supak sa bugtong gitugot-sa-Diyos nga paagi sa paggamit sa dugo, nga mao ang “pagtabon” sa mga sala. (Levitico 17:10-12; Genesis 9:3, 4) Tungod sa kaluoy, gidawat ni Jehova ang linaing mga halad alang sa mga nakasala.—1 Samuel 14:34, 35.
Oo, si Jehova nagdahom nga kita mosunod sa iyang mga balaod bisag unsa pa ang kahimtang. “Kini ang kahulogan sa paghigugma sa Diyos,” matod ni apostol Juan, “nga atong bantayan ang iyang mga sugo.”—1 Juan 5:3.
[Hulagway sa panid 30]
Ang bag-ong pasundayag nga mga tinapay ibutang sa sulod sa tabernakulo matag Igpapahulay