Ang dapit diin bug-os nga nakadaog si Haring David batok sa nag-usa nga kasundalohan sa mga Filistehanon, human sakopa ni David ang salipdanan sa Zion. (2Sa 5:​9, 17-21) Ang rekord nag-ingon nga, sa pagkadungog ni David nga gipangita siya sa mga Filistehanon, siya ug ang iyang mga tawo “miadto sa dapit nga lisod adtoon,” samtang ang mga Filistehanon “milibot didto sa ubos nga patag sa Repaim.” Kay gipasaligan nga paluyohan ni Jehova, si David miatake, ug nangalagiw ang mga Filistehanon ug nagbiya sa ilang mga idolo. Sa pagpasidungog sa kadaogan ngadto kang Jehova, si David miingon: “Si Jehova nagbungkag sa akong mga kaaway una kanako, sama sa usa ka giwang nga nahimo pinaagi sa mga tubig”; ug tungod niini iyang “gitawag ang ngalan niadtong dapita nga Baal-perazim.” Ang asoy sa 2 Samuel 5:21 nag-ingon nga si David ug ang iyang mga tawo ‘nagdala sa gibiyaan nga mga idolo sa mga Filistehanon.’ Ang samang asoy sa 1 Cronicas 14:12 nagpakita sa kataposang lakang nga iyang gihimo, nga nag-ingon: “Unya si David nagsugo, mao nga kini [ang mga idolo] gisunog sa kalayo.”

Ang Ubos nga Patag sa Repaim giisip nga mao ang Patag sa Baqaʽ sa HK sa Patukoranan sa Templo, nga human modulhog ug mga 1.5 km (1 mi), nahimong usa ka hiktin nga walog, ang Wadi el Werd (Nahal Refaʼim). Tungod niini, ang pipila ka eskolar nagtuo nga ang Baal-perazim mao ang dapit nga duol niini nga walog. Apan, tungod kay parehong gihisgotan uban sa “ubos nga patag duol sa Gabaon” sumala sa giingon ni Isaias (28:21), gituohan sa pipila ka eskolar nga kini mao ang usa ka dapit sa AK, lagmit ang Sheikh Bedr, mga 4 km (2.5 mi) sa KAK sa Patukoranan sa Templo. (Jos 15:​8, 9) Nahiuyon kini sa kamatuoran nga ang ruta nga giikyasan sa mga Filistehanon kinsa gigukod ni David maoy paingon sa Gabaon ug sa Gezer.​—2Sa 5:​22, 25; 1Cr 14:16.