UZAH

[lagmit pinamubo sa Uzzias, nga nagkahulogang “Ang Akong Kusog Mao si Jehova”].

1. Usa ka Merarihanong Levihanon.​—1Cr 6:29.

2. Usa ka anak nga lalaki ni Abinadab nga sa walay duhaduha usa ka Levihanon. Si Uzah ug ang iyang igsoong lalaki nga si Ahio maoy nag-agak sa karomata nga nagdala sa arka sa pakigsaad gikan sa ilang balay sa dihang buot ni David nga dad-on kini sa Jerusalem. Sa dihang ang mga baka nga nagguyod sa karomata hapit magpalintuwad niini, si Uzah mikab-ot ug mikupot niini aron dili mahulog ang Arka, ug tungod niana gipatay siya ni Jehova dihadiha. Ang maong dapit ginganlan ni David ug Perez-uzah tungod kay didto miulbo ‘ang kasuko ni Jehova batok kang Uzah.’​—2Sa 6:3-8; 1Cr 13:7-11.

Bisan pag maayo tingali ang intensiyon ni Uzah nga pugngan ang Arka aron dili mahulog, kadto gihukman ingong usa ka “dili-matinahorong buhat.” (2Sa 6:7) Kini tungod kay nalangkit niini ang tinuyong pagkadili-masinugtanon. Gibaod ni Jehova nga sa bisan unsang kahimtang ang Arka dili hikapon sa mga tawo nga dili awtorisado, usa ka pasidaan nga nahibaloan sa tanan nga ang molapas niini pagasilotan ug kamatayon. (Num 4:​15, 19, 20) Kon ang mga awtorisado, ang Kohatnon nga mga Levihanon nagpas-an pa unta niini pinaagig mga yayongan sumala sa gisugo sa Diyos, ang kasuko sa Diyos wala unta maagomi.​—Ex 25:​13, 14; Num 7:9.