Ikaw ba May Pagtuo Sama sa Kang Elias?

ANG tawhanong katilingban karong adlawa nagpahuyang sa pagtuo. Ang mga manggialamon nangyam-id sa paglungtad sa Diyos. Ang relihiyosong mga salingkapaw nagbiaybiay sa Diyos. Ug ang sekular nga kalibotan sa dugang naglihok nga walay pagsapayan sa Diyos. Kon kaha kining mga tinamdan naghulga sa usa ka tawo, o nagpaluya kaniya, o nagtakod kaniya ug kawalay pagtagad, sa bisan haing kaso ang sangpotan mao ra: Ang iyang pagtuo nakibhangan. Dili ikatingala nga si apostol Pablo nagtawag sa kakulang sa pagtuo “ang sala nga daling molikos kanato”!​—Hebreohanon 12:1.

Tingali kana maoy rason nganong si Pablo nanlimbasog gayod sa pagdala sa atong pagtagad sa kinabuhi sa mga lalaki ug babaye nga may lig-ong pagtuo. (Hebreohanon, kapitulo 11) Ang maong mga pananglitan makapadasig kanato ug makadugang sa atong pagtuo. Pananglitan, atong tagdon ang propetang si Elias, nga mohisgot lamang sa sayong bahin sa iyang hataas ug bug-os matagnaong karera. Siya nagkinabuhi sa yugto sa pagmando ni Haring Ahab ug sa iyang paganong asawa, si Rayna Jezabel, sa panahong, sama karon, ang pagtuo sa matuod nga Diyos nagkaus-os.

Ang Dunot Napulo-ka-Tribu nga Gingharian

Angayan gayod silang pares! Si Ahab ang ikapitong hari sa napulo-ka-tribu nga Gingharian sa Israel. Bisan daotan ang unang unom nga iyang gisundan, samot na si Ahab. Wala lang niya ipadayon ang dunot nga pagsimba sa baka sa yuta apan iyang giminyoan ang langyaw nga prinsesang si Jezabel, sa ingon nagpaila sa lig-ong porma sa pagsimba sa bakak nga diyos nga si Baal kaysa nailhan sa yuta masukad.​—1 Hari 16:30-33.

Si Jezabel natuhop sa Baalismo gikan sa pagkamasuso. Ang iyang amahan, si Ethbaal, pari ni Ashtoreth (asawa ni Baal), pinaagi sa pagbuno sa uban nahimong hari sa Sidon, ang gingharian sa amihanan lamang sa Israel. Si Jezabel nagbuyo sa iyang huyang sa moral nga bana sa pagtukod ug Baalismo sa Israel. Sa wala madugay, dihay 450 ka mga propeta nianang bakak nga diyos ug 400 ka mga propeta sa diyosang Asherah diha sa yuta, ang tanan nangaon sa harianong lamesa. Pagkadakong dulomtanan sa ilang porma sa pagsimba sa mga mata sa matuod nga Diyos, si Jehova! Mga simbolo sa kinatawo, mga seremonyas sa pagkamabungahon, mga pampam sa templo (lalaki ug babaye), ngani ang paghalad sa mga bata​—mao ang ilhanang mga kinaiya niining dulomtanan nga relihiyon. Tungod sa pag-uyon ni Ahab, kini mikuyanap nga walay pugong sa tibuok gingharian.

Ang mga Israelinhon sa minilyon nakalimot kang Jehova, ang Maglalalang sa yuta ug sa iyang siklo sa tubig. Alang kanila si Baal ang nagpanalangin sa yuta pinaagig ulan sa kataposan sa ting-init. Matag tuig sila malaomong nagtan-aw niining ‘Mananakay sa mga Panganod,’ kining gikaingon nga diyos sa pagkamabungahon ug sa ting-ulan, sa pagtapos sa ting-init. Tuig-tuig, ang ulan moabot. Tuig-tuig, si Baal ang napasidunggan.

Si Elias Nagmantala ug Hulaw

Lagmit sa kataposan sa hataas, walay ulan nga ting-init​—sa diha gayod nga ang mga tawo nagsugod pagdahom nga si Baal modala ug nagahatag-kinabuhi nga ulan​—nga si Elias nagpakita sa esena.a Sama ka kalit sa dogdog nga siya gipaila sa rekord sa Bibliya. Kita gitug-anan ug diyutay sa iyang kaagi, wala bahin sa iyang ginikanan. Apan dili sama sa dogdog, si Elias dili tilimad-on sa usa ka unos-ulan. Siya nagpahayag kang Ahab: “Ingon nga buhi si Jehova ang Diyos sa Israel kang kinsang atubangan ako nagabarog, walay tun-og bisan ulan niining mga tuiga, kondili sumala sa akong pulong!”​—1 Hari 17:1.

Handurawa kining tawhana, nasaptan sa iyang pang-uma nga sapot sa mga balhibo. Siya lumad sa lisod nga mga bungtod sa Gilead, lagmit nagdako kauban sa mapaubsanon nga mga tigbantay ug mga panon. Siya nagtindog atubangan sa dakong hari nga si Ahab, tingali didto mismo sa iyang dakong palasyo, uban sa iyang gibantog nga balay sa garing, iyang tagsaon ug nindot nga mga dayandayan ug dagkong mga diyosdiyos. Didto, sulod sa puliki naparilan nga siyudad sa Samaria, diin ang pagsimba kang Jehova halos nakalimtan na, iyang gitug-anan si Ahab nga kanang iyang diyos, kanang Baala, walay umoy, usa nga wala magalungtad. Karong tuiga ug alang sa umaabot nga mga tuig, pahayag ni Elias, walay ulan ni tun-og!

Diin siya nagkuha sa maong pagtuo? Wala ba siya mibati ug kahadlok, nga magtindog didto sa atubangan niining mapahitas-on, apostata nga hari? Tingali. Kapin sa usa ka libo ka tuig sa ulahi, si Santiago ang igsoon sa inahan ni Jesus nagpasalig kanato nga si Elias “usa ka tawo nga may mga pagbati sama sa atoa.” (Santiago 5:17) Apan matikdi ang mga pulong ni Elias: “Ingon nga buhi si Jehova ang Diyos sa Israel kang kinsang atubangan ako nagabarog.” Si Elias naghupot sa iyang hunahuna nga ingong alagad ni Jehova, siya nagbarog sa labaw ka taas nga trono kay sa kang Ahab​—ang trono sa Soberanong Ginoo sa uniberso! Siya usa ka hawas, pinadala, nianang tronoha. Tungod nianang panlantaw, unsa may angay niyang kahadlokan kang Ahab, usa ka walay umoy tawhanong hari nga nawad-an sa panalangin ni Jehova?

Dili sulagma nga si Jehova tinuod gayod alang kang Elias. Ang propeta sa walay duhaduha nagtuon sa talaan sa mga pakiglabot ni Jehova sa Iyang katawhan. Si Jehova nagpasidaan sa mga Hudiyo nga siya magasilot kanila pinaagig hulaw ug gutom kon sila moliso sa pagsimba ug mini nga mga diyos. (Deuteronomio 11:16, 17) Kay masaligon nga si Jehova kanunay nga motuman sa iyang pulong, si Elias “nag-ampo nga dili moulan.”​—Santiago 5:17.

Pagtuo nga Gipahayag Pinaagig Pagsunod sa Pagtultol

Sa kasamtangan, hinoon, ang mga pahayag ni Elias nagpameligro kaniya sa kamatayon. Kadto panahon nga gikinahanglan niya ang laing bahin sa iyang pagtuo. Aron magpabiling buhi, kinahanglang siya magmatinumanon sa pagsunod sa mga instruksiyon ni Jehova: “Pahawa ka dinhi, ug lumiso ka padulong sa sidlakan, ug motago ka sa sapa sa Cherith nga anaa sa sidlakan sa Jordan. Ug mahitabo nga ikaw magainom gikan sa sapa ug gisugo ko ang mga langgam nga uwak sa pagpakaon kanimo didto.”​—1 Hari 17:3, 4.

Si Elias nagtuman dayon. Kon buot niyang maluwas sa hulaw ug gutom nga miabot sa yuta, angay nga siya mosandig sa kon unsay itagana ni Jehova alang kaniya. Kini dili sayon. Nagkahulogan kini sa iyang pagtago, magkinabuhi nga nag-inusara ug mga bulan nga walay sal-ang. Nagkahulogan kadto sa pagkaon sa unod ug tinapay nga dalhon kaniya sa mga uwak​—mga langgam nga nagakaog-unod-sa-patayng-hayop nga giisip nga mahugaw sa Balaod Mosaiko—​ug magsalig kang Jehova nga ang maong unod dili unod-sa-patayng-hayop kondili unod nga napaagasan ug maayo sa dugo sumala sa balaod. Morag dili kaayo katuohan sa pila ka komentarista sa Bibliya kining gihatag nga milagro nga sila nagpasabot nga ang orihinal nga pulong dinhi unta nagpasabot ug “mga Arabo” ug dili “mga uwak.” Apan ang mga uwak maayong pagkapili. Walay mausa ang magsuspetsa nga kining ubos, mahugaw nga mga langgam nga naglupad sa kaawaawan dala ang ilang salin nga mga pagkaon sa tinuod nagpakaon ni Elias, kinsa gipangita ni Ahab ug Jezabel sa tibuok gingharian!​—1 Hari 18:3, 4, 10.

Samtang ang hulaw nagpadayon, si Elias lagmit nabalaka pag-ayo bahin sa iyang abiyo sa tubig sa nagailig nga walog sa Cherith. Kadaghanan sa mga nagbuhagay nga mga walog sa Israel mahubsan sa mga panahon sa hulaw, ug “sa kataposan sa pila ka mga adlaw,” kining usa nahubsan usab. Imo bang mahanduraw ang mga pagbati ni Elias samtang ang tubig sa inanay nagkahinay ug ang mga lanaw nagkamabaw matag adlaw? Sa tino siya gayod nalibog kon unsay mahitabo sa dihang ang tubig mahurot. Bisan pa niana, si Elias matinumanong wala mopahawa didto. Sa dihang nahubsan na ang sapa una pa si Jehova naghatag kaniya ug bag-ong han-ay sa mga instruksiyon. Adto sa Sarepta, ang sugo sa propeta. Didto siya makakaplag ug pagkaon sa balay sa usa ka balo.​—1 Hari 17:7-9.

Sarepta! Kanang lungsora nasakop sa siyudad sa Sidon, diin nagikan si Jezabel ug hain ang iyang kaugalingon nga amahan nagmando ingong hari! Luwas ba didto? Si Elias lagmit nalibog. Apan “siya mitindog ug miadto.”​—1 Hari 17:10.

Si Jehova Nagatagana ug Pagkaon ug Kinabuhi

Ang iyang kamasinugtanon sa ulahi gigantihan. Nahibalag niya ang balo ingon sa gitagna, ug iyang nakaplagan kaniya ang mao lamang matang sa pagtuo nga wala gayod sa iyang katawhan. Kining pobre nga balo may igoigo lang nga harina ug lana alang sa usa ka kataposang pagkaon alang niya ug sa iyang gamayng bata. Apan, bisan pa sa iyang hilabihang kawalad-on, siya andam nga mohimog tinapay alang kang Elias pag-una, nagsalig sa iyang saad nga si Jehova magaabiyo sa iyang tadyaw sa lana ug tadyaw sa harina hangtod nga may panginahanglan. Dili ikatingala nga si Jesu-Kristo naghinumdom niining panig-ingnan sa pagtuo sa balo sa dihang nagpanghimaraot sa walay pagtuong mga Israelinhon sa iyang kaugalingong adlaw!​—1 Hari 17:13-16; Lucas 4:25, 26.

Hinoon, bisan pa niining milagro, ang pagtuo sa balo ug ni Elias sa dili madugay moatubang sa grabeng pagsulay. Ang iyang anak nga lalaki sa kalit namatay. Kay nahugno, ang balo makadawat lamang nga kining makamatay nga hapak may kalabotan kang Elias, ang “tawo sa matuod nga Diyos.” Siya nalibog kon kaha siya ba gisilotan tungod sa miaging mga sala. Apan gikuha ni Elias ang walay kinabuhi nga lawas sa iyang anak gikan sa iyang mga kamot ug gidala sa lawak sa itaas. Siya nahibalo nga si Jehova makahatag ug labaw pa kay sa pagkaon. Si Jehova ang tinubdan sa kinabuhi mismo! Busa si Elias hugot nga nag-ampo ug sa makadaghan alang sa pagbalik sa kinabuhi sa bata.

Si Elias dili una sa pagbaton sa samang pagtuo sa pagkabanhaw, apan sa talaan sa Bibliya, siya ang unang gigamit sa pagbanhaw. Ang batang lalaki “nabuhi”! Ang kalipay sa iyang inahan dili gayod matago sa dihang gidala ni Elias kaniya ang iyang anak lalaki uban sa yanong mga pulong: “Tan-awa! Ang imong anak buhi.” Sa walay duhaduha samtang naghilak, siya nag-ingon: “Karon, sa pagkatinuod, ako nahibalo nga ikaw usa ka tawo sa Diyos ug ang pulong ni Jehova nga anaa sa imong baba matuod.”​—1 Hari 17:17-24.

“Si Jehova ang Akong Diyos”

Makatandog kaayo, ug pagkahaom, nga ang ngalan ni Elias nagkahulogang “Si Jehova ang Akong Diyos”! Sa panahon sa hulaw ug gutom, si Jehova naghatag kaniya ug pagkaon ug ilimnon; sa panahon sa moral nga kalibog, si Jehova naghatag kaniya ug maayong giya; sa panahon sa kamatayon, si Jehova naggamit kaniya sa pagpasig-uli ug kinabuhi. Ug morag matag higayon nga si Elias gikinahanglan nga mopakita sa iyang pagtuo sa iyang Diyos​—pinaagi sa pagsalig Kaniya sa pagtagana, pinaagi sa pagsunod sa Iyang mga pagtultol, pinaagi sa pagsandig Kaniya sa pagbalaan sa Iyang ngalan—​siya gigantihan ug dugang mga katarongan sa pagtuo kang Jehova. Kining hularan nahimong tinuod samtang siya nagpadayon sa pagdawat ug lisod ug ngani makalilisang nga mga buluhaton gikan sa iyang Diyos, nga si Jehova; sa pagkamatuod, pila sa iyang labing tagsaong mga milagro naghulat kaniya sa unahan.​—Tan-awa ang 1 Hari, kapitulo 18.

Sama ra gayod sa mga alagad ni Jehova karong adlawa. Tingali kita dili milagrosong gipakaon o gigamit sa pagpamanhaw; kini dili na kapanahonan alang sa maong mga milagro. Hinoon, si Jehova mismo wala mausab bisag gamay sukad sa adlaw ni Elias.​—1 Corinto 13:8; Santiago 1:17.

Kita usab tingali makadawat ug pila ka kuyaw nga mga asaynment, pipila lisod ug makahadlok nga mga teritoryo nga pagaaboton uban sa atong hinatag-sa-Diyos nga mensahe. Lagmit kita moatubang sa paglutos. Ngani mahimong kita magutman. Apan sa matinumanong mga indibiduwal ug sa iyang organisasyon sa katibuk-an, si Jehova sa makadaghan nagpamatuod nga sa gihapon siya nagagiya ug nagapanalipod sa iyang mga alagad. Siya nagahatag gihapon kanila sa gahom sa paghimo sa bisan unsang tahas nga iyang isugo kanila. Ug sa gihapon siya nagatabang kanila sa pagsagubang sa bisan unsang mga pagsulay nga modangat kanila dinhing nasamok nga kalibotan.​—Salmo 55:22.

[Footnote]

[Hulagway sa panid 18]

Ikaw ba, sama kang Elias, may pagtuo nga si Jehova moatiman sa mga panginahanglanon sa iyang mga alagad?