ABANA

Usa sa duha ka suba sa Damasco nga gihisgotan sa komandante sa Siryanhong kasundalohan nga si Naaman sa dihang giyubit ang instruksiyon ni Eliseo nga siya maligo sa katubigan sa Jordan aron mamaayo sa iyang sanla.​—2Ha 5:12.

Kining subaa gituohan sa kadaghanan nga mao ang Nahr Barada, nga naggikan sa kabukiran sa Anti-Lebanon paingon sa AK sa Damasco ug, human motadlas sa kabukiran, mogula gikan sa usa ka lugot nga K lamang sa Damasco. Dayon kini moagos sa amihanang bahin sa siyudad ug mokanap sa lainlaing direksiyon aron sa pagpatubig sa usa ka dakong luna sa dili pa kini moagos ngadto sa kalamakan sa S sa siyudad. Ang katubigan niini, nga gigamit sa pagpatubig sa kaumahan ug mga prutasan pinaagig mga kanal ug mga agianan sa tubig, nagpatungha ug dakong tubigan nga dapit. Ikaingon gayod nga ang Damasco naglungtad tungod sa Barada. Dugay na nga kini ang gigikanan sa tubig alang sa mga biawan, mga tangke, ug mga kaligoanan sa siyudad. Ang klasikal nga mga magsusulat nagtawag niini nga Bulawanong Suba (Chrysorrhoas). Busa, ang taas nga pagtamod ni Naaman labot niini nga suba adunay lig-ong pasukaranan.

Ang pulong nga “Amana” o “Amanah” maoy gigamit inay nga “Abana” diha sa 2 Hari 5:12 sa An American Translation, sa hubad usab nga gipatik sa The Jewish Publication Society of America, ug sa panaplin sa Masoretikong teksto maingon man sa Syriac nga Peshitta. Sa Awit ni Solomon 4:8 gihisgotan ang “Amana” diha sa daghang hubad, ug kini gisabot nga nagtumong sa kabukiran sa Anti-Lebanon diin didto naggikan ang suba nga gihisgotan dinhi. Busa, ang ngalan sa suba lagmit naggikan sa ngalan sa kabukiran nga maoy tinubdan niini.