AMMONIM

[Ang mga Katawhan].

Sa 2 Cronicas 20:1 ang Masoretikong teksto naghisgot sa pipila ka “Ammonim [Heb., ʽAm·moh·nimʹ]” ingong kauban sa mga anak sa Moab ug sa Ammon sa pagpakiggubat batok kang Jehosapat nga hari sa Juda. Ang King James Version nagsal-ot sa pulong nga “uban” aron ang teksto mabasa nga “ang mga anak sa Moab, ug ang mga anak sa Ammon, ug duyog kanila ang uban gawas pa sa mga Ammonhanon”; apan ang pipila ka hubad naghubad sa prase nga gihisgotan ingong “pipila sa mga Ammonhanon” (MR, JP, Dy), bisan tuod kini daw dili makataronganon sanglit ang mga Ammonhanon gihisgotan na niini nga bersikulo. Kining tekstoha giisip sa Biblia Hebraica Stuttgartensia (ftn) ug sa kadaghanan sa modernong mga hubad (Ro, Mo, AT, RS, JB) nga nagtumong sa mga Meunim sa 2 Cronicas 26:7. Gipangagpas niini nga panglantaw nga tungod sa sayop sa magkokopya nabaylo ang unang duha ka konsonante (מע) sa Hebreohanong Meʽu·nimʹ, sa ingon nahimong ʽAm·moh·nimʹ. Ang pagtuo nga kini sila mao ang mga Meunim lagmit gipaluyohan sa kamatuoran nga ang nahibiling bahin sa asoy sa pagpakig-away batok kang Jehosapat naghisgot sa “bukirong rehiyon sa Seir” (puli sa “Ammonim”) ingong kauban sa kasundalohang Ammonhanon-Moabihanon. (2Cr 20:​10, 22, 23) Ang mga maghuhubad sa Septuagint naggamit sa samang Gregong pulong (Mi·naiʹon) sa paghubad sa Hebreohanong termino sa 2 Cronicas 20:1 sama sa ilang gihimo sa mga teksto nga nagtumong sa mga Meunim, nga nagpakitang ilang nasabtan nga kini sila managsama ra.​—Tan-awa ang MEUNIM.

Apan sanglit dili tino kining butanga, ang pipila ka hubad, sama nianang kang Isaac Leeser ug ang Bag-ong Kalibotang Hubad, mipabor sa paggamit lamang sa katumbas nga espeling niini nga termino, sa ingon gipabilin ang mga pulong nga makaplagan sa Masoretikong teksto.