2. Ang hanas nga artesano kinsa maoy nagbuhat sa kadaghanan sa mga kasangkapan sa templo ni Solomon. Ang iyang amahan maoy taga-Tiro, apan ang iyang inahan maoy usa ka balo “gikan sa tribo ni Neptali” (1Ha 7:​13, 14) “sa mga anak ni Dan.” (2Cr 2:​13, 14) Kining daw kalainan masulbad kon atong isipon, ingon sa pag-isip sa pipila ka eskolar, nga ang iyang inahan natawo sa tribo ni Dan, nabalo sa iyang unang bana nga gikan sa tribo ni Neptali, ug unya naminyo pag-usab sa usa ka taga-Tiro.

Si Hiram, ang hari sa Tiro (Num. 1), nagpadala niini nga Hiram aron dumalahon ang linain nga pagpanukod alang kang Solomon tungod sa iyang abilidad ug kasinatian sa paggama sa mga materyales nga bulawan, plata, tumbaga, puthaw, bato, ug kahoy. Si Hiram hanas usab kaayo sa pagtina, pagkulit, ug sa pagdisenyo sa tanang matang sa mga galamiton. Walay duhaduha nga sukad pa sa pagkabata siya nakadawat na ug teknikal nga pagbansay sa kahanas sa industriya sa maong panahon gikan sa iyang amahan nga taga-Tiro, kinsa usa ka batid nga artesano sa tumbaga.​—1Ha 7:13-45; 2Cr 2:​13, 14; 4:11-16.

Ang hari sa Tiro nagtawag niining tawhana nga Hiram-abi, nga lagmit usa ka bansag nga sa literal nagkahulogang “Si Hiram Akong Amahan.” (2Cr 2:13) Labot niini wala ipasabot sa hari nga si Hiram maoy iyang literal nga amahan apan, tingali, siya mao ang “magtatambag” sa hari o ang iyang “batid nga magbubuhat.” Sa susama, ang ekspresyon nga Hiram-abiv (sa literal, “Si Hiram Iyang Amahan”) lagmit nagkahulogang ‘Si Hiram mao ang iyang (nga mao, sa hari) batid nga magbubuhat.’​—2Cr 4:16.

[Si Hiram Akong Amahan].

Usa ka ngalan nga gigamit alang sa “tawong hanas” nga gipadala sa hari sa Tiro aron mohimo sa mga kasangkapan sa templo ni Solomon. Mopatim-awng gipakita niini nga si Hiram maoy “amahan” tungod kay siya maoy usa ka batid nga magbubuhat.​—2Cr 2:13; tan-awa ang HIRAM Num. 2.