BANI

[gikan sa lintunganayng pulong nga nagkahulogang “pagtukod”].

1. Usa ka Levihanon sa linya ni Merari, ug katigulangan ni Etan nga gitudlo ni David sa pag-alagad sa templo.​—1Cr 6:​31, 44, 46.

2. Usa sa gamhanang mga tawo ni David, usa ka Gadhanon.​—2Sa 23:36.

3. Usa ka kaliwat ni Juda pinaagi kang Perez, kansang mga kaliwat nagpuyo sa Jerusalem human sa pagkadestiyero. (1Cr 9:​3, 4) Kini nga ulo sa banay lagmit mao ra usab ang Num. 4 ug 5 o ang 4 ug 6.

4. Usa ka ulo sa banay kansang mga kaliwat, nga may gidaghanong kapin sa 600, mibalik sa Jerusalem uban ni Zorobabel. (Esd 2:​1, 10) Gitawag siya ug Binui sa Nehemias 7:15.​—Tan-awa ang Num. 3.

5. Usa ka ulo sa banay, nga ang unom sa iyang mga kaliwat nagpapahawa sa ilang langyawng mga asawa ug mga anak sa panahon ni Esdras. Dili mao ang Num. 6.​—Esd 10:​29, 44; tan-awa ang Num. 3.

6. Usa ka ulo sa banay sa Israel nga mopatim-awng nakabaton ug 12 ka kaliwat nga nagpapahawa sa ilang langyawng mga asawa ug mga anak sa adlaw ni Esdras. Dili mao ang Num. 5.​—Esd 10:​34, 44; tan-awa ang Num. 3.

7. Usa ka Levihanon kansang anak nga lalaki nga si Rehum mitabang sa pag-ayo sa paril sa Jerusalem niadtong 455 W.K.P. Itandi ang Num. 8-10 ug 12.​—Neh 3:17.

8. Usa ka Levihanon nga mitabang kang Esdras sa pagbasa ug pagpatin-aw sa Balaod ngadto sa katawhan.​—Neh 8:7; 9:​4, 5; tan-awa ang Num. 7.

9. Ang ikaduhang gitala sa duha ka Levihanon nga ginganlag Bani nga didto sa plataporma sa dihang gihimo ang publikong pagsugid sa mga sala sa Israel niadtong 455 W.K.P.​—Neh 9:4.

10. Usa ka Levihanon kansang kaliwat, kon dili man siya mismo, nagpamatuod pinaagig timbre sa “kasaligang kontrata” ni Nehemias.​—Neh 9:38; 10:13.

11. Usa sa “mga pangulo sa katawhan” kansang kaliwat, kon dili man siya mismo, nagpamatuod usab sa “kasaligang kontrata.”​—Neh 9:38; 10:14.

12. Usa ka Levihanong kaliwat ni Asap kansang anak nga lalaki nga si Uzi maoy magtatan-aw sa mga Levihanon didto sa Jerusalem sa mga adlaw ni Nehemias.​—Neh 11:22; tan-awa ang Num. 7.