PUR

Usa ka dili-Hebreohanong pulong nga makaplagan sa Ester 3:7 ug 9:​24, 26; kini nagkahulogang “ripa” (Heb., goh·ralʹ; tan-awa ang RIPA). Kini mao ang singular nga porma, ang plural maoy “Purim.” (Est 9:​26, 28-32) Ang “Pur” gilangkit sa usa ka Akadianhong pulong nga puru, nga nagkahulogang “ripa.” Kini mao ang gigikanan sa ngalan sa Hudiyohanong pista sa Purim.​—Tan-awa ang PURIM.

Ang pista nga gisaulog sa ika-14 ug ika-15 sa Adar, ang kataposang bulan sa Hudiyohanong tuig, nga katumbas sa ulahing bahin sa Pebrero ug unang bahin sa Marso; gitawag usab nga Pista sa mga Ripa. (Est 9:21) Ang ngalan naggikan sa gibuhat ni Haman nga paghulog sa pur (ripa) aron sa pagtino sa labing maayong adlaw nga himoon ang laraw sa pagpuo sa mga Hudiyo. Kay usa ka Agagihanon, lagmit usa ka harianong Amalekanhon, ug usa ka magsisimba sa paganong mga bathala, siya mihimo niini ingong “usa ka matang sa pagpanag-an.” (Est 3:​7, ftn sa Le; tan-awa ang PAGPANAG-AN; RIPA; PUR.) Sa ika-12 nga tuig ni Haring Ahasuero (Jerjes I), sa Nisan 13, lagmit sa tingpamulak sa 484 W.K.P., ang opisyal nga mando sa pagpuo nga gipahinabo ni Haman nga mauyonan sa hari giandam alang sa tanang Persianhong mga lalawigan, nga nagsugo sa paglaglag sa mga Hudiyo.