Ang Gahom sa Usa ka Malulutong Pulong
“Usa ka kasingkasing nga nagmagul-anon, pagkamakapalagsik alang niini ang usa ka malulutong pulong!”—Proverbio 12:25, Knox.
ANG mga Kristohanon dili bug-os nga luwas gikan sa kalisdanan. Usahay makasinati silag kaguol tungod sa pagkinabuhi niining “makuyaw nga mga panahong lisod sagubangon.”—2 Timoteo 3:1.
Sa dihang nagaantos sa maong kalisdanan, pagkadakong panalangin ang pagkadungog ug malulutong mga pulong gikan sa usa ka maunongong higala! “Ang tinuod nga kauban maoy mahigugmaon sa tanang panahon, ug usa ka igsoon nga natawo alang sa panahon sa kalisdanan,” nagaingon ang Bibliya. (Proverbio 17:17) Ang matinumanong tawo nga si Job nailhan tungod kay siya ingon niining matanga sa higala. Bisan si Elipas miingon bahin kaniya: “Kon may napandol, gikapoy ug naluya, ang imong mga pulong nagdasig kaniya sa pagtindog.”—Job 4:4, Today’s English Version.
Ugaling, sa dihang si Job mismo ang nanginahanglan ug pagdasig, si Elipas ug ang iyang mga kauban wala molitok ug malulutong mga pulong. Ilang gibasol si Job sa iyang kalisdanan, nga nagpasabot nga hayan may tinagoan siyang kasal-anan. (Job 4:8) Ang The Interpreter’s Bible nagkomento: “Ang gikinahanglan ni Job mao ang kaluoy sa tawhanong kasingkasing. Ang iyang nabatonan mao ang sunodsunod bug-os ‘matuod’ ug bug-os matahom relihiyosong mga panultihon ug karaang mga pamulong bahin sa moral.” Napikal kaayo si Job sa pagpaminaw sa pakigpulong ni Elipas ug sa iyang mga kauban nga siya napugos sa pagtuaw: “Hangtod kanus-a kamong tawhana magsamok sa akong kalag ug magdugmok kanako pinaagi sa mga pulong?”—Job 19:2.
Dili gayod nato patuawon ang isigka-alagad sa Diyos nga anaa sa kalisdanan tungod sa atong dili-mahunahunaon, dili-malulutong mga pulong. (Itandi ang Deuteronomio 24:15.) Nagpasidaan ang usa ka panultihon sa Bibliya: “Ang imong isulti makaluwas sa kinabuhi o makalaglag niana; busa kinahanglan nga dawaton mo ang sangpotanan sa imong gipanulti.”—Proverbio 18:21, TEV.
Kay nagaila sa gahom sa pagsulti, atong sundon ang panig-ingnan ni apostol Pablo. Samtang didto sa Macedonia, siya ‘nagdasig sa mga atua didto uban ang daghang pulong.’—Buhat 20:2.