Ang Integridad ni Job—Nganong Talagsaon Kaayo?

“Hangtod ako mamatay dili ko wagtangon ang akong integridad gikan sa akong kaugalingon!”—JOB 27:5.

1. Kinsa si Job, ug sa unsang paagi kita nahibalo nga siya usa ka tinuod nga tawo?

SI Job usa ka inilang tawo sa kasaysayan. Dili lamang nga siya nakabatog daghan kaayong materyal nga bahandi kondili siya gitahod ingong maluluy-ong maghuhukom ug pangulo. Ang Bibliya nagaingong siya “maoy labing bantogan sa tanang taga-Sidlakan.” (Job 1:3; 29:12-25) Siya ilado, duyog kang Noe ug Daniel, ingong tawo nga matarong kaayo. (Ezekiel 14:14, 20) Ang Bibliya nagapasundayag usab kang Job ingong usa ka panig-ingnang pagasundon sa mga Kristohanon, sa ingon nagapadayag nga siya tinuod nga usa ka tawo sa kasaysayan.​—Santiago 5:11.

2. Sa unsang paagi atong matino kon kanus-a naagoman ni Job ang pagsulay pinaagi ni Satanas?

² Si Job nagpuyo sa yuta sa Uz, nga karon mao ang Arabia. Bisan tuod dili Israelinhon, si Job maoy magsisimba ni Jehova, usa ka butang nga giawhag ni Jehova sa pagtagad ni Satanas. Ang mga pulong sa Diyos nga “walay sama kaniya sa yuta, usa ka tawong walay ikasaway ug matul-id” nagapadayag nga walay laing iladong alagad sa Diyos nga nagkinabuhi niadtong panahona. (Job 1:8) Busa, ang pagsulay ni Satanas kang Job nahitabo gayod samtang ang iyang halayong mga ig-agaw, ang mga Israelinhon, naulipon sa Ehipto​—sa usa ka panahon sulod sa katuigan tapos sa pagkamatay sa iladong maghuhupot sa integridad nga si Jose sa 1657 W.K.P. ug sa wala pa si Moises mosugod sa iyang pagkinabuhing may integridad.

3. Kinsa ang misulat sa basahong Job, ug nganong siya nakakuha man sa impormasyon?

³ Si Moises dayag maoy misulat sa basahong Job. Apan giunsa niya pagkahibalo bahin sa pagsulay kang Job? Aw, tapos mapugos si Moises sa pagbiya sa Ehipto sa 1553 W.K.P. siya mipuyo sa Midian, nga dili layo sa yuta sa Uz. (Exodo 2:15-25; Buhat 7:23-30) Niadtong panahona, si Job nagkinabuhi sa kataposang 140 ka tuig sa kinabuhi nga gipanalangin kaniya ni Jehova. (Job 42:16) Sa ulahi, dihang ang mga Israelinhon didto sa duol sa Uz sa hinapos sa ilang panaw sa kamingawan, si Moises nakadungog bahin sa kataposang katuigan sa kinabuhi ni Job ug sa iyang pagkamatay.

Limitadong Kahibalo ni Job

4. (a) Lagmit unsa ang tinubdan sa kahibalo ni Job bahin kang Jehova, ug nganong pihong siya may komunikasyon kang Abraham ug sa mga kaliwat ni Isaac? (b) Sa unsang paagi si Job nahimong usa ka tawo nga may talagsaong integridad?

⁴ Sa gisulayan si Job, limitado ang iyang kahibalo mahitungod sa Diyos ug sa iyang mga katuyoan, sanglit wala pa masulat ang bisan usa ka bahin sa Bibliya. Hinuon, si Job mahimong may nahibaloan mahitungod sa mga pakiglabot ni Jehova kang Abraham, Isaac, Jacob, ug Jose. Kini tungod kay si Job lagmit usa ka kaliwat sa igsoon ni Abraham nga si Nahor, pinaagi sa panganay nga anak lalaki ni Nahor nga si Uz. Dugang pa, ang igsoon ni Uz mao si Bethuel, ang amahan sa asawa ni Isaac si Rebeka ug ang apohan-sa-tuhod ni Jose. (Genesis 22:20-23) Pihong si Job nagmahal sa kahibalo nga iyang nabatonan mahitungod sa pagpakigkomunikar ni Jehova kang Abraham ug sa iyang mga kaliwat, ug siya maikagon sa pagpahimuot kang Jehova. Busa si Job nahimong usa ka tawong may talagsaong integridad, usa ka tawong walay ikasaway ug bug-os debotado kang Jehova.

5. Unsa, sa linain, ang nagahimo sa integridad ni Job nga talagsaon kaayo?

⁵ Wala magdugay tapos mamatay si Jose sa Ehipto, ang integridad ni Job nahimong usa ka ulohang gilantugian ni Jehova nga Diyos ug ni Satanas didto sa dili-makitang kalangitan. Apan si Job wala mahibalo sa maong panaglantugi nga nasentro sa iyang integridad. Ug ang nakapatalagsaon kaayo sa iyang dili-mabugtong integridad mao ang iyang pagkawalay-alamag kon bahin sa hinungdan nga siya nag-antos. Hinuon, alang sa kaayohan sa tanang alagad sa Diyos sa kaulahian gipasulat ni Jehova kang Moises ang mga detalye sa panaglantugi bahin sa integridad ni Job.

Ang Isyu sa Integridad ni Job

6. (a) Sa unsang paagi gipadayag sa usa ka panagkatigom sa langit ang paglungtad sa usa ka isyu tali sa Diyos ug kang Satanas? (b) Kanus-a magsugod ang maong isyu, ug unsay naapil niana?

⁶ Ang basahong Job nagaiway sa tabil sa pagkadili-makita, ug kita gihatagan sa talan-awon sa panagkatigom sa mga manulonda nga nahitabo sa atubangan ni Jehova nga Diyos sa langit. Dinha si Jehova nagapahinumdom kang Satanas, nga presente usab, nga “walay sama kang [Job] sa yuta, usa ka tawong walay ikasaway ug matul-id, nga nahadlok sa Diyos ug nagapahilayo sa daotan.” (Job 1:8) Tin-aw, nagalungtad ang usa ka isyu nga maylabot sa integridad ni Job. Apan kini dili bag-o. Ang isyu gipasabot sa gipatalikod ni Satanas si Adan ug Eva sa Diyos ug, sa pagkamatuod, miingon: ‘Hatagi akog higayon, ug si bisan kinsa akong patalikoron sa pagsimba kanimo.’​—Genesis 3:1-6.

7. Unsang mga sugyot nga napugos si Satanas sa pagtanyag ingong hinungdan sa integridad ni Job, ug giunsa sa Yawa paghagit ang Diyos?

⁷ Karon, panahon sa maong opisyal nga panagkatigom sa langit, si Satanas napugos sa pagtanyag sa iyang mga sugyot bahin sa pasikaranan sa integridad ni Job. “Sa wala ba lamay kapuslanan nga si Job nahadlok sa Diyos?” siya nangutana. “Wala ka ba mag-alad palibot kaniya ug sa iyang balay ug sa tanang butang nga anaa palibot kaniya? . . . Apan, ingong kausaban, ituy-od ang imong kamot,” mihagit si Satanas, “ug tandoga ang tanang iyang nabatonan ug tan-awag dili ka ba niya tunglohon sa imong nawong mismo.”​—Job 1:9-11.

8. (a) Unsay tubag ni Jehova sa hagit ni Satanas? (b) Unsang mangilngig nga mga hampak ang gipahamtang ni Satanas kang Job?

⁸ Gidawat ni Jehova ang hagit ni Satanas. Bug-os siyang misalig sa integridad ni Job, nga mitubag kang Satanas: “Ania karon! Ang tanang iyang nabatonan anaa sa imong kamot. Batok lamang kaniya mismo ayaw pag-ituy-od ang imong kamot!” (Job 1:12) Giatake dayon ni Satanas si Job. Ang misulong nga mga Sabeohanon mingtulis sa 1,000 ka baka ug 500 ka bayeng asno ni Job, nga nagpatay sa tanan nilang sulugoon gawas sa usa. Sunod, si Satanas nagpadalag kalayo gikan sa langit sa pag-ut-ot sa 7,000 ka karnero ni Job uban sa ilang mga sulugoon, nga nagbilin lamang ug usa sa mga lalaki. Dayon ang tulo ka pundok sa mga Kaldeahanon nagtulis sa 3,000 ka kamelyo ni Job, nga nagpatay sa tanang sulugoon gawas sa usa. Sa kataposan, gipadala ni Satanas ang kusog nga hangin nga mihapak sa balay diin nagkombira ang napulo ka anak ni Job, ug silang tanan namatay. Human niadto, nga nagsunod gayod, ang mga naluwas niadtong mga katalagmana nagtaho kang Job sa makalilisang nga mga balita.​—Job 1:13-19.

9. Unsay nakapahimo sa mga katalagman ni Job nga lisod gayong antoson, apan unsa ang reaksiyon ni Job niana?

⁹ Pagkagrabeng mga katalagman! Bisan pag nasabtan ni Job kon kinsay nagpahinabo kanila, kadto lisod maantos. Apan siya wala makasabot! Wala siya masayod nga siya ang sentro sa panaglantugi sa langit ug nga gigamit siya ni Jehova sa pagpasundayag nga adunay mga tawong mohupot sa ilang integridad bisan pa sa tanang dili-makataronganong pag-antos nga tingali ipahamtang kanila ni Satanas. Bisan pa niana, nga naguol ug naghunahuna pang sa usa ka paagi ang Diyos maoy responsable sa iyang mga kapildihan, si Job miingon: “Si Jehova ang naghatag, ug si Jehova ang magkuha. Pagadayegon nga padayon ang ngalan ni Jehova.” Oo, “nianang tanan si Job wala makasala o magpasangil sa butang dili angay sa Diyos.”​—Job 1:20-22.

10. (a) Unsang dugang hangyo bahin kang Job ang gihimo ni Satanas, ug nganong si Jehova mitugot niadto? (b) Unsa ang sangpotanan kang Job sa gidangatan niyang makaluluoy nga kahimtang?

¹⁰ Pagkamakauulaw kadto kang Satanas, panahon sa laing panagtigom sa mga manulonda, nga pahinumdoman ni Jehova mahitungod kang Job: “Bisan karon siya malig-ong nagahupot sa iyang integridad”! Apan si Satanas dili moampo. Niadto siya mihagit nga kon siya hatagag higayon sa paghampak kang Job nga lawasnon, tunglohon ni Job ang Diyos sa iyang nawong. Kay misalig sa integridad ni Job bisan sa maong kahimtang, si Jehova mihatag ug pagtugot, nga nagpasidaan lamang nga dili kuhaon ni Satanas ang kinabuhi ni Job. Busa si Satanas ‘mihampak kang Job sa mga hubag nga mahapdos gikan sa lapalapa sa iyang tiil hangtod sa alimpulo.’ (Job 2:1-8) Nahidangat si Job sa maong ngil-ad ug makaluluoyng kahimtang nga gilikayan siya sa iyang mga paryente ug mga higala, ug gibugalbugalan siya sa kanhi mga kaila niya.​—Job 12:4; 17:6; 19:13-19; 30:1, 10-12.

11. Unsang dugang hampak ang giantos ni Job, ug unsay nakapatalagsaon kaayo sa iyang paghupot sa integridad atubangan sa tanan niyang suliran?

¹¹ Unya lain pang hampak! Ang pagtuo sa asawa ni Job naluya. Miingon siya kaniya: “Malig-on ka pa bang nagahupot sa imong integridad hangtod karon? Tungloha ang Diyos ug magpakamatay!” Apan siya miingon kaniya: “Sama sa usa ka babayeng buang nga nagasulti, ikaw nagasulti usab. Modawat ba lamang kita ug maayo gikan sa matuod nga Diyos ug dili modawat usab sa daotan?” Sumala sa ginaingon sa talaan, “Niining tanan si Job wala makasala pinaagi sa iyang mga ngabil.” (Job 2:9, 10) Ug kon imong hinumdomang ang hinungdan sa iyang pag-antos gililong kang Job, pagkatalagsaon gayod ang iyang integridad!

Laing Matang sa Pag-atake

12. (a) Kinsa ang mga lalaki nga miabot sa paglipay kang Job? (b) Sa unsang paagi gigamit ni Satanas ang maong mga tawo sa pagsulay sa dugang kang Job?

¹² Apan wala pa mahuman si Satanas. Iyang gipatungha ang tulo ka lalaking maalamon konohay nga mahimong nakaila kang Job o nakadungog sa iyang reputasyon ingong “ang labing bantogan sa tanang taga-Sidlakan.” Lagmit sila labi pang tigulang kay kang Job. (Job 1:3; 15:10; 32:6) Duha kanila maoy mga paryenteng layolayo na. Si Eliphaz ang Temanitanhon maoy kaliwat ni Abraham pinaagi kang Teman, usa ka apo ni Esau, ug si Bildad ang Suhitanhon maoy kaliwat sa anak ni Abraham si Sua. (Job 2:11; Genesis 36:15; 25:2) Ang kagikan ni Zophar dili tino. Kining tulo konohay miabot sa paglipay kang Job, apan sa pagkamatuod sila gigamit ni Satanas sa paningkamot sa pagdaot sa integridad ni Job. Maingong ang politikanhong mga tigsukitsukit nga magpakaaron-ingnong mga higala magdaot sa mga pag-unong sa mga binilanggo ug maghimo kanilang mga traidor sa ilang kaugalingong mga gobyerno, gilaoman ni Satanas nga ang iyang “mga maglilipay” magpatalikod kang Job sa iyang Diyos.​—Job 16:2, 3.

13. (a) Unsay gibuhat sa mga dumuduaw ni Job sa ilang pag-abot? (b) Sa misugod ang mga pakigpulong, misangpot kadto sa unsa?

¹³ Sa miabot sila, ang tulo ka dumuduaw migugol ug pito ka adlaw ug pito ka gabii nga mahilomong naniid sa hilabihang kasakitan ug dakong kaulawan ni Job. (Job 2:12, 13) Si Eliphaz, lagmit ang kinatigulangan, sa kataposan maoy nanguna sa pagpahayag, nga nagpahimutang sa pangisip ug sa malangkobong ulohan alang sa misangpot nga panaglantugi sa tulo ka rawon. Ang pakigpulong ni Eliphaz, ingon man ang mga pakigpulong sa iyang mga kauban nga misunod, sa kinadak-an maoy mga pagbutangbutang. Tapos sa pagpahayag sa matag usa sa iyang mga tigbutangbutang, si Job, sa baylo, mitubag, nga milalis sa ilang mga pangatarongan. Si Zophar wala moapil sa ikatulong rawon sa panaglantugi, kay lagmit mibating siya wala nay ikadugang. Busa si Zophar mipahayag ug duha lamang ka pakigpulong, samtang si Eliphaz ug si Bildad ang matag usa mipahayag ug tulo ka pakigpulong.

14. Unsang matang sa mga pangatarongan ang gigamit sa tulo batok kang Job, ug giunsa ni Satanas paggamit ang susamang taktika batok kang Jesus?

¹⁴ Ang mga pakigpulong ni Eliphaz mas tag-as, ug ang iyang mga pulong dili kaayo mahait. Ang mga pulong ni Bildad mas masakit, ug labi pa gayod ang kang Zophar. Ang ilang mga argumento sa malalangon gidesinyo sa pagkab-ot sa tuyo ni Satanas nga bungkagon ang integridad ni Job. Kadaghanan ilang gipahayag ang aktuwal nga mga kasayoran, apan sayop ang gipahimutangan ug ang pagpadapat. Gigamit ni Satanas ang samang taktika batok kang Jesus. Sa pagkutlo sa usa ka kasulatan nga nagaingong panalipdan sa manulonda sa Diyos ang iyang alagad gikan sa kadaotan, giawhag ni Satanas si Jesus sa pagpamatuod nga siya mao ang anak sa Diyos pinaagi sa pag-ambak gikan sa templo. (Mateo 4:5-7; Salmo 91:11, 12) Si Job miatubang sa susamang satanasnong pangatarongan sa hataas nga yugto.

15. Unsay gipangatarongan ni Eliphaz nga mao ang tinubdan sa mga kasakitan ni Job?

¹⁵ Sa iyang pangbukas nga pakigpulong, nangatarongan si Eliphaz nga ang mga kasakitan ni Job maoy silot sa Diyos sa iyang mga sala. “Kinsa ba ang walay sala nga sukad nawagtang?” siya nangutana. “Sumala sa akong nakita, kadtong nagamugna sa kadaot ug kadtong nagapugas ug kasamok magaani niana.” (Job 4:7, 8) Sa pagpadayon, si Eliphaz miangkong ang Diyos dili mosalig sa iyang mga alagad. “Sa iyang mga alagad siya walay pagtuo,” si Eliphaz miingon, “ug ang iyang [mga manulonda] iyang gisumbong sa pagkamasalaypon. Labi na gayod kadtong nagapuyo sa mga balay nga lapok.”​—Job 4:18, 19.

16. Giunsa pagpadayon ni Bildad ang pag-atake ni Eliphaz, ug unsang dili makataronganong ilustrasyon ang iyang gigamit?

¹⁶ Gipadayon ni Bildad ang binabang pag-atake. “Kon ikaw maputli ug matul-id,” siya miingon, “sa pagkakaron [ang Diyos] mahigmata alang kanimo ug siya magpasig-uli sa imong matarong nga puluy-anang dapit.” Si Bildad mipahayag nga ang papiro ug tangbo mangalaya ug mamatay kon walay tubig ug matinud-anong mihinapos nga “ang tanang mahikalimot sa Diyos” mao man usab. Apan pagkasayop nga iyang gipadapat ang maong ilustrasyon kang Job ug midugang, “Ang paglaom mismo sa usa ka walay pagtuo mahanaw”!​—Job 8:6, 11-13.

17. Unsang lalom ug dulot nga mga komento ang gihimo ni Zophar?

¹⁷ Ang mga komento ni Zophar labi pang lalom ug dulot. ‘O nga mosulti unta ang Diyos ug mosulti kanimo kon unsay iyang hunahuna!’ siya, sa pagkamatuod, nagaingon: ‘Nahibalo ang Diyos kon unsay imong nabuhat. Siya nagasilot kanimo sa labi pang diyutay sa angay kanimo. Ipahilayo ang imong mga kasal-anan ug biyai ang tanan nimong pagkadaotan, ug unya imong mabatonan ang kasegurohan ug ang daghang kahigalaan.’​—Job 11:4-6, 14-20.

18. Sa ikaduhang rawon sa panaglantugi, giunsa pagpadayon sa tulo ang ilang pag-atake kang Job?

¹⁸ Sa ikaduhang rawon sa panaglantugi, gipadayon ni Eliphaz ang pag-atake sa integridad ni Job. ‘Aw, ang Diyos dili gani mosalig sa mga manulonda, labi pang dili sa usa nga sama kanimo! Ang tawong daotan kanunay nga may kasamok.’ (Job 15:14-16, 20) Si Bildad, kay nasuko nga si Job wala matarog sa ilang mga pangatarongan, sa pagkamatuod nagaingon: ‘Ang imong kahayag mapalong. Ang tanang handumanan sa imong kinabuhi mahanaw. Kana mao ang mahitabo niadtong mahikalimot sa Diyos.’ (Job 18:5, 12, 13, 17-21) Si Zophar, nga nagpasabot sa nangaging pagkabahandianon ni Job, nangutana: ‘Wala ba ikaw mahibalo nga ang pagkalipay sa daotan hamubo ra, ug ang pagmaya sa usang walay pagtuo maoy sa usa ka gutling? Ang langit nagapadayag sa mga kasal-anan sa daotan.’​—Job 20:4, 5, 26-29.

19. (a) Sumala kang Eliphaz, gipabilhan ba sa Diyos ang integridad sa tawo? (b) Giunsa pagtapos ni Bildad ang binaba nga pag-atake kang Job?

¹⁹ Sa pagbukas sa ikatulong rawon sa panaglantugi, si Eliphaz nangutana: ‘May usa ba ka tawo nga bililhon sa Diyos? Bisan pag ikaw walay ikasaway, makapulos ba ang Diyos niana? Balik sa Diyos,’ siya nagaingon, ‘ug tul-iron niya ang imong mga kahikayan. Unya ikaw igapasig-uli.’ (Job 22:2, 3, 21-23) Gitapos ni Bildad ang binaba nga pag-atake. ‘Kinsa ba sa yuta ang makapasigarbo nga siya mahinlo?’ siya nangutana. ‘Ang Diyos mahimayaon kaayo nga bisan ang bulan ug ang mga bituon labaw pa sa wala alang kaniya. Labi pang wala ang tawo, nga usa lamang ka wati sa iyang panan-aw!’​—Job 25:2-6.

Ang Depensa ug Pagtul-id ni Job

20. (a) Giunsa pagtubag ni Job ang pangatarongang ang pag-antos maoy silot gikan sa Diyos tungod sa mga sala? (b) Unsa ang determinasyon ni Job, ug sa unsang paagi kita nahibalong ang iyang integridad may bili gayod sa Diyos?

²⁰ Bisan pa sa iyang mangilngig nga giantos, si Job bisan sa usa ka gutlo wala gayod mopadaog sa malimbongong mga argumento sa iyang mga magsasakit. Kon ang pag-antos maoy silot sa Diyos tungod sa mga sala, siya nangutana, “ngano mang ang mga daotan nagapadayong buhi, natigulang, nga nahimong labi pang bahandianon?” (Job 21:7-13) Ug katugbang sa giingon sa mga nagbutangbutang kang Job, si Jehova nagamahal sa mga naghupot sa integridad nga pinaagi niana nagahatag ug tubag sa pagbiaybiay ni Satanas nga iyang mapatalikod si bisan kinsa gikan sa pag-alagad sa Diyos. (Proverbio 27:11; Salmo 41:12) Si Job masaligon sa iyang kaugalingong integridad, nga mipatugbaw: “Hangtod ako mamatay dili ko wagtangon ang akong integridad gikan sa akong kaugalingon!” (Job 27:5) Wala, siya walay nabuhat nga bisan unsa nga takos sa nahitabo kaniya.

21. Unsay gisulti ni Eliu ngadto sa mini nga mga maglilipay ni Job, ug unsang gikinahanglang pagtul-id ang iyang gihatag kang Job?

²¹ Ang batan-ong lalaki si Eliu namatig maayo sa matag pulong sa maong dugay nga panaglantugi. Siya karon misulti, nga misulti sa bakak nga mga maglilipay ni Job nga ang ilang gipamulong wala magpamatuod nga si Job usa ka makasasala. (Job 32:11, 12) Unya, sa pagliso kang Job, si Eliu miingon: “Ang imong mga pulong akong padayong nadungog, ‘Ako maputli nga walay kalapasan; ako mahinlo, ug ako walay kasal-anan. Ania karon! ang mga higayon sa pagsupak kanako iyang nakaplagan, siya nagaisip kanako nga iyang kaaway.’ . . . Niini ikaw dili matarong.” (Job 33:8-13; 6:29; 13:24, 27; 19:6-8) Oo, gipadayag ni Job ang dako kaayong kabalaka sa pagbayaw sa iyang kaugalingon. Apan, sa samang panahon, wala gayod niya panghimaraota ang Diyos o mawad-ig pagsalig nga buhaton sa Diyos ang matarong.

22. (a) Tapos sa pagpamati kang Jehova, unsa ang tubag ni Job? (b) Unsay gipangayo sa Diyos sa mini nga mga maglilipay ni Job, ug unsay gisangpotan ni Job?

²² Nagakaugmad ang usa ka bagyo samtang gitapos ni Eliu ang iyang pakigpulong, ug si Jehova mismo mipahayag gikan sa alimpulos: “Kinsa ba kini nga nagangitngit sa tambag pinaagi sa mga pulong nga walay kahibalo? Baksan mo karon ang imong hawak . . . Pasagding ako mangutana kanimo, ug hatagi ako sa kasayoran.” Tapos sa pagpamati kang Jehova, giangkon ni Job nga siya namulong nga madalidalion, nga wala ang bug-os nga kahibalo, ug naghinulsol “sa abog ug sa abo.” Unya gibadlong ni Jehova si Eliphaz ug ang duha niya ka kauban, nga gitugon si Job nga magpakiluoy alang kanila. Tapos niana si Job napasig-uli, ug siya gipanalanginan sa pito ka anak lalaki ug tulo ka maanyag nga anak babaye ug dobleng gidaghanon sa kahayopan kay sa iyang nabatonan sa nangagi. Nga nabuhig 140 ka tuig pa, si Job namatay nga “tigulang ug matagbawon sa mga adlaw.”​—Job 38:1-4; 42:1-17.

23. Sa unsang paagi angay magaapektar kanato ang integridad ni Job?

²³ Tinuod, si Job usa ka talagsaong tawo sa integridad! Siya walay paagi sa pagkahibalong siya gihimong target sa daotang hagit ni Satanas. Kini labaw pang nagapasiugda sa iyang integridad tungod kay bisan pag siya nagtuo nga ang tanan niyang pag-antos maoy gikan sa Diyos, sa gihapon wala niya isalikway ang Diyos o panghimaraota siya. Pagkatagsaong leksiyon alang kanato, sanglit kita nahibalo sa tinubdan sa mga pagsulay sa atong integridad! Segurado, kita madasig sa pagsundog sa panig-ingnan ni Job ug mopadayon sa buluhaton ni Jehova bisan unsa pa ang ipahamtang kanato sa Kaaway sa Diyos.

Ang Integridad ni Job—Kinsay Makasundog Niini?

“Ako iyang pagatimbangon sa hustong timbangan ug ang Diyos masayod sa akong integridad.”—JOB 31:6.

1. Nganong maayong palandongon ang panig-ingnan ni Job, ug unsang mga pangutana ang motungha?

SI Job masaligon sa iyang integridad, busa giabiabi niya ang pagsusi sa Diyos. Ang panig-ingnan niya usa ka dakong pagdasig kanato karong adlawa, ilabina dihang si Satanas naningkamot nga todotodo sa pagbungkag sa integridad sa tanang nagaalagad sa Diyos. (1 Pedro 5:8) Kay nasayod niini, ang tinun-ang si Santiago miingon nga “isipa nga usa ka sulundan sa pag-antos sa kadaotan ug pagpakitag pailob ang mga manalagna,” ilabina si Job. (Santiago 5:10, 11) Apan kinsay makasundog sa integridad ni Job? Makasundog ba kita? Sa unsang mga paagi si Job mihatag ug panig-ingnan sa paghupot sa integridad alang kanato?

2. (a) Unsay kahulogan sa ngalang Job? (b) Unsa ang nalampos sa paghupot ni Job sa integridad?

² Ang ngalang Job nagkahulogang “Tumong sa Pagkamabatokon,” nga tinong siya nahimong ingon. Apan sa gitugot ni Jehova ang hangyo ni Satanas ug gikuha ang panalipod gikan kang Job, walay nahimo si Satanas sa pagbungkag sa integridad ni Job ngadto sa Diyos. (Job 1:1–2:10) Sa ingon si Job mitaganag usa ka tubag sa pagtamay ni Satanas nga siya makapatalikod kang bisan kinsa gikan sa pag-alagad sa Diyos. (Proverbio 27:11) Sa pagkamatuod, pinaagi sa iyang dalan sa paghupot sa integridad si Job nagpahayag ngadto sa tibuok uniberso, ‘Satanas, ikaw dakong bakakon, tungod kay si Jehova mao ang akong Diyos, ug akong huptan ang akong integridad ngadto kaniya bisag unsay mahitabo!’​—Job 27:5.

Kadtong Nahisama Kang Job

3. Kinsa ang napanalipdan sa langit, ug unsang mga pangutana ang gipatungha mahitungod kaniya?

³ Makahuloganon, ang isyu tali kang Jehova ug kang Satanas maoy unibersohanon, nga naglangkit sa dominyo sa mga espiritu. Didto sa langit, nga gialad sa panalipod ni Jehova, mao ang sinaad nga “binhi” nga pinaagi kaniya ang Diyos may tuyo sa pagtuman sa Iyang halangdong mga katuyoan. (Genesis 3:15) Bisan pa niana, kon kuhaan sa ‘alad sa panalipod,’ kini siya mosundog ba gayod sa integridad ni Job? Iya bang ipasundayag nga ang usa ka tawong hingpit, sama ni Adan, makahupot ug hingpit nga integridad sa Diyos? (1 Corinto 15:45) Mihimo si Satanas ug pagpangandam aron ibutang kini nga “binhi” sa labing grabeng pagsulay sa dihang Siya mopakita na sa yuta.

4. (a) Kinsa ang nahimong pangunang tumong sa pagkamabatokon ni Satanas, ug giunsa nato pagkahibalong gikuha sa Diyos ang iyang panalipod gikan kaniya? (b) Unsa ang gitagana ni Jesus kang Jehova?

⁴ Si Jesu-Kristo mao ang pinadala nga “binhi” gikan sa langit. Sa ingon siya nahimong tumong sa pagtagad ni Satanas, oo, ang pangunang tumong sa pagbatok ni Satanas. Ingong ebidensiya nga gikuha ni Jehova ang iyang alad sa panalipod, si Kristo misinggit samtang nagbitay sa kahoy sa pagsakit: “Diyos ko, Diyos ko, nganong gibiyaan mo ako?” (Mateo 27:46; Salmo 22:1) Bisan tuod nakasabot sa dulot nga gikuha sa Diyos ang iyang panalipod, si Jesus, sama kang Job, “wala makasala o magpasangil sa bisan unsang butang dili angay sa Diyos.” (Job 1:22) Gisundog niya si Job, pinaagi sa paghupot ug hingpit nga integridad ngadto sa Diyos, ug sa ingon nagpamatuod nga ‘walay usa nga sama kaniya sa yuta.’ (Job 1:8) Busa, diha lamang kang Jesus si Jehova nga Diyos may kompleto ug walay-kataposang tubag sa bakak nga pagbutangbutang ni Satanas nga ang Diyos dili makabutang ug tawo sa yuta nga magpabiling matinumanon kaniya ilalom sa kinadak-ang pagsulay.

5. (a) Unsa ang ginapadayon sa pagbuhat ni Satanas? (b) Unsay gihimo ni Satanas sa gipapahawa sa langit?

⁵ Apan kay buot ug dugang tubag, si Satanas nagapadayon sa pagsumbong sa mga igsoon ni Jesus sa espiritu, si kinsa, uban kang Jesus, maoy maglangkob sa “binhi” sa samag-babayeng organisasyon sa Diyos. Sa nagbatbat sa pagkatukod sa Gingharian sa langit, ang Bibliya nagaingon mahitungod kang Satanas: “Ang magsusumbong sa atong mga igsoon gitambog, kinsa nagasumbong kanila sa adlaw ug sa gabii sa atubangan sa atong Diyos!” Apan, si Satanas dili lamang magasumbong, siya nagalansad sa mabatokong pag-atake! Ang Bibliya nagapatin-aw nga tapos sa iyang pagkapalagpot gikan sa langit, “ang dragon [Satanas] napungot sa babaye, ug nakiggubat sa mga nahibilin sa iyang binhi, kinsa nagabantay sa mga sugo sa Diyos ug nagbaton sa buluhaton sa pagpamatuod kang Jesus.”​—Pinadayag 12:7-12, 17.

6. (a) Kinsa karong adlawa ang nagapanguna sa buluhaton sa pagsangyaw, ug kinsay mikuyog kanila? (b) Unsa ang gipaningkamotan ni Satanas nga buhaton kanilang tanan?

⁶ “Ang mga nahibilin sa binhi [sa babaye]” mao ang dinihogang mga saksi ni Jehova nga nahibilin sa yuta karong adlawa. Sila nagapanguna sa “buluhaton sa pagpamatuod kang Jesus,” nga nagapahayag sa dayag sa tibuok kalibotan nga siya karon naentrono ingong Hari ug sa dili madugay maglaglag na niining dili-matarong nga sistema sa mga butang. (Mateo 24:14; Daniel 2:44) Apan sila wala gayod mag-inusara! Karon ang usa ka dako kaayong panon sa kapin ug tulo ka milyong tawo mikuyog kanila sa pagporma sa nahiusa, tibuok-kalibotan, nagahupot-sa-integridad nga organisasyon. Kining tanang maghuhupot sa integridad, usab, nahimong mga tumong sa walay-undang nga paglutos ni Satanas, ug ang ilang langitnong Amahan si Jehova nagakalipay sa ilang integridad.​—2 Timoteo 3:12; Proverbio 27:11.

7. Nganong kita mahimong masaligon atubangan sa mga pag-atake ni Satanas?

⁷ Tino, makapahinuklog ang pag-amgo nga ang pagpangdaot ni Satanas gitumong kang Job, maingon nga gitumong usab kanatong nagapaningkamot sa paghupot sa integridad ngadto sa Diyos. Hinuon, dili kinahanglang kita matugaw. Ngano? Kay “si Jehova mabination kaayo ug maluluy-on” ug “dili ka gayod pasagdan ug biyaan sa bug-os.” (Santiago 5:11; Deuteronomio 31:6) Oo, si Jehova magatuboy kanato. “Alang niadtong nagalakaw sa integridad siya usa ka kalasag,” nagaingon ang Bibliya. (Proverbio 2:7) Hinuon, kini wala magkahulogang si Jehova dili motugot nga kita masulayan. Siya motugot, sama sa iyang gihimo kang Job. “Apan ang Diyos matinumanon,” mipahayag si apostol Pablo, “ug siya dili motugot nga kamo pagasulayon nga labaw sa inyong maantos, apan duyog sa pagsulay siya mohimo usab ug lutsanan aron kamo makaantos niana.”​—1 Corinto 10:13.

Kon Ginasulayan

8. Sa unsang paagi kita makabatog kaayohan gikan sa panig-ingnan ni Job karong adlawa?

⁸ Ang panig-ingnan sa integridad ni Job makahatag kanatog kaayohan sa linain dihang atong atubangon ang grabeng mga pagsulay. Labihan ang pag-antos ni Job nga siya nanghinaot nga mamatay ug matagoan sa Sheol, ang komung lubnganan sa katawhan. (Job 14:13) Gibati usab sa pipila ang susama karong adlawa, nga nagaingong sila pareho kang Job sa dihang hilabihan ang ilang pag-antos. Tingali may panahong susama ang imong bation. Sa pagkamatuod, ang pagkabasa mahitungod sa iyang mga pag-antos mahisama sa pagdawat ug pagdasig gikan sa usa ka higala nga nakaagom sa pagsulay nga labi pang grabe kay sa atoa. Ang pagkahibalong may lain nga nag-antos, ug nakasabot, tinong motabang usab kanato sa pag-antos.

9. Sa unsang paagi kita makabatog kaayohan sa paghupot sa uban sa integridad?

⁹ Kay nahibalo sa atong mga panginahanglan, gipasulat ni Jehova ang basahon ni Job sa pagtabang kanato sa paghupot sa integridad sama kang Job. (Roma 15:4; Santiago 5:10, 11) Ang Diyos nahibalo nga maingong ang usa ka bahin sa lawas nagasaligay sa usag usa ang iyang matinumanong mga alagad usab nagakinahanglan sa usag usa. (1 Corinto 12:20, 26) Hinumdomi ang bag-ong “Mga Maghuhupot sa Integridad” nga mga Kombensiyon gitambongan sa minilyong magbabasa niining magasina. Kadtong nakatambong mahinumdom sa maayo kaayong pagbati nga mahauban sa daghan kaayo kansang pangunang tumong sa kinabuhi mao ang paghupot sa integridad ngadto sa Diyos. Ang pagkahibalong ang kaliboang alirong kanila​—samtang diha sa ilang mga dapit gitrabahoan o sa eskuylahan diha sa ilang kaugalingong mga komunidad​—naghupot usab sa integridad sa ilalom sa lisod nga mga pagsulay makapadasig gayod niadtong nanambong nga huptan ang integridad!​—1 Pedro 5:9.

10. (a) Sa unsang paagi ang usa ka tawo mapakyas sa paghupot sa matarong nga pangisip? (b) Unsa ang gisugdan ni Job sa pagkuwestiyon?

¹⁰ Apan mahimong dili nato mabatonan kanunay ang matarong pangisip, sama kang Job. Ang usa ka tawong nagaantos sa labihan, ug kinsa anaa sa maluyang kahimtang sa hunahuna, tingali magaingon, ‘Oy, nganong gibuhat kini sa Diyos kanako? Nganong gitugotan niya kini nga mahitabo?’ Mahimong mahidangat siya sa punto sa pagpangutana, ‘Unsay kapuslanan nga ako nagaalagad sa Diyos?’ Kay wala mahibalo sa tinubdan sa iyang pag-antos, gikuwestiyon ni Job ang presenteng kaayohan sa pagkahimong matarong, sanglit ang maayo daw nagaantos nga sama, kon dili man labaw, kay sa daotan. (Job 9:22) Sumala kang Eliu, si Job miingon: “Unsay kapuslanan kanako? Unsa ba ang labaw kong maangkon kay sa kon ako makasala?” (Job 35:3, An American Translation) Apan dili mahimong atong hatagag bug-os nga pagtagad ang atong kaugalingong mga suliran nga kita mawad-an sa matarong nga pagpangisip ug magkuwestiyon sa bili sa pag-alagad sa Diyos.

11. Unsang maayong pagtul-id ang gihatag ni Eliu kang Job?

¹¹ Gihatag ni Eliu kang Job ang gikinahanglang pagtul-id, nga gihusay ang mga butang pinaagi sa pagpunting nga si Jehova binayaw nga labaw kang Job. (Job 35:4, 5) Gipakita ni Eliu nga, bisan unsay mahitabo, dili gayod kita mohinapos nga ang Diyos dili matinagdanon ug sa usa ka paagi mangatarongang kita makapanimalos Kaniya tungod sa ginaisip nga mga inhustisya sa Iyang bahin. “Kon ikaw makasala,” si Eliu nangutana kang Job, “unsay imong mahimo batok kaniya? Ug kon ang inyong mga pag-alsa modaghan gayod, unsay imong pagabuhaton kaniya?” (Job 35:6) Oo, kon mosulay ka sa pagbalos sa Diyos pinaagi sa pagbiya sa iyang mga dalan o iyang pag-alagad, ikaw magasakit lamang sa imong kaugalingon, dili sa Diyos.

12. Sa unsang paagi ang atong paghupot sa integridad magaapektar sa Diyos?

¹² Sa laing bahin, gipakita ni Eliu nga si Jehova sa personal dili makabatog kaayohan kon buhaton nato kon unsay matarong. Hinuon, ang Diyos malipay kon atong huptan ang integridad, apan, sa samang panahon, sa bisan unsang paagi siya wala magsalig sa atong pagsimba, sumala sa gipaila sa gisukna ni Eliu kang Job: “Kon ikaw matuod nga matarong, unsay imong igahatag kaniya, o unsay iyang madawat gikan sa imong kamot?” (Job 35:7) Ang Diyos mihatag kanatog kinabuhi, ug tungod kaniya kita nagaginhawa ug nagalihok ug nagalungtad. Siya ang tag-iya sa tanang butang! (Buhat 17:25; 1 Cronicas 29:14) Busa ang atong pagkadaotan kun atong pagkamatarong dili makaapektar sa Diyos sa personal.​—Job 35:8.

Dihang Pagatul-iron

13. (a) Unsa ang pagsanong ni Job ngadto sa pagtul-id nga gihimo? (b) Unsang suliran ang atong nabatonan tanan?

¹³ Unsa ang reaksiyon ni Job ngadto sa pagtul-id nga gihatag, sa una pinaagi kang Eliu ug dayon pinaagi ni Jehova mismo? Iyang gidawat dayon, nga naghinulsol “sa abog ug sa abo.” (Job 42:6) Oo, si Job nagpaubos sa iyang kaugalingon, nga miila sa iyang sala. Ug dili ba nato dayegon ang maong pagkamapaubsanon? Apan komosta man kita? Bisan pag tingali kita maisogong mga maghuhupot sa integridad sama kang Job, kitang tanan makiling sa paghimog mga sayop ug mahimong dili timbang sa usa o laing paagi. (Santiago 3:2; Galacia 2:11-14) Unsay atong buhaton kon ang atong sayop o pagkadili-hingpit iawhag sa atong pagtagad, bisan sa usa nga batabata pa sama kang Eliu?​—Job 32:4.

14. (a) Unsa ang kasagarang kiling kon tul-iron ang usa ka tawo? (b) Unsa ang makaamot ngadto sa mga sayop o dili-hustong mga hukom, ug unsang panig-ingnan ang gihatag ni Job sa gitul-id siya?

¹⁴ Dili sayon kanunay ang pagdawat sa pagtul-id. (Hebreohanon 12:11; Proverbio 3:11, 12) Ang kiling mao ang pagsulay sa pagpakamatarong sa atong kaugalingon. Sama kang Job, mahimong kita wala mosulti o mohimo nga tinuyo sa butang daotan. Ang atong motibo tingali maayo. Apan tingali kita misulti nga walay bug-os nga kahibalo, kulang sa pagsabot o pagkasensitibo. Tingali ang atong sinultihan mibanaag sa rasanhon o nasodnong pagkalabaw, o pagkaestrikto sa usa ka butang nga walay Kasulatanhong pagpaluyo. Tingali giawhag sa atong pagtagad nga ang atong gipanulti labawng nagabanaag sa atong kaugalingong punto de vista ug kini nakasakit sa uban sa gidak-ong nakadaot sa ilang espirituwalidad. Kon tul-iron, kita ba, sama kang Job, moila nga kita ‘nagsulti nga walay salabotan’ ug “mobakwi”?​—Job 42:3, 6.

Pagsalig sa Diyos, Dili sa Bahandi

15. Giunsa nato pagkahibalong ang pagsalig ni Job wala diha sa iyang bahandi?

¹⁵ Gikuwestiyon ni Bildad ang tumong sa pagsalig ni Job, nga mipasabot nga siya nahikalimot sa Diyos ug ang iyang pagsalig nabutang sa laing dapit. (Job 8:13, 14) Apan bisan pag si Job gibulahan sa daghang materyal nga butang, ang iyang pagsalig wala diha niana. Ang iyang integridad wala matarog bisan diyutay sa nawad-an siya sa tanan niyang kabtangan. (Job 1:21) Sa iyang kataposang depensa, si Job miingon: “Kon akong ibutang ang bulawan ingon nga akong pagsalig, o sa bulawan ako magaingon, ‘Ikaw mao ang akong pagsalig!’ Kon ako nagkasadya tungod kay daghan ang akong kabtangan, ug tungod kay daghan ang nakaplagan sa akong mga butang . . . kana usab maoy usa ka sala nga pagatagdon sa mga maghuhukom, kay igalimod ko ang matuod nga Diyos sa itaas.”​—Job 31:24-28.

16. (a) Unsang pagsusi ang atong pagahimoon sa atong kaugalingon? (b) Unsa ang saad sa Diyos ngadto niadtong nagasalig kaniya?

¹⁶ Komosta ba kita? Diin nato gibutang ang atong pagsalig​—diha kang Jehova o sa materyal nga bahandi? Kon kita timbangon sa tukmang timbangan, sumala sa buot ni Job, masayran ba sa Diyos ang atong integridad niining butanga? Ang ato bang pangunang kabalaka sa kinabuhi mao gayod ang pagtagana kang Jehova sa dalang nagahupot sa integridad nga pinaagi niana matubag ang mga pagtamay ni Satanas? O kita ba sa linain mabalak-on sa pagtagbaw sa atong mga tinguha sa mga kalingawan ug mga kabtangan? Pagkamaayo kon kita mahisama kang Job ug makalipay sa kasingkasing ni Jehova pinaagi sa pagsalig Kaniya, ug dili pagbutang ug hinobrang bili sa atong kaugalingon o sa materyal nga mga butang nga anaa! Kon mosalig kita kang Jehova, nga magabutang pag-una sa iyang intereses, siya nagasaad nga dili gayod mopasagad o mobiya kanato.​—Mateo 6:31-33; Hebreohanon 13:5, 6.

Seksuwal nga Moralidad

17. Unsang mga pagpasabot ang gihimo sa “mga maglilipay” ni Job, apan unsay giingon ni Job mahitungod sa iyang moral nga kagawian?

¹⁷ Ang mini nga mga maglilipay ni Job wala laktud magsumbong kaniya sa daotang kagawian sa seksuwal, apan matag karon ug unya ilang gipasabot nga siya sad-an sa tinagong sala nga tungod niana ang Diyos nagsilot kaniya. Ingong usa ka tawong bahandianon, kay mao gayod “ang labing bantogan sa tanang taga-Sidlakan,” si Job tinong may kahigayonan sa seksong nahigawas sa kaminyoon. (Job 1:3; 24:15) Ang ubang alagad sa Diyos, una ug tapos sa panahon ni Job nahulog sa mga tentasyong seksuwal. (Genesis 38:15-23; 2 Samuel 11:1-5) Bisan pa niana, si Job mipanalipod sa iyang kaugalingon batok sa bisan unsang mga sugyot sa maong buhat nga daotan, nga mipahayag: “Usa ka tugon akong gihimo uban sa akong mga mata. Busa sa unsang paagi akong ikapakita ang akong kaugalingon nga matinagdanon sa usa ka ulay? Kon ang akong kasingkasing nahaylo sa usa ka babaye, ug ako nagpaabot sa ganghaan mismo sa akong kauban . . . kana maoy malaw-ay nga kagawian, ug kana kasal-anan nga pagatagdon sa mga maghuhukom.”​—Job 31:1, 9-11.

18. Nganong lisod kaayong huptan ang seksuwal nga moralidad, apan nganong kita magmalipayon kon atong huptan kana?

¹⁸ Tingali walay laing paagi nga si Satanas malamposon kaayo sa pagdaot sa integridad sa mga alagad sa Diyos kay sa paghaylo kanila sa paghimo sa pakighilawas. (Numeros, kapitulo 25) Makasundog ka ba sa integridad ni Job pinaagi sa pagsukol sa tanang panghaylo sa seksuwal nga kahiwian? Kini dako nga hagit, ilabina niining nabuang-ug-sekso nga kalibotan diin kaylap kaayo ang imoralidad. Apan hunahunaa unsa ka maayo, kon pagapanudyaon na, nga makapahayag nga masaligon sama kang Job: “Ang Diyos masayod sa akong integridad”!​—Job 31:6.

Unsay Makatabang Kanato

19. Unsa ang kinahanglanon sa pagtabang kanato sa paghupot sa integridad?

¹⁹ Dili sayon ang pagsundog sa integridad ni Job, sanglit si Satanas naningkamot pag-ayo karong adlawa sa pagbungkag sa atong integridad sama sa iyang pagpaningkamot sa pagbungkag sa iya ni Job. Busa, kinahanglang atong isul-ob ang hingpit nga hinagiban gikan sa Diyos. (Efeso 6:10-18) Nalangkit niini ang kiling sa pagkapahiuyon sa Diyos, sama kang Job, nga kanunay mahunahunaon sa pagpahimuot Kaniya diha sa bisan unsa nga pagabuhaton nato o sa atong mga pamilya. (Job 1:5) Busa, bililhon ang pagtuon sa Bibliya, regular nga pagpakig-uban sa kaubang mga magtutuo, ug ang dayag nga pagpahayag sa atong pagtuo.​—2 Timoteo 2:15; Hebreohanon 10:25; Roma 10:10.

20. (a) Unsang paglaom ang makapalig-on kanato panahon sa mga pagsulay? (b) Unsang ganti alang sa paghupot sa integridad nga gihisgotan sa salmista ang mahimong atong madawat?

²⁰ Apan ang makapalig-on ilabina kanato panahon sa pagsulay mao ang butang nagpalig-on kang Job—ang iyang pagsalig nga kining kinabuhia dili kay mao lamang. “Kon mamatay ang usa ka tawong kusgan siya mabuhi ba pag-usab?” nangutana si Job. Ug sa pagtubag siya miingon: “Ikaw magatawag, ug ako mismo magatubag kanimo.” (Job 14:13-15) Ang pagbaton nianang samang bug-os nga pagsalig nga banhawon ni Jehova ang iyang matinumanong mga alagad makatabang usab kanato sa pag-atubang sa bisan unsang pagsulay nga tingali ipahamtang ni Satanas. (Hebreohanon 6:10) Dugay na kanhi, ang salmista sa Bibliya misulat: “Mahitungod kanako, tungod sa akong integridad ikaw nagatuboy kanako, ug ikaw magapahimutang kanako sa atubangan sa imong nawong sa panahong walay katinoan.” (Salmo 41:12) Hinaot kana mao ang malipayong kaugmaong maangkon sa matag usa kanato​—nga ituboy kita ug tipigan kita ni Jehova sa walay kataposan tungod kay kita iyang mga alagad nga nagahupot sa integridad!