CASIA

[Heb., qid·dahʹ; qetsi·ʽahʹ].

Bisan tuod nga duha ka Hebreohanong mga pulong ang gigamit sa pagtumong niining tanoma diha sa Bibliya, ang mga bersiyon sa Syriac ug Targum nagpakita nga kini nagtumong sa mao ra nga kahoy o sa produkto niini. Ang kahoyng casia (Cinnamomum cassia) makaplagan karon diha sa sidlakang Asia ug kapamilya sa mga kahoyng kaningag. Kini mahimong moabot sa gitas-ong 12 m (40 p) ug may sinawon, tuskig nga mga dahon. Ang ilalom nga panit sa mga sanga (gitawag ug cassia lignea), sa dihang putlon, mauga ug mapakpak, nga maglukotlukot nga samag mga turotot, ug dayon itumod aron ibaligya. Ang panit sa casia mas gaspangon ug mas halang kay sa panit sa kaningag. Ang mga putot himoong mga lamas sa paglutog mga potahe, ug ang gulang nga mga bulak, kon ibulad, himoong humot nga insenso.

Sa dihang ang balaang igdidihog nga lana giandam sa panahon sa paghimo sa tabernakulo, ang casia gilakip sa mga sambog ingong usa sa “labing maayo nga mga pahumot.” (Ex 30:23-25) Ang casia maoy usa sa iladong mga produkto nga gibaligya sa mga magpapatigayon ug mga negosyante sa siyudad sa Tiro. (Eze 27:19) Diha sa Salmo 45:8 ang pulong qetsi·ʽahʹ gigamit aron sa paghubit sa mga besti sa hari nga nangalimyon sa kahumot sa panahon sa iyang kasal. Ang bugtong laing higayon nga makaplagan kining pulonga mao ang paggamit niini ingong ngalan sa ikaduhang anak nga babaye ni Job nga si Kezia, nga natawo sa dihang si Job naulian gikan sa iyang sakit.​—Job 42:14.