‘Sa Diyos Ako Modangop’
NIINING “makuyaw nga mga panahon nga lisod sagubangon,” ang mga tentasyon ug mga pagpit-os nagakauswag. Ang atong pagkamatinud-anon, pananglitan, mahimong ginasulayan sa trabahoan. Ang atong pagkaputli tingali ginasulayan taliwala sa mga kauban sa tunghaan. Ug ang atong pagkamaunongon sagad ginasulayan sa usa ka daotan ug moral nga kalibotan.—2 Timoteo 3:1-5.
Ang magsusulat sa Bibliya nga si Asap nagkinabuhi usab sa usa ka panahon nga kaylap ang pagkadaotan. Ang pipila sa iyang mga katalirongan nanghambog pa bahin sa ilang dili-diyosnong panggawi. “Ang pagkamapahitas-on nagsilbing usa ka kulentas kanila,” misulat si Asap. “Ang kapintasan nagsul-ob kanila ingong usa ka besti. Sila nagayubit ug nagasulti ug daotan; bahin sa pagpanglimbong mapagawalon sila nga manulti.” (Salmo 73:6, 8) Kini ba nga tinamdan pamilyar nga pamation?
Alang niadtong nagtinguha sa pagbuhat ug matarong, ang maong panggawi makapaguol kaayo, makapawala pa gani sa kadasig. “Gihampak ako sa tibuok nga adlaw,” mimulo si Asap. “Kasamok kadto sa akong mga mata.” (Salmo 73:14, 16) Susama tingali ang imong gibati, apan ayaw ug kalugda! Si Asap nakasagubang sa pagkadaotan sa iyang adlaw, ug makasagubang ka usab niana. Apan sa unsang paagi?
Naamgohan ni Asap nga ang tinuod nga hustisya halos imposible nga makaplagan ubos sa dili-hingpit nga pagmando sa tawo. (Salmo 146:3, 4; Proverbio 17:23) Busa imbes usik-usikan ang iyang bililhong panahon, kusog, ug kahinguhaan sa pagsulay sa pagtapos sa tanang pagkadaotan palibot kaniya, siya nagtagad ug maayo sa iyang relasyon uban sa Diyos. Si Asap miingon: “Alang kanako, ang pagduol sa Diyos maayo alang kanako. Diha sa Soberano Ginoong Jehova ako midangop.”—Salmo 73:28.
Karong adlawa, kadtong nagabuhat sa hiwing mga pamaagi sa negosyo sagad nagpahimulos ug materyal nga bentaha. Daghan ang tingali nanghambog pa sa ilang di-pagtagad sa moral nga mga balaod sa Diyos. Apan sila dili magpabilin hangtod sa hangtod. “Sa pagkatinuod gibutang mo sila diha sa dapit nga madanlog,” matod ni Asap. “Gitugyan mo sila sa pagkalaglag.”—Salmo 73:18.
Oo, sa tinudlong panahon sa Diyos, ang pagpanikas, kapintasan, ug korapsiyon, ingon man ang tanang ubang dili-diyosnong mga batasan nga kinahanglang likayan sa matuod nga mga Kristohanon, pagawagtangon. Ang Bibliya nagsaad: “Ang mga mamumuhat ug daotan pagaputlon, apan kadtong nagalaom kang Jehova mao ang makapanunod sa yuta.” (Salmo 37:9) Kasamtangan, hinaot atong ipatugbaw ang mga pulong sa salmista kinsa miingon: “Si Jehova mao ang akong bato ug akong kuta ug ang akong Manluluwas. Ang akong Diyos maoy akong bato. Ako modangop kaniya.”—Salmo 18:2.