Usa ka Kahoyng Nagaawit

SINULAT SA KORESPONSAL SA PAGMATA! SA KENYA

DIHA sa halapad kaayong kasagbotan sa Aprika nagtindog ang usa ka kahoy nga nagpunayg awit. Ang kahoy maoy usa ka matang sa akasya ug nailhan ingong nagapanaghoyng mga tunok. Ngano? Tungod kay inighuros sa hangin diha sa gagmayng mga sanga, ang kahoy morag managhoy.

Usa ka maanindot, palurayluray nga tingog mogawas sa dihang ang tag-as ug nipis nga mga tunok mokurog uban sa hangin. Nakadugang sa honi sa mga tunok, ang walay-sulod nga mga bugdobugdo sa kahoy mopagawas ug tingog nga sama gayod sa basiyo nga botelya kon huypan ug hangin sa baba niini. Kining maong “mga instrumento” naporma sa mga hulmigas, nga maoy naglungag sa mga bugdobugdo, ang linginong mga balay sa hulmigas, ug nagkulit ug gagmayng mga lutsanan ug gawasanang mga lungag diha niini. Tungod kay lainlain man ug gidak-on ang mga bugdobugdo ug mga lungag, kini mopagawas ug mga tingog nga lainlain ug tono. Kining mga tingoga makadugang sa pagkatalagsaon ug sa katahom sa nagapanaghoyng tunok.

Kining kahoya magpahinumdom kanato sa mga pulong sa salmista nga mahulagwayong miingon: “Pasagdi nga ang tanang kahoy sa lasang mosinggit sa kalipay [sa pag-awit] atubangan kang Jehova.” (Salmo 96:12, 13) Tinuod, sa dihang mohuyop ang hangin diha sa mga tunok ug sa samag-plawta nga mga bugdobugdo, kini magpagawas ug tingog nga matahom, punog-pagbati nga awit sa Aprika.