Dunggon ni Jehova ang Atong Dinaliang mga Pagtuaw ug Panabang
ANG tabang gikinahanglan kaayo. Kini tataw diha sa masulob-ong panagway sa tigdalag bino sa hari. Gipangutana kon unsay nahitabo, ang tigdalag bino mipadayag sa iyang kasubo sa gun-ob nga kahimtang sa Jerusalem ug sa mga kuta niini. Unya ang pangutana: ‘Unsay buot mong ihangyo kanako?’ “Dihadiha ako miampo sa Diyos sa mga langit,” ang tigdalag bino nga si Nehemias misulat sa ulahi. Kadto maoy daklit, hilom, ug dinaliang pagtuaw sa pagpangayog tabang kang Jehova. Ug unsay resulta? Aw, ang Persianhong haring si Artajerjes mihatag dayon ug awtoridad kang Nehemias sa pagtukod pag-usab sa mga kuta sa Jerusalem!—Nehemias 2:1-6.
Oo, ang Diyos mopatalinghog sa dinaliang mga hangyo sa mga nahigugma kaniya. (Salmo 65:2) Busa kon ang pagsulay daw dako kay sa imong maantos, makaampo ka sama kang salmistang David diha sa Salmo 70, dihang siya nagkinahanglan ug dinaliang tabang sa Diyos. Ang mga pulong sa ibabaw ning salmoha nagpakita nga ang katuyoan niini maoy “sa pagpahinumdom.” Uban sa diyutayng kausaban, gisobli niini ang Salmo 40:13-17. Apan sa unsang paagi ang ika-70 nga Salmo makatabang kanato ingong katawhan ni Jehova?
Hangyo Alang sa Dinaliang Kaluwasan
Si David misugod uban sa hangyo: “O, Diyos ko, luwasa ako, O Jehova, pagdali sa pagluwas kanako.” (Salmo 70:1) Dihang maglisod, kita makaampo nga magdali ang Diyos sa pagtabang kanato. Dili kita sulayan ni Jehova sa daotang mga butang, ug siya “mahibalo kon unsaon pagluwas sa mga tawong dunay diyosnong debosyon gikan sa pagsulay.” (2 Pedro 2:9; Santiago 1:13) Apan unsa man kon itugot niya ang pagsulay mga magpadayon, tingali aron tudloan kita? Nan kita makapangayog kaalam sa pagsagubang niini. Kon mangayo kita nga may pagtuo, kita hatagan niyag kaalam. (Santiago 1:5-8) Ang Diyos magahatag usab kanato ug kusog aron makalahutay sa atong mga pagsulay. Pananglitan, siya ‘nagalig-on kanato sa higdaanan sa kasakit.’—Salmo 41:1-3; Hebreohanon 10:36.
Ang atong kinaiyanhong pagkamakasasala, maingon man ang kanunayng pagkaladlad sa tintasyon ug ang paningkamot sa Yawa nga daoton ang atong relasyon kang Jehova, angay motukmod kanato sa pag-ampo sa panabang ni Jehova matag adlaw. (Salmo 51:1-5; Roma 5:12; 12:12) Haom tagdon usab ang mga pulong sa sulondang pag-ampo ni Jesus: “Ayaw kami itugyan sa pagsulay, apan luwasa kami gikan sa daotang usa.” (Mateo 6:13) Oo, kita makagangyo sa Diyos nga dili niya itugot nga madaog kita dihang tintalon sa pagsupak kaniya ug nga iyang pugngan si Satanas, “ang daotang usa,” sa pagbitik kanato. Apan ubanan nato ang atong mga pagtuaw alang sa kaluwasan ug mga tikang sa paglikay sa mga kahimtang nga wala-kinahanglanang magladlad kanato ngadto sa tintasyon ug sa mga laang ni Satanas.—2 Corinto 2:11.
Kadtong mga Nanag-ingon, “Aha!”
Basin ug masulayan gayod kita sa mga pagbiaybiay sa mga kaaway tungod sa atong gipasundayag nga pagtuo. Kon kini mahitabo kanimo, palandonga ang mga pulong ni David: “Hinaot makaagom sila ug kaulawan ug kalibog kadtong nanagpangita sa akong kalag. Pasiboga sila ug ipadala ngadto sa kaulawan kadtong malipay sa akong kadaot. Pasiboga sila tungod sa ilang kaulaw kadtong mga nanag-ingon: ‘Aha, Aha!’” (Salmo 70:2, 3) Ang mga kaaway ni David gustong makakita kaniyang patay; ilang ‘gipangita ang iyang kalag,’ o kinabuhi. Inay manimalos, nagpasundayag hinoon siyag pagtuo nga pakaulawan ra sila sa Diyos. Miampo si David nga ang iyang mga kaaway “makaagom ug kaulawan ug kalibog”—manglipaghong, malibog, magubot, mangabalo sa paningkamot sa pagbuhat sa ilang daotang mga laraw. Oo, pasagdi nga kadtong nangita sa iyang pagkadaot ug nalipay sa iyang mga katalagman malibog ug makaagom ug kadaot sa dungog.
Kon kita aduna nianang gitawag nga makidaotong kalipay dihang dunay kadaot nga modangat sa usa ka kaaway, manubag kita kang Jehova sa atong sala. (Proverbio 17:5; 24:17, 18) Apan, kon ang mga kaaway mopasipala sa Diyos ug sa iyang katawhan, makaampo kita nga alang sa iyang balaang ngalan, si Jehova ‘mopasibog kanila ug paagomon sila ug kaulawan’ atubangan sa mga tawo kinsa gusto nila nga mohimaya kanila. (Salmo 106:8) Ang panimalos iya sa Diyos, ug siya makabuntog ug makapaulaw sa iya ug atong kaaway. (Deuteronomio 32:35) Pananglitan, ang lider sa Nazi nga si Adolf Hitler naninguha pagwagtang sa mga Saksi ni Jehova sa Alemanya. Pagkadako sa iyang kapakyasan, kay libolibo kanila karong adlawa ang nagamantala sa mensahe sa Gingharian didto!
Uban ang mayubitong pagbiaybiay, tingali ang atong mga kaaway moingon: “Aha, aha!” Sanglit ilang ginatamay ang Diyos ug ang iyang katawhan, pasagdi nga ang maong mga makasasala “mosibog tungod sa ilang kaulaw,” nga mag-antos sa pagkadaot sa dungog. Samtang mag-ampo alang niini, huptan ta ang atong pagkamaunongon ug lipayon ang kasingkasing ni Jehova, aron iyang matubag si Satanas ug tanan nga nagatamay Kaniya. (Proverbio 27:11) Ug dili gayod nato kahadlokan ang atong mapahitas-ong mga kaaway, kay “siya nga nagasalig kang Jehova panalipdan.” (Proverbio 29:25) Ang mapahitas-ong hari sa Babilonya nga si Nabucodonosor, nga nagbihag sa katawhan sa Diyos, nakaagom ug kaulawan ug napugos pag-angkon nga ‘ang Hari sa mga langit makahimo sa pagpakaulaw niadtong nagalakaw nga mapahitas-on.’—Daniel 4:37.
“Pagapadakoon ang Diyos!”
Bisag mohatag kagubot kanato ang mga kaaway, kanunay gayod natong bayawon si Jehova uban sa iyang kaubang mga magsisimba. Inay magpadaog sa mga kalisdanan nga tungod niana siya mapakyas pagpadako sa Diyos, si David miingon: “Hinaot nga magmalipayon ug magmangayaon kadtong nangita kanimo, ug hinaot nga kadtong nahigugma sa imong kaluwasan mag-ingon unta kanunay: ‘Pagapadakoon ang Diyos!’” (Salmo 70:4) Ang katawhan ni Jehova padayong masadyaon kaayo tungod kay sila ‘malipayon ug mangayaon’ diha kaniya. Ingong iyang dedikado, bawtismadong mga Saksi, duna silay dakong kalipay gumikan sa ilang suod nga relasyon kaniya. (Salmo 25:14) Apan, mahimong isipon sila nga mapainubsanong mga tigpangita sa Diyos. Ingong mga magtutuo nga nagatuman sa mga sugo sa Diyos, sila padayon sa pagpangitag dugang kahibalo kaniya ug sa iyang Pulong.—Ecclesiastes 3:11; 12:13, 14; Isaias 54:13.
Samtang ang mga Saksi ni Jehova nagasangyaw sa maayong balita, sama rag kanunay silang nagaingon: “Pagadakoon ang Diyos!” Ilang gidayeg si Jehova, nagahatag kaniya ug hataas nga pagtamod. Sa pagkamalipayon, ilang gitabangan ang mga nagapangita sa kamatuoran nga makakat-on mahitungod sa Diyos ug usab magahimaya kaniya. Dili sama sa mga kalibotanon si kinsa mga mahigugmaon sa kalingawan, ang katawhan ni Jehova ‘nahigugma sa iyang kaluwasan.’ (2 Timoteo 3:1-5) Mahunahunaon sa ilang kinaiyanhong pagkamakasasala, sila mapasalamaton kaayo sa mahigugmaong tagana ni Jehova nga Diyos alang sa kaluwasan sa walay kataposang kinabuhi, nga gihimong posible pinaagi sa halad pasighiuli sa iyang hinigugmang Anak, si Jesu-Kristo. (Juan 3:16; Roma 5:8; 1 Juan 2:1, 2) Imo bang gipadako ang Diyos ug nagpakitang nga imong ‘gihigugma ang iyang kaluwasan’ pinaagi sa pagpasundayag sa tinuod nga pagsimba alang sa iyang kadayeganan?—Juan 4:23, 24.
Salig sa Magtatagana sa Kaikyasan
Dihang gipadayag ni David ang iyang kaugalingon niini nga salmoha, gibati niya ang tumang panginahanglan nga siya nakaingon: “Apan ako sinakit ug kabos. O Diyos, pagdali sa paglihok alang kanako. Ikaw ang akong tabang ug magtatagana sa kaikyasan alang kanako. O Jehova, ayaw paglangan.” (Salmo 70:5) Gisakit sa mga pagsulay nga modangat sa mga magtutuo—mga kasakitan sama sa mga paglutos, mga tintasyon ug mga pag-atake ni Satanas—daw kita “kabos” nga tan-awon. Bisan kon dili kita timawa, daw kita walay depensa batok sa mga walay-puangod nga mga kaaway. Apan, makasalig kita nga si Jehova makahimo ug moluwas kanato ingong iyang matinumanong mga alagad.—Salmo 9:17-20.
Si Jehova mao “ang Magtatagana sa kaikyasan” kon gikinahanglan nato kini. Ang atong kaugalingong mga kakulangan basin nakapaagom kanato sa masulayong kahimtang. Apan kon ang ‘atong binuang nagapabaliko sa atong dalan,’ dili nato tugotan ang atong kasingkasing nga ‘masuko batok kang Jehova.’ (Proverbio 19:3) Dili siya ang mabasol, ug andam siya motabang kanato kon moampo kita nga may pagtuo. (Salmo 37:5) Unsa man kon nakigbisog kita aron sa paglikay sa sala? Nan magmaespisipiko kita mahitungod niini diha sa atong pag-ampo, mangayo sa tabang sa Diyos aron makapadayon sa pagtinguha sa pagkamatarong. (Mateo 5:6; Roma 7:21-25) Tubagon sa Diyos ang atong kinasingkasing nga pag-ampo, ug mouswag kita sa espirituwal kon magpagiya kita sa iyang balaang espiritu.—Salmo 51:17; Efeso 4:30.
Kon kita nagaantos sa pagsulay sa atong pagtuo, basin atong bation nga dili na kita makalahutay. Sanglit ang atong makasasalang unod huyang, basin mangandoy kini ug dihadiha nga pagluwas. (Marcos 14:38) Busa makahangyo kita: “O Jehova, ayaw kaayo paglangan.” Ilabina kon nabalaka kita sa pasipala sa ngalan sa Diyos, basin mapukaw kita nga moampo sama ni propetang Daniel: “O Jehova, pamatii. O Jehova pasayloa. O Jehova, patalinghogi ug buhata. Ayaw paglangana, alang sa imong kaugalingong pahanungdan, O akong Diyos, tungod sa imong ngalan ginatawag . . . ang imong katawhan.” (Daniel 9:19) Makasalig kita nga ang atong langitnong Amahan dili kaayo maglangan, kay si apostol Pablo nagpasalig: “Kita . . . moduol uban ang kagawasan sa pagsulti ngadto sa trono sa dili-takos nga kalulot, aron atong madawat ang kaluoy ug makakaplag ug dili-takos nga kalulot alang sa panabang sa hustong panahon.”—Hebreohanon 4:16.
Ayaw kalimot nga si Jehova mao ang Magtatagana sa kaikyasan. Ingong iyang mga alagad, makaayo kanato ang paghinumdom niini ug ang mainampoong diwa sa Salmo 70. Usahay gikinahanglan natong moampo nga balikbalik labot sa usa ka butang nga gikabalak-an pag-ayo. (1 Tesalonica 5:17) Tingali daw walay kasulbaran ang usa ka problema, nga walay lutsanan sa atong suliran. Apan ang atong mahigugmaong Amahan molig-on kanato ug dili motugot nga sulayon kita nga dili nato maantos. Busa, ayaw gayod pagkataka sa pagduol sa atubangan trono sa Walay-Kataposang Hari diha sa kinasingkasing nga pag-ampo. (1 Corinto 10:13; Filipos 4:6, 7, 13; Pinadayag 15:3) Pag-ampo nga may pagtuo, bug-os nga mosalig kaniya, kay dunggon ni Jehova ang atong dinaliang mga pagtuaw sa pagpangayog tabang.