Pagtimba sa “Halalom nga Tubig”
ANG usa ka panultihon sa Bibliya nagkanayon: “Ang tambag diha sa kasingkasing sa tawo ingon sa halalom nga tubig, apan ang usa ka tawo nga may salabotan magatimba niini.” (Proverbio 20:5) Sa mga panahon sa Bibliya mas hago ang pagkuhag tubig kay sa daghang dapit karon. Sa dihang nakigsulti si Jesus sa Samaritanhong babaye, nagtimba siya ug tubig gikan sa tuboran ni Jacob, usa ka atabay nga mga 23 metros ang giladmon!—Juan 4:5-15.
Ingon sa gipakita sa Proverbio 20:5, ang pagsabot nga gikinahanglan aron sa pagpagula sa halalom nga mga panghunahuna ug mga pagbating gihambin sa kasingkasing sa usa ka tawo maoy sama sa paningkamot nga gikinahanglan sa pagtimba ug tubig gikan sa atabay. Tinuod kini sa kadaghanang bahin sa kinabuhi. Pananglitan, tingalig nakaila ka ug mga indibiduwal nga nakatigom ug bahandi sa kahibalo ug kasinatian sa daghan nang tuig. Kon sila wala makiling nga moboluntaryo sa paghatag sa wala pangayoa nga tambag, tingalig kinahanglan nimo silang itukmod nga mosulti. Pinaagi sa pagpakitag interes, pagsuknag mga pangutana, ug pag-usisa sa mataktikanhong paagi, maora kag nagtunton sa imong timba ngadto sa usa ka lawom nga atabay sa kaalam.
Ang tambag sa Proverbio 20:5 mapadapat usab sa pamilya. Kasagaran, ang mga asawa madunggan nga moingon: “Ang akong bana dili motug-an kanako kon unsay iyang gibati!” Ang bana tingali moingon: “Wala ko tinggi sa akong asawa!” Sa ingon nianang mga kahimtang, gikinahanglan ang pagsabot aron mapagawas ang mga panghunahuna nga nagpahipi sa halalom nga bahin sa kasingkasing sa kapikas. Ang mataktikanhong mga pangutana (Naproblema ka ba karong adlawa? Unsay nahitabo? Sa unsang paagi ako makatabang?) kasagarang makasugod sa kinasingkasing nga komunikasyon. Ang pagpasundayag sa maong pagsabot makapalig-on sa bugkos sa kaminyoon, sa kaayohan sa bana ug asawa.