“Bansaya ang Bata”

ANG malamposong pag-atiman ug tanaman nagkinahanglag labaw pa kay sa pagsabwag ug mga binhi diha sa yuta ug dayon mobalik pipila ka bulan sa ulahi aron moani. Dakong paghago ang nalangkit sa pagtikad sa yuta, pagpugas sa mga binhi, ug pagbisibis ug pag-amoma sa mga tanom aron mogulang kini.

Kining maong proseso maayong nag-ilustrar sa pagkatinuod sa Proverbio 22:6, nga nag-ingon: “Bansaya ang bata diha sa dalan nga iyang pagalaktan; bisan kon siya matigulang na siya dili mobiya niana.” Sa pagkatinuod, ang ginikananong pagbansay maoy pangunang hinungdan sa malamposong pagmatuto sa bata.

Apan, niining matugotong kalibotan karon daghang ginikanan ang napakyas sa pagpamati niining tambaga. Sa dihang sundon nila ang naandang kaalam nga ang mga bata kinahanglang makakat-on sa pagdumala sa mga suliran nga silasila ra, ang ilang mga bata kasagarang gipasagdang magkinaugalingon. Ang maong dalan maghimo sa mga batan-on nga daling madutlan sa makadaot nga impluwensiya sa walay-prinsipyo ug mapatuyangong mga tawo.​—Proverbio 13:20.

Pagkalabi pang maayo alang sa mga ginikanan nga itisok ang Kristohanong mga prinsipyo diha sa ilang mga anak pinaagi sa diyosnong pagbansay sa linghod nga panuigon! Unsa ka sayo? “Sukad pa sa pagkagamayng bata,” matod ni apostol Pablo. Mao kana ang kahimtang sa batan-ong lalaki nga si Timoteo. Ang iyang inahan, si Eunice, ug ang iyang apohang si Loida nagsilsil sa “balaang mga sinulat” diha kang Timoteo mao nga siya ‘nakakat-on’ ug ‘nakombinsir.’ Ang resulta? Ang maong pagbansay may hinungdanong bahin sa paghimo kaniya nga “maalamon alang sa kaluwasan.”​—2 Timoteo 1:5; 3:14, 15.

Susama karon, ang mga ginikanan nga ‘dili moundang sa pagbuhat kon unsay maayo’ moani ug dagayang mga ganti kon sila ‘dili molunga.’ (Galacia 6:9) Matod sa maalamong Haring Solomon: “Ang amahan sa usa nga matarong magmalipayon gayod.”​—Proverbio 23:24.