Ilang ‘Gipalit ang Kamatuoran’!

“PALITA mismo ang kamatuoran ug ayaw kini pag-ibaligya.” (Proverbio 23:23) Maoy gitambag sa maalamong tawo nga si Solomon. Bisan tuod kini ang ikasulti bahin sa kamatuoran sa kinatibuk-an, ilabinang ingon gayod niini kon bahin na sa kamatuoran nga makaplagan diha sa Pulong sa Diyos, ang Bibliya. Ang maong kamatuoran motultol ngadto sa kinabuhing dayon! (Juan 17:​3, 17) Matikdi, hinunoa, nga ang pagbaton sa maong kamatuoran dili modangat nga walay bugti. Ang usa kinahanglang andam sa ‘pagpalit’ niana, nga mao, pagsakripisyo o pagtugyan ug butang aron maangkon kana. (Itandi ang Mateo 13:45, 46.) Sa kinatibuk-an, ang mga tawo dili andam sa pagbuhat sa ingon. Apan sa daghang kayutaan, ang nagtubong gidaghanon sa maisogong mga indibiduwal namalit sa kamatuoran sa Bibliya​—sagad nga sa dakong personal nga bili.

Tagda, pananglitan, ang mga Saksi ni Jehova sa Kasadpang Aprikanhong nasod sa Ghana. Sa pagka-Hunyo 1989, dihay kapin sa 34,000 ka indibiduwal nianang yutaa nga misagop sa kamatuoran sa Bibliya ug aktibong nagpakigbahin niana ngadto sa uban. Dayon gipahamtang ang legal nga mga pagdili sa publikong buluhaton sa pagsangyaw. Bisan pa niana, ang matinud-anog-kasingkasing nga mga tawo nagpadayon sa ‘pagpalit sa kamatuoran’​—luyo sa legal nga mga kababagan. Ang mga pagdili natapos niadtong Oktubre 31, 1991, ug sa tungatunga sa 1995, mga tulo ka tuig ug tunga lamang human ang pagtangtang sa mga pagdili, ang gidaghanon sa aktibong mga Saksi ni Jehova sa Ghana miuswag ngadto sa 46,104! Ug niining tuiga ang gidaghanon mitubo ngadto sa kapin sa 52,800.

Unsay nagbutad sa mga tawo ngadto sa kamatuoran sa Pulong sa Diyos? Unsang mga pagsakripisyo ang gihimo sa pipila aron sa ‘pagpalit sa kamatuoran’? Sa pagtubag, atong susihon ang mga kasinatian sa tulo ka Kristohanon nga taga-Ghana.

Nadani sa mga Pagtulon-an sa Bibliya

Tagdon nato pag-una ang usa ka babaye nga nag-edad ug kapin sa 20. Ang iyang amahan maoy usa ka pastor, apan iyang gipili nga mobiya sa relihiyon sa iyang amahan. Ang rason? Ang iyang gugma sa kamatuoran.

Kanhi siya misaysay: “Ang mga Saksi kanunayng moanha sa among balay samtang ilang himoon ang ilang balay-balay nga mga pagduaw. Human ang pipila ka panaghisgot uban kanila, akong nasuta nga ang ilang ginatudlo lig-ong gipasukad sa Bibliya. Ako nangutana bahin sa mga ulohan sama sa Trinidad, impiyernong kalayo, pagkadili-mamatay sa kalag, ug ilabina sa pagtambal pinaagi sa pagtuo. Hugot ang akong pagtuo nga kining mga doktrinaha naggikan sa Bibliya. Apan ang mga Saksi nagtabang kanako sa pagkasabot nga dili ingon niana ang kahimtang.”​—Isip pagpaila sa panglantaw sa Bibliya sa maong mga ulohan, palihog tan-awa ang Marcos 13:​32; Roma 6:​23; Buhat 10:40; ug 1 Corinto 13:​8-​10.

Ang batan-ong babaye midugang: “Sa gihapon, dihay grabeng pagsupak gikan sa akong pamilya, ilabina sa akong amahan. Mibati siya nga ako gipahisalaag. Apan, ako nasayod nga ang akong nakat-onan gikan sa mga Saksi ni Jehova mao ang kamatuoran. Gisulayan ko ang pagpasinati sa akong amahan niining mga butanga gikan sa Bibliya, apan dili siya maminaw. Sa pagkatinuod, ang pagsupak misamot pa.

“Hinuon, wala ako matarog. Ako nasayod nga ang tinuod nga kahibalo lamang ang motultol ngadto sa kinabuhing dayon sa Paraiso, ug ako determinado sa pagpabilin diha niana. Sa dihang ang lokal nga mga Saksi nakadungog sa mga suliran nga akong naatubang, sila mahigugmaong mitabang kanako, nagdasig kanako ug naghatag kanako sa pipila ka hinungdanong mga panginahanglan. Kini nagtabang kanako sa pagsabot sa mga pulong ni Jesus nga makaplagan sa Juan 13:35: ‘Pinaagi niini ang tanan makaila nga kamo akong mga tinun-an, kon kamo adunay gugma taliwala kaninyo.’ Ang akong kombiksiyon nga ang mga Saksi ni Jehova nagatuman sa tinuod nga relihiyon napalalom pa. Sa ulahi, sa dihang namatikdan sa akong mga ginikanan nga akong gibag-o ang akong kinabuhi sa ikaayo, nakaangay sila sa ilang nakita, ug ang ilang tinamdan ngari kanako nabag-o​—mao nga ang akong amahan mihangyo sa mga Saksi nga tun-an sa Bibliya ang akong magulang nga lalaki!”

Pagpamatuod sa Kamatuoran Diha sa Kaugalingon Mismo

Ang ‘pagpalit sa kamatuoran’ usa usab ka hagit alang sa pipila ka batan-on nga gimatuto sa mga ginikanang Saksi. Ang pipila ka batan-on nakiling sa pagbalewala sa kamatuoran sa Bibliya. Kon sila mapakyas sa paghimo sa maong mga kamatuoran nga ilang kaugalingon, ang ilang pagtuo mahimong huyang, taphaw. (Itandi ang Mateo 13:​20, 21.) Si Nathaniel, usa ka lalaking taga-Ghana nga anaa sa mga pangedarong 30, misugid kon sa unsang paagi iyang ‘gipalit ang kamatuoran’ niadtong batabata pa siya.

“Ang akong mga ginikanan nagtudlo kanako sa Bibliya gikan sa panahon nga ako masuso pa,” siya nahinumdom. “Samtang ako nagdako, mikuyog ako kanila diha sa pagsangyaw nga buluhaton, apan wala gayod ako makahukom nga mahimong usa ka Saksi. Sa ngadtongadto, akong nasabtan nga kinahanglang susihon ko kini sa akong kaugalingon.

“Una, kinahanglang makombinsir ako nga ang Bibliya, dili ang bisan unsang sagradong libro sa relihiyon, mao ang Pulong sa Diyos. Pinaagi sa personal nga pagtuon, akong nakat-onan nga kini mao lamang ang sagradong libro nga naundan sa daghang tin-aw nga mga tagna nga natuman sa tukmang paagi. Akong nakat-onan usab nga ang Bibliya naundan sa daghang siyentipikanhong mga kamatuoran​—pananglitan, nga ang yuta ‘nagbitay sa wala.’ (Job 26:7) Kining mga pulonga gisulat linibo ka tuig una pa ang mga siyentipiko masayod bahin sa atong solar system. Ang Diyos lamang ang makainspirar sa mga tawo sa pagsulat sa maong mga butang!a

“Sunod, buot nakong susihon kon unsang relihiyosong organisasyon ang nagatudlo ug nagatuman sa mga kamatuoran nga gitudlo diha sa Bibliya. Kadaghanang relihiyon nagtudlo ug impiyernong kalayo, Trinidad, ug usa ka dili mamatay nga kalag nga magpabiling-buhi human sa kamatayon. Apan kining mga doktrinaha wala nako masabti. Ako nangatarongan: Dili ba usa ka daotang amahan ang magtuslob sa kamot sa iyang anak diha sa nagbukal nga tubig sa kulon ingong silot? Nan, sa unsang paagi nga ang usa ka Diyos sa gugma magbutang sa iyang mga anak diha sa nagkalayong impiyerno ug pasagdan silang mag-antos? Ang mga Saksi ni Jehova, hinunoa, nagtudlo uyon sa mga teksto sa Bibliya sama sa Roma 6:​23, nga nag-ingon: ‘Ang suhol nga ginabayad sa sala maoy kamatayon’​—dili nagkalayong impiyerno. Kini nasabtan nako.

“Akong namatikdan usab nga ang mga Saksi ni Jehova nanginahanglan nga ang tanang membro magkinabuhi sumala sa mga sukdanan sa Bibliya ug nga ilang ipalagpot ang tanang di-mahinulsolon nga nagabatasan sa sala. Gumikan niining tanan, ako nakahinapos nga anaa sa mga Saksi ni Jehova ang kamatuoran, ug akong gihimo ang personal nga desisyon nga mahimong usa kanila. Ako naningkamot nga mahimong takos alang sa bawtismo ingong usa ka Saksi.”​—1 Corinto 5:​11-​13.

Ang kasinatian ni Nathaniel tin-awng nag-ilustrar nga bisan ang mga batan-ong gimatuto sa Kristohanong mga ginikanan kinahanglang ‘mopalit sa kamatuoran.’ Dili angay nga basta motambong lamang sila sa mga tigom sa kongregasyon. Sama sa karaang mga taga-Berea, sila kinahanglang ‘sa adlaw-adlaw maampingong magausisa sa mga Kasulatan kon tinuod ba kining mga butanga.’ (Buhat 17:11) Nanginahanglan kinig panahon ug paningkamot, apan motultol kini sa lig-ong pagtuo ug kombiksiyon.​—Itandi ang Efeso 3:​17-​19.

Nahigawad sa Bakak nga Relihiyon

Usa ka tawong taga-Ghana nga ginganlag Godwin halos 70 anyos na sa dihang siya mibiya sa Presbyterianong Iglesya ug sa Masonic Lodge. “Dihay mga butang nga nagakahitabo sa sulod sa iglesya nga akong gikasupakan,” matod pa ni Godwin. “Pananglitan, dihay daghang panag-away tali sa mga membro, ug kini nagapadayon pa gihapon. Usahay ang mga polis kinahanglang moabot aron ipasig-uli ang kalinaw ug kahusay! Sa akong hunahuna dili kini angay alang sa mga sumusunod ni Kristo. Dayon may sulirang naugmad tali sa usa ka kaubang Presbyteriano ug kanako. Gihusay sa publikong korte ang kaso ug gihukmang sad-an ang kaatbang nga tawo. Bisan pa niana, ang ministro sa iglesya sa kamapihigon midapig niining tawhana ug misulay sa pagpanghimaraot kanako atubangan sa tibuok kongregasyon! Ako siyang giprangkahan bahin niini ug migawas ako sa simbahan​—nga wala na gayod mobalik.

“Milabay ang pipila ka panahon, ug ang mga Saksi ni Jehova miduaw sa akong balay. Sa sinugdan, ako naminaw tungod lamang kay dili ko buot nga isalikway ang mga tawo nga naghisgot bahin sa Diyos. Apan misugod ako sa pagmatikod nga bisan tuod ako nahimong Presbyteriano sulod sa mga dekada, dihay daghan nga wala ko hisayri bahin sa Bibliya. Pananglitan, sukad wala ako masayod nga ang Bibliya nagtanyag ug paglaom nga mabuhi sa walay kataposan sa Paraiso sa yuta.b Ug sa dihang misugod ako sa pagtambong sa mga tigom sa mga Saksi ni Jehova, ang pamatasan, ug ilabina ang panapot ug pamostura sa mga batan-on sa ilang taliwala, nakadani kanako pag-ayo. Mao kini ang mga tawo nga tinuod gayong nagkinabuhi sumala sa mga prinsipyo sa Bibliya!”

Sa gihapon, ang ‘pagpalit sa kamatuoran’ nanginahanglan nga siya manlimbasog sa paghimog mga pagpasibo sa iyang kinabuhi. Matod pa ni Godwin: “Membro ako kanhi sa usa ka Masonic Lodge. Ug bisan tuod kini nailhan ingong usa ka sosyedad sa mga managsoon nga nagatabang sa mga membro niini, akong namatikdan ang mga rituwal nga naglakip sa paggamit ug mga bagolbagol ug mga bukog ug sa pagsangpit sa mga espiritu. Kining mga espirituha gikaingong motabang niadtong makiglambigit kanila aron maugmad ang espirituwalidad.

“Ang akong mga pagtuon nagtabang kanako sa pagkasabot nga si Jehova nga Diyos masilag sa bisan unsang kalangkitan sa espiritismo tungod kay kini magdala sa usa ilalom sa impluwensiya ni Satanas ug sa iyang daotang espiritung mga puwersa.c Mopadayon ba ako ingong membro sa Masonic Lodge uban sa tanang mistisismo niini, o mohunong ba ako ug pahimut-an si Jehova? Akong gipili ang ulahi. Akong gilaglag ang tanang kahimanan sa Freemason nga akong nabatonan, bisan ang sotana nga akong gigamit alang sa mga tigom sa Lodge. Akong nasinati ang kamatuoran sa saad ni Jesus sa dihang siya miingon, ‘Ang kamatuoran magpagawas kaninyo’! (Juan 8:32) Karon ako malipayong nagapaambit sa mga butang nga akong nakat-onan ngadto sa uban. Wala gayod ako magmahay.”

Libolibo sa matinud-anog-kasingkasing nga mga tawo ang naghimo usab ug dagkong mga pagsakripisyo aron sa ‘pagpalit sa kamatuoran.’ Sama sa tulo ka Kristohanon nga gihisgotan dinhi, wala sila magmahay sa mga kausabang ilang gihimo. Ang kamatuoran sa Bibliya naghatag kanila ug “usa ka maayong patukoranan alang sa umalabot, aron nga sila makagunit nga hugot sa tinuod nga kinabuhi.” (1 Timoteo 6:19) Kanang “tinuod nga kinabuhi” ug ang tanang nagauban nga mga panalangin niini mahimong maimo usab sa walay kataposan kon imong ‘paliton ang kamatuoran.’

[Mga footnote]

[Hulagway sa panid 9]

Nathaniel

[Hulagway sa panid 9]

Godwin