“Pagtubag sa Laktud nga Paagi”
SA Wali sa Bukid, si Jesus nagtumong sa “Kasugoan ug sa mga Propeta.” Ang ikatulong seksiyon sa Hebreohanong Kasulatan mao ang Kasulatan, nga nag-apil sa balaknong mga basahon, sama sa Mga Salmo ug Mga Proverbio. (Mateo 7:12; Lucas 24:44) Kini, usab, nasudlan sa kaalam sa Diyos.
Pananglitan, ang mga proverbio nagpasidaan sa mga maghuhukom sa karaang Israel: “Ang nagaingon ngadto sa usang daotan: ‘Ikaw matarong,’ ang mga katawhan magapanghimaraot kaniya, ang nasodnong mga pundok magatunglo kaniya. Apan alang niadtong nagabadlong kaniya kini maayo, ug kanila moabot ang panalangin nga maayo. Iyang halokan ang mga ngabil nga nagatubag sa laktud nga paagi.”—Proverbio 24:24-26.
Kon ang usa ka maghuhukom mopadaog sa mga pagpiit sa panghiphip ug nepotismo ug magpahayag sa usang daotan nga matarong, ang uban magtan-aw kaniya ingong dili angay sa iyang katungdanan. Aw, bisan ang mga sakop sa Hentil “nasodnong mga pundok” nga nakadungog sa maong hudisyal nga kahiwian mosanong uban ang pagtamay! Sa laing bahin, kon ang usa ka maghuhukom maisogong magbadlong sa tawong daotan ug motubag sa laktud nga paagi ngadto sa butang gihisgotan, maangkon niya ang pagtahod ug gugma sa katawhan. Ang katawhan sa katibuk-an matandog sa paghinaot kaniya sa “panalangin nga maayo.” Sumala sa dugang pagpahayag niini sa proverbio: “Iyang halokan ang mga ngabil nga nagatubag sa laktud nga paagi.”
Ang maong paghalok nagpasabot sa mutuwal nga pagtahod—tali sa magtatambag ug niadtong nagapaniid sa iyang laktud nga pagbadlong. Tingali bisan ang usang ginabadlong mosanong nga paborable ug magmabination sa maghuhukom. Nagaingon ang Proverbio 28:23: “Siya nga nagabadlong sa usa ka tawo makabaton sa pag-uyon human niana kay kaniya nga nagaulog-ulog pinaagi sa iyang dila.” Busa kadtong nagaalagad nga mga ansiano sa kongregasyon karong adlawa kinahanglang maglikay nga itugot nga ang panaghigala o pamilyahanong mga relasyon magatuis sa ilang panghukom. Pinaagi sa laktud nga paghatag sa gikinahanglang tambag, ang mga ansiano makaangkon sa pagtahod sa kongregasyon.