Sama sa mga Mansanas nga Bulawan

MGA mansanas​—pagkamakapahimuot kini sa mata ug sa gana! Ang Bibliya nagagamit niining lamiang prutas diha sa makapukaw sa hunahuna nga kaamgiran sa dihang kini miingon: “Sama sa mga mansanas nga bulawan diha sa mga kinulit nga salapi ang usa ka pulong nga gisulti sa hustong panahon.” (Proverbio 25:11) Unsay gipasabot niining mga pulonga?

Ang “mga mansanas nga bulawan diha sa mga kinulit nga salapi” mahimong magpasabot ug kinulit nga obra, sama sa kinulit nga bandehang plata nga adunay prutas nga bulawan diha niana. Sanglit ang nag-unang mga bersikulo niining kapituloha naghisgot ug pagduol sa usa ka hari, kining bersikuloha mahimong magtumong sa mga regalo nga gihatag sa usa ka magmamando​—bulawang mga dayandayan nga pormag mga mansanas nga gibutang sa plata nga mga bandeha. (Proverbio 25:6, 7) Pagkamadanihon nga katahom!

Adunay samang katahom sa haom, dungganon, tukma sa panahong mga pulong, sinulat man o gisulti. Sila makapahimuot, makapadasig, ug mapuslanon sa daghang paagi. Ang dinasig sa Diyos nga mga unod sa Bibliya ilabinang sama sa matahom nga “mga mansanas nga bulawan diha sa mga kinulit nga salapi.”

Sumala sa giilustrar sa maalamong panultihon ni Haring Solomon sa Proverbio 25:11, siya “naningkamot sa pagpangita ug makapahimuot nga mga pulong ug sa pagsulat sa hustong mga pulong sa kamatuoran.” (Ecclesiastes 12:10; Proverbio 25:1) Kasiglohan sa ulahi, ang Kristohanong apostol Pablo misulat: “Ang tibuok Kasulatan dinasig sa Diyos ug mapuslanon.” (2 Timoteo 3:16) Oo, ang Bibliya naundan sa mapuslanong tambag, mga tagna, mga pulong nga gilarawan, ug mga kamatuoran nga ingon ka masilakon ug katahom nga nalabwan kaayo niini ang mga obra sa labing batid nga mga artesano. Dugang pa, ang si bisan kinsa nga nakabaton ug kaalam gikan sa Pulong sa Diyos, ang Bibliya, makakuhag hamiling kabtangan ug makabatog paglaom sa kinabuhing walay kataposan.​—Proverbio 4:7-9; Juan 17:3.