Kita Nagkinahanglan ug Tinuod nga mga Higala
SI Jenny ug Sue bibo kaayong nag-estoryahanay. Nangislap ang mga pahiyom, mihayag ang mga mata—ang tanan nilang lihok nagpakitag dakong kaikag kon unsay isulti sa usa. Bisag lahi ug kagikan, dayag nga halos managsama ang ilang mga interes ug may dakong pagtahod sa usag usa.
Sa laing dapit, si Eric ug Dennis kaubang nagtrabaho sa usa ka proyekto, usa sa daghang proyekto nga ilang gitrabaho sa daghang katuigan. Sila relaks, ug dali nga magkinataw-anay. Sa mahimong seryoso ang pag-estoryahanay, sila prangkang magbayloay ug mga hunahuna. Nagtahod sila sa usag usa. Sama kang Jenny ug Sue, si Eric ug Dennis maoy tinuod nga managhigala.
Kini nga mga asoy makalipay sa imong kasingkasing, nga makapahunahuna kanimo sa imong kaugalingong mga higala. Sa laing bahin, kini makapangandoy kanimo nga makabaton ug ingon niana mga panaghigalaay. Ikaw usab makabaton niini!
Kon Nganong Gikinahanglan Nato ang Tinuod nga mga Higala
Ang maayong mga panaghigalaay hinungdanon sa atong mental ug pisikal nga kaayohan. Apan, sa dihang mobati kitag kamingaw wala kini magpasabot nga kita adunay deperensiya. Ang ubang mga tigdukiduki nag-ingon nga ang kamingaw maoy usa ka kagutom, usa ka natural nga timaan nga kita nagkinahanglan ug panag-ubanay. Bisan hain niini, maingon gayod nga ang pagkaon magpamenos o magpawala sa gutom, ang hustong matang sa mga panaghigala magpamenos sa kamingaw o makawagtang pa niini. Dugang pa, dili imposible ang pagbatog maayong mga higala nga magpabili kanato.
Ang mga tawo gilalang nga may panginahanglag panag-ubanay. (Genesis 2:18) Ang Bibliya nag-ingon nga ang tinuod nga higala, o kauban, “natawo sa panahong may kalisod.” (Proverbio 17:17) Busa, ang tinuod nga mga higala makapangayog tabang sa usag usa kon kini gikinahanglan. Apan ang panaghigalaay nagkahulogan ug labaw pa kay sa adunay kadangpan ug tabang o kauban diha sa trabaho o sa dula. Ang maayong mga higala makatabang sa pagpalambo sa kinamaayohang mga hiyas sa usag usa. Ang Proverbio 27:17 nag-ingon: “Ang puthaw makahait ug puthaw. Busa makapahait ang usa ka tawo sa dagway sa lain.” Maingon nga magamit ang usa ka pirasong puthaw sa pagpahait sa sulab nga hinimo sa samang metal, ang usa ka higala mahimong molampos sa pagpahait sa intelektuwal ug espirituwal nga kahimtang sa lain. Kon nasubo kita sa pakyas nga mga kalaoman, ang mabination nga pagtan-aw sa usa ka higala ug ang pagdasig sa Kasulatan makapalig-on kaayo.
Sa Bibliya, ang panaghigalaay gilangkit sa gugma, pagkasuod, pagtago ug sekreto, ug panag-ubanay. Ang mga panaghigalaay mahimong maglakip sa mga silingan, mga kauban sa trabaho, ug uban pa. Isipon usab sa uban ang pipila ka paryente nga lakip sa ilang labing suod nga mga higala. Apan, alang sa daghan karon ang tinuod nga mga higala lisod pangitaon ug mahuptan. Ngano man? Mapahimuslan ba nimo ang tinuod ug matunhayong mga panaghigalaay?