Mga Pangutana Gikan sa mga Magbabasa
◼ Si Jehova ug si Jesus ba ang gipasabot diha sa Proverbio 30:4, nga nangutana: “Kinsa ba ang iyang ngalan ug ang ngalan sa iyang anak?”
Kining bersikuloha klarong nagpakita sa limitasyon sa tawo kon itandi sa Labing Hataas. Kining retorikal nga mga pangutana mahimong ibangon kang bisan kinsa nga tawo, apan kining mga pangutanaha motultol sa may hunahunang tawo ngadto sa Maglalalang.
Ang magsusulat nga si Agur nangutana: “Kinsa bay nakasaka ngadto sa langit ug nanaog? Kinsa bay nakahakgom sa hangin diha sa iyang mga kamot? Kinsa bay nakahugpong sa katubigan sulod sa iyang panapton? Kinsa bay nagapahimutang sa tanang mga kinatumyan sa yuta? Kinsa ba ang iyang ngalan ug ang ngalan sa iyang anak, kon ikaw nahibalo?”—Proverbio 30:1, 4.
Walay dili-hingpit nga tawo ang nakasaka sa langit ug mibalik nga nasayod sa tanan, ni may katakos ang tawo sa pagkontrolar sa hangin, sa kadagatan, o sa geolohikal nga mga gahom nga nagaporma sa yuta. Busa, si Agur nangutana: ‘Nahibalo ka ba sa ngalan o sa kagikan sa pamilya sa kang bisan kinsa nga nakahimo niining mga butanga?’ Wala ang atong tubag.—Itandi sa Job 38:1–42:3; Isaias 40:12-14; Jeremias 23:18; 1 Corinto 2:16.
Busa, motan-aw kita sa gawas sa tawhanong kalibotan sa pagpangitag usa nga adunay labaw-tawhanong gahom nga makakontrolar sa kinaiyanhong mga puwersa. Hinunoa, kita, wala limitihi sa pagkakat-on mahitungod kaniya pinaagi sa pagtan-aw sa iyang mga nahimo. (Roma 1:20) Tungod kini kay siya, sa laing pagkasulti, mikanaog nga may impormasyon mahitungod kaniya ug sa iyang mga paagi. Siya mihatag ug espisipikong impormasyon. Iyang gihimo kini, pananglitan, sa dihang ‘mikanaog’ siya sa paghatag sa Kasugoan kang Moises diha sa Bukid sa Sinai. (Exodo 19:20; Hebreohanon 2:2) Nakatabang usab siya sa iyang mga alagad sa pagsabot sa iyang makahuloganong ngalan, Jehova. (Exodo 3:13, 14; 6:3) Sa ulahi, iyang gipaila ang iyang Anak, nga ginganlag Jesus ug nga sa literal mikanaog gikan sa langit nga may dugang impormasyon mahitungod sa Maglalalang.—Juan 1:1-3, 14, 18.
Angay nga makatabang kini kanatong tanan nga makadangat ug pipila ka mga konklusyon: Sama kang Agur, kita dili makabaton ug tinuod nga kalaam gikan sa atong kaugalingong pagpaningkamot. (Proverbio 30:2, 3) Ug dili kita makangalag tawo nga may labing dakog gahom o kahibalo. Busa, mapaubsanong makatan-aw kita sa Usa nga makatagana sa kaalam nga atong gikinahanglan. Kini siya mao ang Labing Balaang Usa, nga ang ngalan atong mailhan ug sa iyang Anak nga namatay aron kita malukat ug makabaton ug kinabuhing dayon.—Mateo 20:28.