Mga Kapeligrohan sa Bahandi ug Kakabos
GISAWAY ba sa Bibliya ang bahandi ug nagadasig sa kakabos? Mao kanay gituohan sa daghang mga tawo. Apan ang duha ka nalangkit nga mga sanglitanan makatabang kanato sa pagpatin-aw niini.
Ang Proverbio 10:15 nag-ingon: “Ang bahandi sa tawong adunahan mao ang iyang malig-on nga siyudad. Ang pagkalaglag sa mga kabos mao ang ilang pagkakabos.” Dayon ang bersikulo 16 midugang: “Ang buhat sa tawong matarong nagapadulong ngadto sa kinabuhi; ang abot sa tawong daotan ngadto sa pagpakasala.” Matikdi ang pagkomplentohay niining duha sa usag usa.
Gipamatud-an sa bersikulo 15 nga adunay mga bentaha ang bahandi, ang kakabos may mga disbentaha. Ang bahandi makapanalipod sa tawo gikan sa pila ka pagkawalay-kasegurohan sa kinabuhi. Apan, ang tawong kabos, may daghang mga problema tungod kay walay salaping ikaarang sa pag-atubang sa wala dahomang mga hitabo. Realistiko ang Bibliya niining bahina.—Ecclesiastes 7:12.
Apan, ang bersikulo 15 mahimong sabton usab nga daw nagpasumbingay sa kapeligrohan nga nalangkit sa bahandi o kakabos. Daghang tawong dato bug-os nagasalig sa iyang salapi; iyang gilantaw kini nga panalipod nga iyang gikinahanglan. (Proverbio 18:11) Apan, ang bahandi dili makatabang kaniya sa pagbaton ug maayong ngalan uban sa Diyos o makapaneguro sa iyang dumalayong kalipay. Hinunoa, ang bahandi makadugang sa kalisod niana. Gipakita kini sa ilustrasyon ni Jesus bahin sa tawong dato nga nagtukod ug dagkong mga dapa apan dili bahandianon diha sa Diyos. (Lucas 12:16-21; 18:24, 25) Sa laing bahin, daghang tawong kabos masayop sa paglantaw nga tungod sa ilang kakabos wala na silay paglaom.
Matikdi kon giunsa paglatid sa bersikulo 16 kining butanga. Bisan pag daghan o diyutay ray bahandi ang tawong matarong, ang iyang trabaho makahatag kaniyag kalipay. Dili niya pasagdan nga ang ganansiyang salapi gikan sa iyang paningkamot makababag sa iyang maayong baroganan atubangan sa Diyos. Hinunoa, ang paningkamot sa tawong matarong diha sa kinabuhi mohatag kaniya, dugang pa sa kalipay karon, ug kasegurohan sa kinabuhing dayon sa umaabot. (Job 42:10-13) Apan, ang tawong daotan, dili makapahimulos bisag daghan pa siyag salapi. Imbes pabilhan ang makapanalipod nga bili sa salapi ug sa pagkinabuhi uyon sa kabubut-on sa Diyos, iyang gamiton ang iyang mga bahandi sa pagpalambo sa kinabuhi sa kasal-anan.