“Mga Gamot nga Dili-Maluka”
TALIWALA sa kinadak-an ug labing karaan nga buhing mga butang sa kalibotan mao ang mga kahoyng sequoia sa California. Kining habog nga mga kahibudnganan nagbarog nga 90 metros ang gitas-on inigkagulang na ug mabuhi sa kapin ug 3,000 ka tuig.
Bisag makapukawg kahibulong ug kahadlok ang pagtan-awg usa ka sequoia, ingon usab ka kahibulongan ang dili-makitang sistema sa gamot niini. Ang sequoia adunay nagkatag nga mga gamot nga magkobre ug luna nga ingon ka sangkad sa tulo o upat ka akre. Kining dakong sistema sa gamot nagataganag kalig-on bisan sa mga baha o kusog nga mga hangin. Makasugakod gani pagbarog ang usa ka sequoia sa usa ka kusog kaayong linog!
Si Haring Solomon mipili sa malig-ong sistema sa gamot sa usa ka kahoy ingong sumbingay sa usa sa iyang mga sanglitanan. “Walay tawo ang makabarog sa iyang kaugalingon pinaagi sa pagkadaotan,” siya miingon, “apan ang maayong mga tawo adunay mga gamot nga dili-maluka.” (Proverbio 12:3, The New English Bible) Oo, ang daotan dili makapabiling malig-ong nagabarog. Ang bisan unsang kalamposan nga daw ilang nakab-ot maoy temporaryo lamang, kay si Jehova nagasaad nga “ang paglaom mismo sa mga daotan mawagtang.”—Proverbio 10:28.
Kini maoy usa ka pasidaan alang niadtong nangangkon nga mga Kristohanon, kay si Jesus miingon nga ang uban “walay gamot” sa ilang kaugalingon ug mangapandol. (Mateo 13:21) Dugang pa, si Pablo misulat mahitungod sa mga tawo nga mahimong “ginadala ngadto ug nganhi sa matag hangin sa [bakak] nga pagtulon-an.” (Efeso 4:14) Sa unsang paagi kini mapugngan?
Maingon nga ang mga gamot sa sequoia masangkarong nagkatag diha sa tabunok nga yuta, kinahanglan natong tugotan ang atong mga hunahuna ug mga kasingkasing sa pagtugkad nga masangkaron sa Pulong sa Diyos ug magakalos gikan niini sa nagahatag-kinabuhing mga tubig. Kini makatabang kanato sa pag-ugmad ug usa ka malig-on nga pagkagamot nga pagtuo. Siyempre, atong bation ang mga epekto sa unoson nga mga pagsulay. Kita gani mangurog pa, sama sa usa ka kahoy, atubangan sa kalisdanan. Apan kon ang atong pagtuo maayong pagkagamot, kita mapamatud-an nga adunay “mga gamot nga dili-maluka.”—Itandi ang Hebreohanon 6:19.