Likayi ang Mapahitas-ong Espiritu!

Ang maalamong sanglitanan sa Bibliya nag-ingon: “Siya nga nagapataas sa iyang ganghaan nangita sa iyang kadaotan.” (Proverbio 17:19) Unsay daotan sa hataas nga ganghaan? Ug unsa ang pangunang punto niini nga sanglitanan?

SA KARAANG panahon daghan kaayo ang nagbinugtong ug nagpanon nga mga tulisan nga nagkabayo. Ang mga balay nga walay panalipod sa kapatagan dali nga masugok sa mga kawatan. Aron dili makawat ang ilang mga kabtangan, ang ubang mga tag-iyag balay nagtukod ug paril nga may linain nga ganghaan. Ang paril taas kaayo, apan ang ganghaan mubo. Gani, ang uban dili moabot ug usa ka metros ang gitas-on​—mubo kaayo nga dili kasudlan sa kabayo ug sa magkakabayo niini. Kadtong wala magpamubo sa ilang ganghaan paingon sa ilang nataran nameligro nga sugokon sa mga lalaking nagkabayo ug kawaton ang ilang mga butang.

Diha sa mga siyudad ang mga ganghaan sa nataran kasagaran mubo ug bati, nga kon tan-awon morag walay bahanding gitagoan diha sa sulod sa pinarilan nga balay. Apan, sa Persia, ang usa ka hataas nga ganghaan maoy usa sa mga timaan sa pagkaharianon, nga gisulayan pagsundog sa ubang ginsakpan nga may dakong kapeligrohan. Ang bisan kinsa nga nagpataas sa ganghaan sa iyang balay nanapit ug pangawat tungod sa iyang pagpasundayag sa pagkasapian.

Busa ang Proverbio 17:19 nagpakita nga kadtong nagpataas sa ilang ganghaan nanapit ug katalagman pinaagi sa pagpataas sa ilang kaugalingon nga labaw sa ilang tinuod nga bili. Kini nga sanglitanan nagpunting usab sa baba ingong ganghaan nga gipataas tungod sa mapangandakon ug mapagawalong sinultihan. Kini nga sinultihan mopukaw ug panagbingkil ug sa kataposan moagak sa tawong hambogiro sa kadaot. Nan, pagkamaalamong likayan gayod ang mapahitas-ong espiritu!

[Picture Credit Line sa panid 30]

Picturesque Palestine, Sinai and Egypt, Tomo I, ni Koronel Wilson (1881)