“Labaw pa sa Usa ka Lig-ong Lungsod”
“SA DAGAN karon, mga 40% sa kabataan sa T.B. ang makasaksi sa pagkabungkag sa kaminyoon sa ilang ginikanan una pa sila mag-18 anyos.” (Science, Hunyo 7, 1991) Pagkamakalilisang nga estadistika! Nganong nahitabo man kini?
Ang huwes sa hukmanan sa pamilyahanong relasyon ug sa pangtestamento nga si Edward M. Ginsburg, sa usa ka interbiyo sa The Boston Globe, mihatag sa iyang hunahuna. Siya miingon: “Kita usa ka hakog nga sosyedad. Gusto nato ‘akoa.’ Kita mangutana, ‘Aduna bay para nako diha?’ Gusto nato ang dihadiha nga katagbawan.”
Ang ingong binata nga kahakog motultol ngadto sa kaguol ug away sa kaminyoon. Si Huwes Ginsburg nag-ingon nga sa dihang ang magtiayon sa kataposan mosangko sa korte sa diborsiyo, ang bana ug asawa gustog bindikasyon. Gusto nilang may moingon nga sila ang husto ug sad-an ang ilang kapikas. Gusto nila nga may moingong: “Nakadaog ka sa bugno.”
Ang iyang mga pulong nagpahinumdom kanato sa dinasig nga proverbio: “Ang igsoon nga gidaogdaog maoy labaw pa sa usa ka lig-ong lungsod.” (Proverbio 18:19) Oo, sa dihang mahitabo ang away diha sa kaminyoon, ang matag kiliran mahimong dili makataronganon ug dili matarog. Sa subsob, sila lig-ong dili mosibog, sama sa “usa ka lig-ong lungsod” nga ginaatake.
Kinahanglan bang mahitabo kini? Dili, adunay kapailinan. Ang mga kaminyoon malig-on ug malahutayon sa dihang ang magtiayon, sa pagsugod gayod sa kaminyoon, maminaw sa mga pulong ni apostol Pablo: “Apan magmaluloton ngadto sa usag usa, magmabination uban ang kalumo, bukas nga magapasaylo sa usag usa maingon nga ang Diyos usab pinaagi kang Kristo bukas nga mipasaylo kaninyo.” (Efeso 4:32) Sayon lang ba nga ugmaron ang maong mga hiyas? Dili kanunay. Apan unsa ka dali ang diborsiyo? Unsa ka sakit ang emosyonal ug pinansiyal nga mga palas-anon diha sa nabungkag nga kaminyoon? Ug komosta na man ang mga bata, nga sagad maoy magdala sa mga ulat sa pagdiborsiyo sa ilang ginikanan hangtod pagdako?
Labing maayo nga magtinabangay ang magtiayon sa pagpreserbar sa kaminyoon ug dili mahimong masupakon sa usag usa, sama sa “usa ka lig-ong lungsod.” Ang tambag ni Pablo sa mga Kristohanon mapadapat ilabina sa mga minyo: “Isul-ob sa inyong kaugalingon ang gugma, kay kini usa ka hingpit nga bugkos sa panaghiusa.”—Colosas 3:14.
[Picture Credit Line sa panid 32]
The Complete Encyclopedia of Illustration/J. G. Heck