Pagbalanse sa Trabaho ug Lulinghayaw

ANG lulinghayaw maoy usa ka maanindot nga besti, apan dili kini angay nga kanunay isul-ob.” Niining mga pulonga ang usa ka wala magpailang magsusulat tukmang nag-ilustrar sa bili sa lulinghayaw. Hinunoa, iyang gipakita nga kini kinahanglang timbangan ug mabungahong kalihokan.

Kining butanga gitumong usab sa dinasig nga magsusulat sa Bibliya nga si Solomon. Kining maalamong hari nagpaila sa duha ka paghingapin nga pagalikayan. Una, siya miingon: “Ang hungog nagakiyugpos sa iyang mga kamot ug nagakaon sa iyang kaugalingong unod.” (Ecclesiastes 4:5) Oo, ang pagkatapolan mahimong mohatod sa usa ngadto sa kawalad-on. Ingong sangpotanan, kini makapameligro sa panglawas sa usa ka tawong tapolan, bisan sa iyang kinabuhi. Sa laing bahin, adunay pipila nga mosakripisyo sa tanang butang alang sa hagong trabaho. Si Solomon naghubit sa ilang way-hunong nga paghago ingong “kakawangan ug usa ka panlimbasog sa paggukod sa hangin.”​—Ecclesiastes 4:4.

Uban sa maayong katarongan, si Solomon misugyot ug pagkabalanse: “Mas maayo pa ang usa ka hakop nga pahulay kay sa duha ka hakop nga kahago ug panlimbasog sa paggukod sa hangin.” (Ecclesiastes 4:6) Ang tawo kinahanglang “makapahimulos ug maayo sa iyang kahago”​—nga mao, siya angayng sa matag karon ug unya maggahin ug panahon sa pagpahimulos sa iyang gihagoan. (Ecclesiastes 2:24) Ug kinahanglang adunay ubang mga butang sa kinabuhi gawas pa sa sekular nga trabaho. Ang atong pamilya angayng gahinan ug pipila sa atong panahon. Gipasiugda ni Solomon nga ang atong pangunang obligasyon mao, dili ang sekular nga trabaho, kondili ang pag-alagad sa Diyos. (Ecclesiastes 12:13) Ikaw ba lakip niadtong nagpahimulos sa usa ka balanse nga panglantaw sa trabaho?