MAGLALANGOY
Usa ka tawo nga makalangoy sa tubig ginamit ang iyang mga kamot ug mga tiil. Ang katakos sa paglangoy komon sa karaang mga tawo kaniadto. (Eze 47:5; Buh 27:42, 43) Diha sa usa ka karaang Ehiptohanong sinulat, ang usa ka amahan naghisgot nga ang iyang mga anak nagtuon sa paglangoy, ug ang Asiryanhong mga kinulit naglarawan sa mga manggugubat nga nanglangoy, nga sagad naggamit ug gipaburot nga mga panit sa hayop.
Ang mga mangingisda kinahanglang makamaong molangoy. Sa dihang mogamit ug baling, sila usahay mosalom sa tubig ug magbira pailalom sa usa ka bahin sa ngilit sa baling nga may pabug-at aron maporma ang usa ka hanig. Bisan pag maayo tingali molangoy (Ju 21:7, 8), ang mangingisda nga si Pedro misugod pagkaunlod ug misangpit kang Jesu-Kristo aron sa pagluwas kaniya sa dihang si Pedro milakaw sa ibabaw sa tubig. Lagmit nga kadto maoy tungod sa baloron kaayo nga dagat, ug usab tungod sa kahadlok ni Pedro.—Mat 14:27-31.
Sa usa ka tagna batok sa Moab, si Isaias naghisgot bahin sa mga linangoyan sa usa ka maglalangoy, nga nag-ingon: “Ang kamot ni Jehova mopahiluna niining bukira, ug ang Moab pagayatakyatakan sa dapit niini sama sa dihang yatakyatakan ang tapok sa uhot diha sa usa ka dapit sa mga kinalibang. Ug iyang ikabya [sa literal, ituyhad] ang iyang mga kamot sa taliwala niini sama sa dihang ikabya kini sa usa ka maglalangoy aron sa paglangoy, ug iyang igapaubos ang pagkamapahitas-on niini pinaagi sa malinglahong mga lihok sa iyang mga kamot.” (Isa 25:10, 11) Kini nga hubad, maingon man ang hubad sa Gregong Septuagint, nagpasabot nga gituyhad ni Jehova ang iyang mga kamot batok sa Moab aron sa pagpahamtang ug malaglagong mga hampak. Hinuon, ang laing hubad naghisgot sa Moab nga mao mismo ang nagalangoy. Pananglitan, ang American Translation nag-ingon: “Ang kamot sa GINOO mopahiluna niini nga bukid, apan ang Moab pagayatakyatakan diha sa iyang gibarogan, sama sa pagyatakyatak sa uhot diha sa tubig sa gahong sa kinalibang; ug bisan pag ikabya niya ang iyang mga kamot diha sa taliwala niini, sama sa pagkabya sa usa ka maglalangoy sa iyang mga kamot aron sa paglangoy, ang iyang garbo igapaubos bisan pa sa tanang pagkapaykapay sa iyang mga kamot.”