SAMAG-ILAGA NGA MANANAP

[Heb., chaphar·pa·rohthʹ].

Gagmayng mga mananap nga nalukop sa pino, mugbo nga mga balhibo. Ang orihinal nga pulong gituohan nga naggikan sa usa ka lintunganayng pulong nga nagkahulogang “kalot” (Gen 26:15), ug busa gituohan sa ubay-ubayng mga eskolar nga tingali nagtumong kini sa bisan unsang matang sa mga hayop nga mokubkob sa ilawom sa yuta, lakip sa mga balagtok, ilaga, ilagang tigkubkob, ilagang jerbo, ug ang susama niini. Apan, matod ni Koehler ug Baumgartner, ang chaphar·pa·rohthʹ nagtumong sa “samag-ilaga nga mananap.”​—Lexicon in Veteris Testamenti Libros, Leiden, 1958, p. 322.

Kini nga mga linalang adunay tag-as, talinis nga mga simod, gagmay nga mga mata, ug ligngin ug mga dalunggan nga medyo kunoton ug dagway. Tungod kay kusog mokaon, ang samag-ilaga nga mananap makahurot ug sobra pa kay sa ilang gibug-aton sulod sa usa ka adlaw. Ang kasagaran nilang pagkaon maoy mga insekto ug mga wati, apan sila mokaon usab ug gagmay nga mga mananap nga pareho nilag gidak-on ug mas dagko pa, sama sa mga ilaga. Ang matang sa samag-ilaga nga mananap nga gihisgotan sa Isaias 2:20 gitawag ni I. Aharoni ingong Crocidura religiosa.​—Osiris, Brugge, 1938, Tomo 5, p. 463.