1. Unsay ngalan sa Diyos, ug nganong makaseguro ta nga gusto niyang mahibaloan nato ang iyang ngalan?

Gipailaila sa Diyos ang iyang kaugalingon diha sa Bibliya. Siya miingon: “Ako si Jehova. Kana ang akong ngalan.” (Basaha ang Isaias 42:5, 8.) Ang “Jehova” maoy hubad sa Hebreohanong ngalan nga posibleng nagkahulogang “Iyang Ipahinabo nga Mahimong.” Gusto ni Jehova nga mahibalo ta sa iyang ngalan. (Exodo 3:15) Nganong makaingon ta ana? Sa Bibliya, gipasulat niya ang iyang ngalan sa kapig 7,000 ka beses!a Ang ngalang Jehova iya lang sa ‘matuod nga Diyos sa langit ug sa yuta.’—Deuteronomio 4:39.

2. Sa unsang paagi angay natong simbahon si Jehova?

Ingong atong Maglalalang, si Jehova lang ang angay natong hatagag eksklusibong debosyon. (Pinadayag 4:11) Nagpasabot ni nga angay nato siyang higugmaon ug siya lang ang atong simbahon. Dili ta angayng mogamit ug mga idolo o imahen sa pagsimba kaniya.—Basaha ang Isaias 42:8.

Ang atong pagsimba kinahanglang “balaan ug dalawaton” kang Jehova. (Roma 12:1) Nagpasabot ni nga ang atong pagkinabuhi kinahanglang subay sa iyang moral nga mga sukdanan. Pananglitan, kadtong mga nahigugma kang Jehova gustong mosunod sa iyang mga sukdanan sa kaminyoon. Ilang likayan ang makadaot nga mga buhat, sama sa pagpanigarilyo, pagdroga, sobrang pag-inom, o paghuboghubog.a