Mga Pangutana Gikan sa mga Magbabasa

◼ Sa unsang paagi si Jesus “usa ka diyos” nga gilalang ni Jehova, kay sa Isaias 43:10 si Jehova nagaingon: “Una kanako walay Diyos nga nahimo, ug sunod kanako nagpadayong wala”?

Nahibaloan pag-ayo nga ang mga Saksi ni Jehova nagatudlo gikan sa Bibliya nga si Jesus mao ang gilalang nga Anak sa Diyos ug ubos sa iyang Amahan. (Juan 14:28; 1 Corinto 11:3) Bisan pa niana, ingong gamhanang Usa nga nagaalagad nga Tigpamaba sa Diyos, o Logos, siya mahimong tawgong “usa ka diyos.” Ang ubay-ubayng bersiyon sa Bibliya nagahubad sa Juan 1:1 ingong nagaingon nga ang Logos maoy “usa ka diyos.” Pananglitan, ang Das Evangelium nach Johannes (1979) nga gisulat ni Jürgen Becker mabasa: “. . . und der Logos war bei dem Gott, und ein Gott war der Logos.” (Hubad sa Cebuano: “. . . ug ang Logos maoy uban sa Diyos, ug usa ka diyos ang Logos.”)a

Apan, sumala sa ginapaila sa nangutana kini daw mahasupak sa Isaias 43:10, 11, nga nagaingon: “‘Kamo mao ang akong mga saksi,’ nagaingon si Jehova, ‘bisan ang akong alagad nga akong napili, aron kamo makaila ug magtuo kanako, ug makasabot nga ako mao ra. Una kanako walay Diyos nga nahimo, ug sunod kanako nagapadayon nga wala. Ako​—ako mao si Jehova, ug gawas kanako walay manluluwas.’”

Ang usa ka sinserong estudyante sa Bibliya mabuligan pinaagi sa pagmatikod pag-ayo sa konteksto nianang mga pulonga. Ang Diyos nga Makagagahom sa Tanan si Jehova nagtandi sa iyang kaugalingon ngadto sa ginamag-tawong mga diyosdiyos sa kanasoran palibot sa Israel. Si Jehova nangutana: “Kang kinsa ninyo igapakasama ang Diyos, ug unsang dagwaya ang inyong iindig kaniya?” Tinong dili ang usa ka imahen nga ginama sa usa ka magsasalsal ug metal o kinulit gikan sa usa ka kahoy. (Isaias 40:18-20; 41:7) Ang maong “mga diyos” dili ‘makabuklad sa mga langit sama sa tabil,’ sama sa gibuhat ni Jehova. (Isaias 40:21-26) Dugang pa, si Jehova makatagna sa umaabot; tinong ang mga diyosdiyos sa kanasoran dili ‘makapahayag sa mga butang umaabot, aron atong hisayran nga sila mga diyos.’ (Isaias 41:23) Kining ideya gisubli sa Isaias 43:9, diin si Jehova nagaingon: “Pasagding ang nasodnong mga pundok magkatigom. Kinsa sa ilang taliwala ang makapahayag niini? O sila ba makapabati kanamo sa unang mga butang? Itagana ang ilang mga saksi.” Tukma, ang Makagagahom sa Tanan nagaingon: “Ako mao si Jehova. Kana ang akong ngalan; ug ang akong himaya dili nako igahatag sa uban, ni ang akong pagdayeg sa kinulit nga mga larawan.”​—Isaias 42:8.

Busa ang konteksto nagatino nga ang Makagagahom sa Tanan nagahagit sa gitawag mga diyos sa kanasoran. Kay mga diyosdiyos lamang nga walay balaang gahom, sila tinong dili mga diyos nga pagasimbahon; sila sa pagkamatuod walay kapuslanan. Si Jehova nagapadayon: “May usa ba ka Diyos gawas kanako? Wala, walay laing Bato. Ako walay nailhan. Ang mga mag-uumol sa kinulit nga larawan maoy kabakakan ngatanan, ug ang ilang mga pinalangga [nga hinulma gikan sa metal o kinulit gikan sa kahoy] dili magpulos.” (Isaias 44:8-17) Busa, ang konteksto sa Isaias 43:10 nagatin-aw nga si Jesus wala hisgoti; ang “mga diyos” nga gihisgotan mao ang walay-gahom nga mga diyosdiyos sa kanasoran.

Ang pulong “Diyos” o “diyos” kasagarang gamiton bahin sa usa ka labaw-tawong butang gisimba. Busa, sa mga hunahuna sa daghang tawo, ang “diyos” nagkahulogan kaha nga (1) ang Supremong Usa, ang Makagagahom sa Tanan, o (2) usa ka bakak nga diyos, sama sa usa ka idolo. Ugaling, ang Bibliya nagatugot sa laing paggamit. Kini atong masabot gikan sa Salmo 82:1, 2. Dinha ang Balaang Usa (Jehova nga Diyos) gipalahi sa tawhanong mga maghuhukom nga ginatawag sa salmista “mga diyos.” Si Jesus mismo nagtumong sa maong kasulatan. Tungod kay siya naghisgot nga si Jehova nga Diyos mao ang iyang Amahan, buot sa pila ka Hudiyo nga batohon siya. Sa ilang sumbong nga iyang ‘gihimo ang iyang kaugalingon nga usa ka diyos,’ si Jesus mitubag: “Wala ba mahisulat diha sa inyong Kasugoan, ‘Ako miingon: “Kamo mga diyos”’? Kon iyang gitawag [kadtong tawhanong mga maghuhukom] nga ‘mga diyos’ . . . kamo magaingon ba kanako si kinsa gibalaan ug gipadala sa Amahan sa kalibotan, ‘Ikaw nagapasipala,’ tungod kay ako miingon, Ako mao ang Anak sa Diyos?”​—Juan 10:31-36.

Walay duhaduhang adunay usa lamang ka Diyos nga Makagagahom sa Tanan, sumala sa gisulat ni apostol Pablo: “Kay bisan pag adunay gitawag ‘mga diyos,’ kon kaha sa langit o sa yuta, maingon nga adunay daghang ‘mga diyos’ ug daghang ‘mga ginoo,’ sa pagkamatuod alang kanato adunay usa ka Ginoo, si Jesu-Kristo, nga pinaagi kaniya ang tanang butang, ug kita pinaagi kaniya.” (1 Corinto 8:5, 6) Ang Ginoong Jesu-Kristo dili kay bakak nga diyos, dili demonyong diyos, ni idolo lamang. Siya ‘mao ang banaag sa himaya sa Diyos.’ (Hebreohanon 1:3) Busa tukma nga ang Juan 1:1 magaila nga si Jesus “usa ka diyos,” o “sama sa diyos” (Johannes Schneider).

[Mga footnote]