PANGLILOK

Kini maoy hubad sa Hebreohanong pulong nga ma·ʽatsadhʹ, nga nagtumong sa usa ka himan nga gigamit sa pagporma sa kahoy, ug bisan sa puthaw. (Jer 10:3; Isa 44:12) Ang lintunganayng pulong nga gituohang gigikanan niining Hebreohanong termino gilangkit sa mga pulong sa kaamgid nga mga pinulongan nga nagkahulogang “ani,” “putol.” Busa si Koehler ug Baumgartner naghubit sa kahulogan sa ma·ʽatsadhʹ ingong “panglilok.” (Lexicon in Veteris Testamenti Libros, Leiden, 1958, p. 550) Ang modernong panglilok adunay puloan ug sulab nga pormag kaw-it ang tumoy. Apan, gisabot sa uban nga ang ma·ʽatsadhʹ nagtumong sa usa ka matang sa atsa, sanglit mao kini ang kahulogan niini sa ulahing Hebreohanon, ug gihunahuna nila nga lagmit nagtumong kini sa usa ka aswela.