BEULAH

[Gipanag-iya Ingong Asawa].

Usa ka Hebreohanong pulong (Beʽu·lahʹ) nga gihatagag katumbas nga espeling ingong ngalan sa usa ka babaye diha sa Isaias 62:4 sa pipila ka hubad (AS; KJ; Ro), samtang sa uban kini gihubad nga “Minyo” (AT; RS), “Giminyoan” (Le), “akong pinakaslang asawa” (Mo), ug “Gipanag-iya Ingong Asawa” (NW).

Ang espirituwal nga babaye nga Zion mabiniyaan human sa paglaglag sa mga Babilonyanhon sa Jerusalem ug sa bug-os nga pagkabiniyaan sa Juda. Bisan pa niana, ang tagna sa pagpasig-uli nga gihatag ni Jehova pinaagi kang Isaias, usa ka tagna nga hinungdanon kaayo alang sa Hudiyong mga destiyero sa karaang Babilonya ug sa mga membro sa espirituwal nga Israel, nagpasalig sa kapasig-ulian ug sa pagpuyo pag-usab sa katawhan sa maong yuta, diha sa usa ka nausab nga kahimtang. Ang biniyaan kanhi nga Zion dili na “usa ka babayeng bug-os nga biniyaan,” ug ang iyang yuta dili na mahimong biniyaan, kay kini ang gisaad: “Apan ikaw tawgong Ang Akong Kahimuot Anaa Kaniya [Heb., Cheph·tsi-vahʹ], ug ang imong yuta Gipanag-iya Ingong Asawa [Heb., Beʽu·lahʹ]. Kay si Jehova magbaton ug kahimuot kanimo, ug ang imong kaugalingong yuta panag-iyahon ingong usa ka asawa.” Ang nakabalik nga “mga anak nga lalaki” sa Zion, nga nahigawas gikan sa pagkadestiyero sa Babilonya, sa makausa pa mopuyo diha kaniya, usab ‘manag-iya kaniya ingong usa ka asawa.’ Ang pagpasig-uli sa Zion, o Jerusalem, nagpasabot ug usa ka bag-ong kahimtang alang kaniya, usa ka kahimtang nga lahi sa iyang pagkabiniyaan kanhi. Tungod niini nga pagkapasig-uli, si Jehova, kinsa nahimuot sa Zion, miingon nga siya tawgong “Ang Akong Kahimuot Anaa Kaniya,” ug ang iyang yuta tawgong “Gipanag-iya Ingong Asawa.”​—Isa 62; itandi ang Isa 54:​1, 5, 6; 66:8; Jer 23:5-8; 30:17; Gal 4:26-31.