“Ingon sa mga Adlaw sa Usa ka Kahoy”

KAPIG tulo ka libo ka tuig kanhi, si Moises misulat: “Ang mga adlaw sa among katuigan maoy kapitoan ka tuig; ug kon tungod sa linaing kabaskog kini maoy kawaloan ka tuig, apan ang pagpadayon niini maoy diha sa kasamok ug sa makadaot nga mga butang.”​—Salmo 90:10.

Bisan pa sa mga kauswagan sa pagpanambal, ang lugway sa kinabuhi sa tawo maoy ingon gihapon sa adlaw ni Moises. Bisan pa niana, ang mga tawo dili sa tanang panahon modangat sa maong makadiyut nga paglungtad. Sa basahon sa Bibliya nga Isaias, ang Diyos miingon: “Ingon sa mga adlaw sa usa ka kahoy mao unya ang mga adlaw sa akong katawhan; ug ang buhat sa ilang kaugalingong mga kamot sa bug-os pagagamiton sa akong mga pinili.”​—Isaias 65:22.

Usa sa mga kahoy nga labing dugay ug kinabuhi sa kayutaan sa Bibliya mao ang kahoyng olibo. Ang kahoy nga gihulagway dinhi maoy usa sa tagsa-ka-libo ang edad nga mga kahoyng olibo nga naglambo pa sa Galilea. Kanus-a ba mabuhing ingon ka dugay ang mga tawo? Ang samang tagna nagsaysay nga kana mahitabo sa dihang ang Diyos magalalang ug “bag-ong mga langit ug usa ka bag-ong yuta.”​—Isaias 65:17.

Gitagna usab sa basahong Pinadayag ang pagkatukod sa “usa ka bag-ong langit ug usa ka bag-ong yuta”​—usa ka bag-ong langitnong kagamhanan ug usa ka bag-ong tawhanong katilingban sa dihang ang Diyos ‘magapahid sa matag luha sa ilang mga mata, ug wala na unyay kamatayon, ni pagbangotan ni pagtiyabaw ni kasakit pa.’​—Pinadayag 21:1, 4.

Sa dili madugay kining balaang saad mamatuman na. Dayon, bisan ang mga adlaw sa usa ka kahoy nga olibo daw mahisama lamang ug 24-oras nga adlaw. Ug mabatonan unya nato ang daghang panahon aron pahimuslan sa bug-os ang buhat sa atong mga kamot.