Magkaubang mga Molupyo sa Usa ka Napasig-uling “Yuta”

“Kabahin ninyo, kamo pagatawgon nga mga saserdote ni Jehova; kamo pagaingnon nga mga ministro sa among Diyos.”​—ISAIAS 61:6.

1, 2. (a) Unsa ang kahimtang sa mga kinabig sa Israel? (b) Unsang espiritu ang nabatonan sa mga membro sa “dakong panon” nga gipakita sa modernong kapanahonan?

SA KARAANG kapanahonan, sa dihang matinumanon pa ang Israel nagsilbing usa ka pamatuod sa kahimayaan ni Jehova diha sa talan-awon sa kalibotan. (Isaias 41:8, 9; 43:10) Daghang langyaw ang misanong ug nagsimba kang Jehova nga nakig-uban sa Iyang piniling katawhan. Sa pagkamatuod, ilang gisulti sa Israel kon unsay gisulti ni Ruth kang Naomi: “Ang imong katawhan mahimong akong katawhan, ug ang imong Diyos akong Diyos.” (Ruth 1:16) Miuyon sila sa mga kondisyon sa pakigtugon sa Kasugoan, nga ang mga lalaki magpasirkunsisyon. (Exodo 12:43-48) Pipila sa mga babaye naminyog mga Israelinhon. Si Rahab sa Jerico ug si Ruth nga Moabinhon nahimong katigulangan ni Jesu-Kristo. (Mateo 1:5) Ang maong mga kinabig nahimong bahin sa kongregasyon sa Israel.​—Deuteronomio 23:7, 8.

² Susama sa mga kinabig sa Israel, ang “dakong panon” karong adlawa nag-ingon ngadto sa dinihogang nahibilin: “Kami mouban kaninyo, tungod kay kami nakadungog nga ang Diyos nagauban kaninyo.” (Pinadayag 7:9; Zacarias 8:23) Giila nila nga kining dinihogang mga Kristohanon mao ang “matinumanon ug maalamong ulipon” ni Jehova, ug sila sandurot kaayong nagbuhat uban kanila nga ang mga dinihogan ug ang “ubang mga karnero” maoy “usa ka panon, usa ka magbalantay.” (Mateo 24:45-47; Juan 10:16) Unsay mahitabo sa dakong panon inigkadawat sa tanan nilang dinihogang mga igsoon sa ilang langitnong ganti? Dili kinahanglan nga mahadlok sila. Latas niining “kataposang mga adlaw,” si Jehova nangandam na alang nianang panahona.​—2 Timoteo 3:1.

Usa ka Espirituwal nga “Yuta”

3. Unsa ang “bag-ong mga langit” nga gitagna ni Pedro, ug kanus-a ba kana natukod?

³ Ang langitnong kahikayan sa pagmando nga niana ang 144,000 ka dinihogang mga Kristohanon mahimong bahin gitagna ni apostol Pedro. Siya miingon: “Adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini nila magapuyo ang pagkamatarong.” (2 Pedro 3:13) Kining “bag-ong mga langit” natukod niadtong 1914, sa dihang si Kristo naentrono ingong Hari sa langitnong Gingharian. Apan komosta ang “bag-ong yuta”?

4. (a) Unsang wala-damhang hitabo ang nahitabo sa 1919? (b) Unsa ang ‘nasod nga nahimugso dihadiha,’ ug unsa ang ‘yuta nga natawo uban sa mga kasakit sa pagpanganak’?

⁴ Niadtong 1919, gipagawas ni Jehova ang dinihogang nahibilin gikan sa pagkabihag sa Dakong Babilonya. (Pinadayag 18:4) Alang sa mga pangulo sa Kakristiyanohan, kining makapaukyab nga hitabo sa bug-os wala damha. Bahin niini, ang Bibliya nag-ingon: “Kinsay nakadungog sa usa ka butang nga sama niini? Kinsay nakakita ug mga butang nga sama niini nila? Matawo ba ang usa ka yuta uban sa mga kasakit sa pagpanganak sa usa ka adlaw? O mahimugso ba ang usa ka nasod dihadiha?” (Isaias 66:8) Sa dihang kalit nga mitungha ang dinihogang kongregasyon atubangan sa kanasoran ingong usa ka napahigawas nga katawhan, kadto sa pagkamatuod usa ka nasod nga ‘nahimugso dihadiha.’ Apan, unsa ba ang “yuta”? Sa usa ka diwa, kadto usa ka espirituwal nga katumbas sa yuta sa karaang Israel. Kadto ang dominyo sa kalihokan nga gihatag ngadto sa bag-ong-natawong “nasod,” usa ka dapit diin ang mga tagna bahin sa Paraiso sa basahong Isaias adunay moderno, espirituwal nga katumanan. (Isaias 32:16-20; 35:1-7; itandi ang Hebreohanon 12:12-14.) Bisan kon diin ang usa ka Kristohanon sa lawas, siya anaa sa maong “yuta.”

5. Unsang uyok ang milungtad niadtong 1919? Isaysay.

⁵ Unsay kalabotan niini sa “bag-ong yuta” nga gitagna ni Pedro? Aw, ang maong bag-ong “nasod,” nga natawo niadtong 1919 diha sa usa ka napasig-uling “yuta,” maugmad ngadto sa usa ka tibuok-kalibotang organisasyon nga gilangkoban sa dinihogan ug dili-dinihogang mga magdadayeg ni Jehova. Ang maong organisasyon molabang sa Armageddon ngadto sa bag-ong kalibotan sa Diyos. Niining paagiha kanang nasora maisip nga mao ang uyok sa matarong nga tawhanong katilingban, ang bag-ong yuta, nga maglungtad human sa kalaglagan sa kalibotan ni Satanas.a Sa tungatunga sa katuigang 1930, ang dinihogan, ingong usa ka grupo, natigom na nganha sa napasig-uling yuta. Sukad niadto, ang pasiugda mao ang pagtigom sa dakong panon sa ubang mga karnero, nga karong adlawa mokabat ug halos lima ka milyon. (Pinadayag 14:15, 16) Sobra ba ang mga tawo diha sa “yuta”? Dili, ang mga utlanan niini kapaluagan pa kon gikinahanglan. (Isaias 26:15) Sa pagkatinuod, makapahinam ang pagtan-aw nga ang populasyon niini nagdaghan samtang gipuno sa dinihogang nahibilin ang “yuta” sa “abot”​—makapahimsog, makapalagsik nga espirituwal nga pagkaon. (Isaias 27:6) Apan unsa ang kahimtang niining ubang mga karnero diha sa napasig-uling “yuta” sa katawhan sa Diyos?

Mga Langyaw Maoy Aktibo Diha sa “Yuta”

6. Sa unsang paagi ang mga langyaw naaktibo diha sa “yuta” sa katawhan sa Diyos?

⁶ Maingon nga ang mga kinabig sa yuta sa Israel nagpailalom sa Moisesnong Kasugoan, ang dakong panon karong adlawa diha sa napasig-uling “yuta” nagsugot sa mga sugo ni Jehova. Kay natudloan sa ilang dinihogang mga igsoon, sila naglikay sa kabug-osan sa bakak nga pagsimba ug nagsunod sa pagkabalaan sa dugo. (Buhat 15:19, 20; Galacia 5:19, 20; Colosas 3:5) Gihigugma nila si Jehova uban sa bug-os nilang kasingkasing, hunahuna, kalag, ug kusog ug gihigugma ang ilang silingan sama sa ilang kaugalingon. (Mateo 22:37; Santiago 2:8) Sa karaang Israel ang mga kinabig mitabang sa pagtukod sa templo ni Solomon ug misuportar sa pagpasig-uli sa matuod nga pagsimba. (1 Cronicas 22:2; 2 Cronicas 15:8-14; 30:25) Karong adlawa, ang dakong panon nakigbahin usab sa mga proyekto sa pagpanukod. Pananglitan, sila nagatabang sa pagpalig-on sa mga kongregasyon ug mga sirkito, nga walay paghisgot sa pagpakigbahin sa materyal nga mga proyekto sa pagpanukod, sama sa mga Kingdom Hall, mga Assembly Hall, ug mga pasilidad sa sangang buhatan.

7. Unsay nahitabo sa human-sa-pagkabihag nga Jerusalem sa dihang walay igong mga Levihanon aron buhaton ang mga pag-alagad sa templo?

⁷ Niadtong 537 W.K.P., sa dihang nahibalik ang Israel gikan sa pagkabinihag sa Babilonya, gisugdan nila pag-organisar ang pag-alagad sa dapit sa templo. Ugaling lang, ang mga Levihanon nga namalik dili kaayo daghan. Busa, ang mga Netinim​—ang nasirkunsisyonang langyawng mga molupyo nga sa nangagi maoy mga katabang sa mga Levihanon​—gihatagag mas daghang pribilehiyo sa pag-alagad sa templo. Hinuon, dili sila kapareho sa dinihogang Aaronikanhong mga saserdote.b​—Esdras 7:24; 8:15-20; Nehemias 3:22-26.

8, 9. Sa unsang paagi ang ubang mga karnero nakadawat ug mas dakong bahin sa buluhatong paghatag ug sagradong pag-alagad sulod sa kataposang mga adlaw?

⁸ Gisunod sa dinihogang mga Kristohanon karong adlawa kining paagiha. Samtang nagpadayon “ang panahon sa kataposan,” ang mga nahibilin sa mga dinihogan nagkadiyutay ug nagkadiyutay diha sa “yuta” sa katawhan sa Diyos. (Daniel 12:9; Pinadayag 12:17) Tungod niining kamatuorana, ang dakong panon karon ang naghimo sa kadaghanan sa buluhaton sa paghatag ug “sagradong pag-alagad.” (Pinadayag 7:15) Nga nagasunod sa pagpanguna sa ilang dinihogang mga igsoon, sila “nagtanyag ngadto sa Diyos sa usa ka halad sa pagdayeg, nga mao, ang bunga sa mga ngabil nga nagahimog publikong pahayag sa iyang ngalan.” Sila “wala mahikalimot sa pagbuhat sa maayo ug sa pagpakig-ambit sa mga butang sa uban,” kay nasayod nga “sa maong mga halad ang Diyos nahimuot pag-ayo.”​—Hebreohanon 13:15, 16.

⁹ Dugang pa, tungod kay ang dakong panon nagtubo sa ginatos ka libo matag tuig, adunay kanunay-nagdakong panginahanglan sa magtatan-aw. Sa usa ka panahon bug-os kining gidumala sa dinihogang mga Kristohanon. Karon, ang pagdumala sa kadaghanang kongregasyon, ingon man sa mga sirkito, mga distrito, ug mga sangang buhatan, kinahanglang isalig sa ubang mga karnero. Sa 1992 ang pipila kanila gihatagag pribilehiyo sa pagtambong sa mga tigom sa mga komite sa Nagamandong Lawas ug nag-alagad isip mga kaabag sa mga panaghisgot apan dili moapil sa paghimog mga desisyon. Bisan pa, ang ubang mga karnero nagpabiling maunongon ngadto sa ilang kaubang mga Kristohanon nga dinihogan ug mibating pribilehiyado nga paluyohan sila isip matinumanon ug maalamong ulipon ni Jehova.​—Mateo 25:34-40.

“Ingon sa Usa ka Sultan”

10, 11. Sa pagsunod sa sumbanan sa pipila ka Pilistehanon, sa unsang paagi nagbag-o ang pipila ka kanhing kaaway sa katawhan sa Diyos? Unsay sangpotanan?

¹⁰ Ang paagi sa paggamit sa matinumanon ug maalamong ulipon sa ubang mga karnero diha sa responsableng mga katungdanan gitagna sa Zacarias 9:6, 7. Dinha atong mabasa: “Pagaputlon ko gayod ang garbo sa Pilistehanon. Ug akong kuhaon ang iyang namantsahan-ug-dugong mga butang gikan sa iyang baba ug ang iyang mangil-ad nga mga butang gikan sa taliwala sa iyang mga ngipon, ug siya mismo mahimong usa ka salin alang sa atong Diyos; ug siya mahimong ingon sa usa ka sultan sa Juda, ug ang Ekron ingon sa Jebusihanon.”c Ang mga Pilistehanon maoy gisumpa nga mga kaaway sa katawhan ni Jehova, sama sa kalibotan ni Satanas karong adlawa. (1 Juan 5:19) Maingon nga ang mga Pilistehanon sa kataposan gilaglag ingong usa ka katawhan, kining kalibotana usab, uban sa relihiyoso, politikanhon, ug komersiyal nga mga elemento niini, hapit nang makaagom sa malaglagong kapungot ni Jehova.​—Pinadayag 18:21; 19:19-21.

¹¹ Hinuon, sumala sa mga pulong ni Zacarias, ang pila ka Pilistehanon nagbag-o, ug kini naglandong nga ang pila ka kalibotanon karong adlawa dili magpabiling kaaway ni Jehova. Sila mohunong sa relihiyosong idolatriya uban sa mangil-ad nga mga rituwal ug dulumtanang mga halad niini ug mahinloan sa mga mata ni Jehova. Sa atong adlaw ang maong nabag-ong “mga Pilistehanon” makaplagan diha sa dakong panon.

12. Sa modernong kapanahonan, sa unsang paagi ang “Ekron” nahimong “ingon sa Jebusihanon”?

¹² Sumala sa tagna, ang dakong Pilistehanong siyudad sa Ekron mahimong “ingon sa Jebusihanon.” Ang mga Jebusihanon usab sa nangagi maoy mga kaaway sa Israel. Ang Jerusalem diha sa ilang mga kamot hangtod nga kana nabihag ni David. Bisan pa niana, pipila niadtong nakalabang sa mga gubat batok sa Israel lagmit nahimong mga kinabig. Sila nag-alagad sa yuta sa Israel ingong mga ulipon ug nakapribilehiyo pa sa pagtukod sa templo. (2 Samuel 5:4-9; 2 Cronicas 8:1-18) Karong adlawa, ang “mga taga-Ekron” nga modangop sa pagsimba kang Jehova may mga pribilehiyo usab sa pag-alagad diha sa “yuta” ubos sa pagdumala sa matinumanon ug maalamong ulipon.

13. Unsa ang mga sultan sa karaang kalibotan?

¹³ Si Zacarias nag-ingon nga ang Pilistehanon mahimong ingon sa usa ka sultan sa Juda. Ang Hebreohanong pulong nga ’al·luphʹ, sa dihang gihubad nga “sultan,” nagkahulogang “pangulo sa usa ka libo” (o, “chiliarch”). Kadto taas kaayong katungdanan. Ang unang nasod sa Edom lagmit may 13 lamang ka sultan. (Genesis 36:15-19) Ang pulong “sultan” dili subsob gamiton dihang maghisgot bahin sa Israel, apan ang pamulong nga “pangulo (o, hepe) sa usa ka libo” kanunayng makita. Sa gipatawag ni Moises ang mga hawas sa nasod sa Israel, gipatawag niya “ang mga pangulo sa mga linibo sa Israel.”d Dihay 12 kanila, lagmit ubos lang ni Moises. (Numeros 1:4-16) Sa susama, sa organisasyon sa kasundalohan, ang mga hepe sa kaliboan maoy ikaduha lamang sa heneral o sa hari.​—2 Samuel 18:1, 2; 2 Cronicas 25:5.

14. Sa unsang paagi karong adlawa ang “Pilistehanon” nahimong ingon sa usa ka sultan?

¹⁴ Si Zacarias wala magtagna nga ang mahinulsolong Pilistehanon sa pagkamatuod mahimong usa ka sultan sa Israel. Kana dili tukma, sanglit siya dili man kinaiyanhong Israelinhon. Apan siya mahimong ingon sa usa ka sultan, nga mag-okupar sa katungdanang may awtoridad nga sama sa usa ka sultan. Ug kana nahitabo gayod. Samtang ang nahibilin sa dinihogang mga Kristohanon nagkadiyutay ug daghan niadtong buhi pa maoy limitado tungod sa edad, ang maayong-pagkabansayng ubang mga karnero motabang kon sila gikinahanglan, ingnon ta. Dili nila gustong mopuli sa ilang dinihogang mga igsoon. Apan ang matinumanon ug maalamong ulipon maghatag kanilag awtoridad sumala sa gikinahanglan diha sa “yuta” aron ang organisasyon sa Diyos makapadayon sa pag-uswag sa organisadong paagi. Ang maong mauswagong proseso masabtan sa lain pang tagna.

Mga Saserdote ug mga Mag-uuma

15. (a) Ingong katumanan sa Isaias 61:5, 6, kinsa ang “mga saserdote ni Jehova,” ug kanus-a sila mag-alagad sa maong kapasidad sa bug-os nga diwa? (b) Kinsa ang “mga estranyo” nga nag-uma sa Israel, ug​—sa espirituwal nga diwa​—unsang buluhaton ang nalangkit niini?

¹⁵ Ang Isaias 61:5, 6 mabasa: “Ang mga estranyo motindog gayod ug magbantay sa inyong mga panon, ug ang mga langyaw mahimong inyong mga mag-uuma ug inyong mga tig-atiman ug ubasan. Ug kabahin kaninyo, kamo pagatawgon nga mga saserdote ni Jehova; kamo pagaingnon nga mga ministro sa atong Diyos. Ang mga kahinguhaan sa mga nasod inyong pagakan-on, ug sa ilang himaya kamo magapahayag nga malipayon bahin sa inyong kaugalingon.” Karong adlawa, ang “mga saserdote ni Jehova” mao ang dinihogang mga Kristohanon. Sa panapos ug bug-os nga diwa, sila nag-alagad nga “mga saserdote ni Jehova . . . , mga ministro sa atong Diyos,” sa langitnong Gingharian. (Pinadayag 4:9-11) Kinsa ang “mga estranyo” nga responsable sa buluhaton sa uma? Kini sila mao ang ubang mga karnero, kinsa nagpuyo diha sa “yuta” sa Israel sa Diyos. Unsa ang buluhaton sa pagbantay, pag-uma, ug pag-atiman sa ubasan nga gisalig kanila? Sa hinungdanong espirituwal nga diwa, ang maong mga tahas may kalabotan sa pagtabang, pag-atiman, ug pag-ani sa mga tawo.​—Isaias 5:7; Mateo 9:37, 38; 1 Corinto 3:9; 1 Pedro 5:2.

16. Kinsa sa kataposan ang magbuhat sa tanang buluhaton diha sa “yuta” sa katawhan sa Diyos?

¹⁶ Sa pagkakaron, diyutay rang espirituwal nga mga Israelinhon ang nahibilin sa yuta nga nagpakig-ambit sa espirituwal nga pagbantay, pag-uma, ug pag-atiman sa ubasan. Sa dihang ang dinihogang kongregasyon sa kinatibuk-an niini sa kataposan mahiusa na kang Kristo, kining tanang buluhaton ibilin sa ubang mga karnero. Bisan ang tawhanong pagbantay sa “yuta” mahimutang na unya sa mga kamot sa may-katakos nga ubang mga karnero, kinsa diha sa basahong Ezekiel gitawag nga usa ka hepe nga matang.​—Ezekiel, mga kapitulo 45, 46.e

Ang “Yuta” Molahutay

17. Unsang mga pagpangandam ang ginahimo ni Jehova sulod niining kataposang mga adlaw?

¹⁷ Oo, ang dakong panon dili kinahanglang mahadlok! Si Jehova naghimog igong mga pagpangandam alang kanila. Usa ka labing hinungdanong hitabo sa yuta sulod niining kataposang mga adlaw mao ang pagtigom ug pagtimri sa mga dinihogan. (Pinadayag 7:3) Hinuon, samtang niining panahona ginahimo kini si Jehova nagdala sa ubang mga karnero ngadto sa pagpakig-uban kanila diha sa napasig-uling espirituwal nga yuta. Dinha gipakaon sila sa espirituwal ug gibansay sa Kristohanong pagkinabuhi. Dugang pa, sila gitudloan pag-ayo diha sa sagradong pag-alagad, lakip sa pagdumala. Tungod niini sila mapasalamaton kaayo kang Jehova ug sa ilang dinihogang mga igsoon.

18. Latas sa unsang mga hitabo nga ang ubang mga karnero magpabiling maunongon diha sa “yuta” sa espirituwal nga Israel?

¹⁸ Sa dihang himoon ni Gog sa Magog ang kataposan niyang pag-atake sa katawhan sa Diyos, ang ubang mga karnero magpabilin nga matinumanon kauban sa dinihogang nahibilin diha sa “yuta sa hawan nga kabanikanhan.” Ang ubang mga karnero anaa pa sa maong “yuta” sa dihang sila makalabang-buhi sa pagkalaglag sa kanasoran ug mosulod sa bag-ong kalibotan sa Diyos. (Ezekiel 38:11; 39:12, 13; Daniel 12:1; Pinadayag 7:9, 14) Tungod kay nagpadayong matinumanon, sila dili na gayod kinahanglang mobiya nianang maanindot nga dapit.​—Isaias 11:9.

19, 20. (a) Sa bag-ong kalibotan, unsang dakong pagdumala ang mapahimuslan sa mga molupyo sa “yuta”? (b) Unsay mahinamon kaayo natong ginalantaw?

¹⁹ Ang karaang Israel gimandoan ug tawhanong mga hari ug may Levihanong mga saserdote. Sa bag-ong kalibotan, mabatonan sa mga Kristohanon ang mas dakong pagdumala. Ubos ni Jehova nga Diyos, sila magpasakop sa dakong Hataas nga Saserdote ug Hari, si Jesu-Kristo, ug sa 144,000 ka kaubang mga saserdote ug mga hari​—nga pipila kanila ilang nailhan sa nangagi nga ilang Kristohanong mga igsoong lalaki ug mga babaye sa yuta. (Pinadayag 21:1) Ang matinumanong mga molupyo sa espirituwal nga yuta magpadayon sa pagpuyo sa yutang napasig-uli sa literal nga paraiso, nga magkalipay sa mga panalangin sa pagpang-ayo nga ipaagi sa Bag-ong Jerusalem.—Isaias 32:1; Pinadayag 21:2; 22:1, 2.

²⁰ Samtang ang dakong langitnong karo ni Jehova nag-abanteng dili mapugngan aron makab-ot ang iyang mga katuyoan, kitang tanan mahinamon kaayong naglantaw sa pagtuman sa tinudlo natong mga bahin. (Ezekiel 1:1-28) Sa dihang sa kataposan matuman na ang maong mga katuyoan, palandonga kon uban sa unsa ka dakong kalipay nga saulogon ang madaogong pagbalaan kang Jehova! Ang kusganong awit nga nahitala sa Pinadayag 5:13 awiton unya sa tanang kalalangan: “Ngadto sa Usa nga nagalingkod sa trono ug ngadto sa Kordero ang kabulahanan ug ang dungog ug ang himaya ug ang gahom hangtod sa kahangtoran”! Kon kaha ang atong dapit sa langit o sa yuta, dili ba mangandoy kitang maatua didto, nga ang atong mga tingog iduyog nianang labing matahom nga koro sa pagdayeg?

[Mga footnote]

Unsaon Nimo Pagtubag?

◻ Unsang “yuta” ang napasig-uli niadtong 1919, ug sa unsang paagi napuno kinig mga molupyo?

◻ Sa unsang paagi ang ubang mga karnero nahatagan ug mas daghang responsabilidad diha sa “yuta” sa napasig-uling katawhan sa Diyos?

◻ Sa unsang paagi ang mga membro sa dakong panon “ingon sa Jebusihanon”? “ingon sa usa ka sultan sa Juda”?

◻ Hangtod kanus-a ang matinumanong ubang mga karnero magpabilin diha sa “yuta”?

[Hulagway sa panid 23]

Ang modernong Pilistehanon mahimong “ingon sa usa ka sultan sa Juda”

[Hulagway sa panid 24]

Ang mga dinihogan ug ang ubang mga karnero magkauban sa pag-alagad diha sa espirituwal nga yuta