PATROS

Ang Patros kanunay nga gilangkit sa Ehipto (Heb., Mits·raʹyim). (Eze 30:​13, 14) Gilangkit sa kadaghanang eskolar ang ngalang Patros sa Ehiptohanong ekspresyon nga nagkahulogang “Yuta sa Habagatan” ug dayag nga nagtumong sa Ibabaw nga Ehipto. Ang Ibabaw nga Ehipto sa katibuk-an nagtumong sa rehiyon sa Walog sa Nilo nga nagsugod sa usa ka dapit nga H ug diyutay sa Mempis hangtod (sa habagatan) sa Syene (modernong Aswan) diha sa unang busay sa Nilo. Ang teksto sa Isaias 11:​11, nga nagtagna sa pagpamalik sa Israelinhong mga destiyero gikan sa ‘Ehipto (Mizraim), Patros ug Cus,’ daw nagpaluyo sa nahimutangan sa Patros sa dapit sa Ibabaw nga Ehipto, uban sa Cus (Etiopia) nga maoy utlanan niini diha sa H. Ang usa ka Asiryanhong inskripsiyon ni Haring Esar-hadon nagpakita sa samang nahimutangan, nga nagtumong sa “Ehipto (Musur), Paturisi ug Nubia [Kusu, o Cus].”​—Ancient Near Eastern Texts, giedit ni J. Pritchard, 1974, p. 290.

Ang Ezequiel 29:14 nagtawag sa Patros nga mao ang “yuta nga ilang [mga Ehiptohanon] gigikanan.” Ang tradisyonal nga Ehiptohanong panghunahuna, ingon sa giasoy ni Herodotus (II, 4, 15, 99), dayag nga nagpaluyo niini, kay gihimo niini ang Ibabaw nga Ehipto, ug ilabina ang rehiyon sa Thebes, ingong mao ang kaulohan sa unang gingharian sa Ehipto, ubos sa usa ka hari nga gitawag ni Herodotus ug Menes, usa ka ngalan nga dili makaplagan diha sa Ehiptohanong mga rekord. Si Diodorus Siculus (unang siglo W.K.P.) nagrekord sa samang panglantaw. (Diodorus of Sicily, I, 45, 1) Ang Ehiptohanong tradisyon nga gipakita niining Gregong mga historyador tingali maoy huyang nga pagbanaag sa tinuod nga kasaysayan nga gipakita sa Bibliya mahitungod kang Mizraim (kansang ngalan nagtumong sa Ehipto) ug sa iyang mga kaliwat, lakip kang Patrusim.​—Gen 10:​13, 14.

Human sa kalaglagan sa Juda pinaagi ni Nabucodonosor, usa ka nahibilin sa mga Hudiyo ang mikalagiw ngadto sa Ehipto. Lakip sa mga dapit nga gitala nga ilang gipuy-an mao ang Migdol, Tapanhes, Nop (tanang siyudad sa Ubos nga Ehipto), ug ang “yuta sa Patros.” (Jer 44:1) Dinhi sila nakigbahin sa idolatrosong pagsimba, nga miresulta sa paghukom ni Jehova kanila ug sa pasidaan sa umaabot nga pagsakop ni Nabucodonosor sa Ehipto. (Jer 44:​15, 26-30) Ang ebidensiya diha sa papiro sa ikalimang siglo W.K.P. nagpakita sa usa ka kolonya sa mga Hudiyo nga nahimutang hangtod sa habagatang tumoy sa karaang Ehipto didto sa Elephantine duol sa Syene.