Usa ka Kalibotan nga Walay Gubat sa Dili Madugay

TAN-AWA pag-usab ang tagna sa Bibliya sa Isaias nga nag-ingon: “Ang ilang mga espada himoon nilang mga punta sa daro, ug ang ilang mga bangkaw himoon nilang mga galab: ang nasod dili na mobakyaw ug espada batok sa nasod, ni makakat-on pa sila ug gubat.” Matikdi gikan sa konteksto nga kadtong naghimo sa ilang mga espada nga mga punta sa daro maoy “daghang tawo” nga naglakaw sa mga dalan sa Diyos. (Isaias 2:2-4, King James Version) Kini nagpasabot nga kining mga tawhana nagsimba kang Jehova nga Diyos ug nagtuman sa iyang mga balaod. Kinsa sila?

Sila kinahanglang mga tawo sa daghang nagkalainlaing nasod nga wala lamang magsalikway sa mga hinagiban sa gubat apan naningkamot gayod sa pagwagtang diha sa ilang mga hunahuna ug mga kasingkasing sa mga tinamdan ug mga disposisyon nga motultol sa kasungian ug panag-away. (Roma 12:2) Imbes patyon ang ilang silingan, ilang gihigugma sila. (Mateo 22:36-39) Nakadungog ka ba ug usa ka katawhan nga sama niana?

Tingali nakadungog ka nga ang mga Saksi ni Jehova nagatagamtam sa internasyonal nga panag-igsoonay ug nagadumili sa pagbatog mga hinagiban aron gamiton sa pagpatay sa uban. Hunahunaa kini: Kon ang tanan sa yuta adunay sama nianang panglantawa, dili ba kini nga planeta mahimo nang usa ka dapit sa kalinaw ug kasegurohan?

Siyempre, dili tanan adunay ingon niana nga panglantaw. Sama kini sa gisulat ni Haring Solomon mga 3,000 ka tuig kanhi: “Ako mismo mipauli aron makita ko ang tanang buhat sa pagdaogdaog nga ginahimo ilalom sa adlaw, ug, tan-awa! ang mga luha niadtong mga dinaogdaog, apan sila walay maglilipay; ug sa kiliran sa mga nagdaogdaog kanila anaa ang gahom.”​—Ecclesiastes 4:1.

Nanawag sa mga Mahigugmaon sa Kalinaw

Aduna ba gayoy usa ka kalibotan nga walay gubat? Oo. Moabot ba kini pinaagi sa mga paningkamot sa mga tawo? Dili. Moabot ba kini pinaagi sa dinaghang pagkombertir sa mga tawo sa matuod nga relihiyon? Dili. Ang basahon sa Bibliya sa mga Salmo mitubag: “Umari kamo, tan-awa ang mga buhat ni Jehova . . . Nagapahunong siya sa mga gubat hangtod sa kinatumyan sa yuta.”​—Salmo 46:8, 9.

Unsaon ni Jehova nga Diyos sa pagbuhat kana? Ang basahon sa mga Proverbio mitubag: “Ang mga matul-id magapuyo sa yuta, ug ang maputli magapabilin diha niana. Apan ang mga daotan [kadtong kinsa nagasalikway sa mga balaod sa Diyos], sila pagaputlon gikan sa yuta; ug ang mabudhion, sila pagalukahon gikan niana.”​—Proverbio 2:21, 22.

Ang pangunang katarongan kon nganong ang Diyos wala una milihok karon mao kini: Siya naghatag ug higayon sa mga tawo sa pagkakat-on bahin sa iyang mga dalan aron sila makalakaw sa iyang mga alagianan. Si apostol Pedro misulat: “Si Jehova dili hinayan labot sa iyang saad, ingon sa pagkahinayan nga giisip sa pipila ka tawo, kundili mapailobon siya kaninyo tungod kay wala siya magatinguha nga adunay malaglag apan nagatinguha nga makakab-ot ang tanan sa paghinulsol.” (2 Pedro 3:9) Busa, ang katawhan sa Diyos sa walay kahakog nagtabang sa uban nga makakat-on bahin kang Jehova. Ingon sa pagkapahayag ni Isaias niana, sila nanawag: “Umari kamo, ug manungas kita sa bukid ni Jehova, . . . ug siya magatudlo kanato bahin sa iyang mga dalan.”​—Isaias 2:3.

“Sa Kataposang Bahin sa mga Adlaw”

Ang kasulatan sa Isaias nagtagna usab nga ang pag-edukar sa mga tawo sa mga dalan sa kalinaw mahitabo “sa kataposang bahin sa mga adlaw.” (Isaias 2:2) Kita nagkinabuhi na nianang panahona karon mismo. Sa kasukwahi, ang mga gubat niining sigloha nagpaila nga kita nagkinabuhi na sa kataposang bahin sa mga adlaw.

Sa dihang ang mga tinun-an ni Jesus nangutana kaniya bahin sa ilhanan sa kataposan niining sistema sa mga butang, siya nagtagna ug “dagkong mga linog, ug sa usa ka dapit human sa lain mga kamatay ug mga kakulag pagkaon.” (Lucas 21:11; Mateo 24:3) Siya usab miingon: “‘Inigkadungog ninyo sa mga gubat ug mga kasamok, ayaw kamo kalisang. Kay kining mga butanga kinahanglang mahitabo una, apan ang kataposan dili pa mahitabo dihadiha.’ Unya siya mipadayon sa pag-ingon kanila: ‘Nasod motindog batok nasod, ug gingharian batok gingharian.’”​—Lucas 21:9, 10.

Bisag diha nay mga gubat sa kaliboan na ka tuig, kining sigloha mismo nakasaksig duha ka gubat sa kalibotan ug, sa mga pagbanabana sa uban, sa literal may nahitabong gatosan ka gagmayng mga gubat. Ang kamatuoran nga tinagpulo ka minilyong tawo ang nangamatay sa mga gubat niining sigloha makalilisang. Sumala sa magasing World Watch, sulod sa 2,000 ka tuig una pa sa ika-20ng siglo, sa aberids, nagkinahanglag 50 ka tuig aron maabot ang usa ka milyong tawo nga mamatay sa gubat. Niining sigloha, ang gidaghanon sa panahon aron maabot, sa aberids, ang usa ka milyong tawo nga mamatay sa gubat maoy usa ka tuig.

Usa ka Kalibotan nga Walay Gubat

Ang makalilisang nga mga gubat sa atong siglo, duyog sa daghang ubang mga hitabo nga gitagna sa tagna sa Bibliya, nagpakita nga kita anaa na sa ganghaan sa usa ka bag-ong kalibotan nga himoon sa Diyos. Ang kawalay-kahusay sa daang kalibotan pagawagtangon ug pagapulihan ug usa ka “bag-ong yuta,” diin mangibabaw ang kalinaw ug pagkamatarong. (2 Pedro 3:13) Ang Pulong sa Diyos nag-ingon: “Ang mga mamumuhat ug daotan pagaputlon, apan kadtong nagalaom kang Jehova mao ang magapanunod sa yuta. Apan ang mga maaghop mismo magapanunod sa yuta, ug sila makakaplag gayod sa ilang tugob nga kalipay diha sa kadagaya sa pakigdait.”​—Salmo 37:9, 11.

Sa tibuok yuta karong adlawa, ang di-maihap nga minilyon nagapangandoy ug usa ka kalibotan nga walay gubat. Sa pagpakita nga ang Diyos tinong magatuman sa iyang saad sa paglalang ug ingon nianang matanga nga kalibotan, usa ka manalagna sa Diyos misulat sa dugay na kaayong panahon: “Ang panan-awon alang pa sa tinudlong panahon, ug kini nagadali paingon sa kataposan, ug kini dili magbakak. Bisan kon kini malangan, padayon sa pagpaabot niini; kay kini moabot gayod. Kini dili magalangan.”​—Habacuc 2:3.

Busa, maalamon nga ibutang ang imong pagsalig sa Diyos ug tagamtama ang katumanan sa iyang saad: “Ang Diyos mismo mouban [sa iyang katawhan]. Ug iyang pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.”​—Pinadayag 21:3, 4.

[Kahon/Mga hulagway sa panid 9, 10]

Kon Unsa ang Ginasaad sa Bibliya Alang Nianang Bag-ong Kalibotan:

Walay Krimen, Kapintasan, o Pagkadaotan

“Nagapahunong [ang Diyos] sa mga gubat hangtod sa kinatumyan sa yuta.”​—Salmo 46:9.

“Ang mga mamumuhat ug daotan pagaputlon . . . Ug sa dili madugay, ug ang mga daotan mangawala.”​—Salmo 37:9, 10.

Ang Tanang Katawhan Anaa sa Pakigdait

“Alang kanato ang usa ka bata natawo, alang kanato ang usa ka anak nga lalaki gihatag; ug ang prinsipenhong pagmando igatungtong sa iyang abaga. Ug ang iyang ngalan pagatawgong . . . Prinsipe sa Pakigdait. Ang kadagaya sa iyang prinsipenhong pagmando ug pakigdait walay kataposan.”​—Isaias 9:6, 7.

Ang Tibuok Yuta Usa ka Paraiso

cSi Jesus miingon: “Ikaw mahiuban kanako sa Paraiso.”​—Lucas 23:43.

“Ang mga matarong magapanunod sa yuta, ug sila magapuyo sa ibabaw niini sa walay kataposan.”​—Salmo 37:29.

Usa ka Mahigugmaong Panag-igsoonay sa Tibuok-Kalibotan

“Ang Diyos dili mapihigon, apan sa matag nasod ang tawo nga magakahadlok kaniya ug magabuhat ug pagkamatarong dalawaton kaniya.”​—Buhat 10:34, 35.

Pagkabanhaw sa Nangamatayng mga Minahal

“Ang takna nagasingabot diin kadtong tanan nga anaa sa handomanang mga lubnganan makadungog sa tingog [ni Jesus] ug managpanggula.”​—Juan 5:28, 29.

Walay Sakit, Pagkatigulang, o Kamatayon

“Iyang pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.”—Pinadayag 21:4.