KIR

Ang dapit nga gigikanan sa mga Aramaeanhon sa ilang pag-adto sa Sirya, bisan tuod dili kini ang ilang orihinal nga pinuy-anan. (Am 9:7) Pinaagi sa iyang manalagna nga si Amos (1:5), gipakita ni Jehova nga ang mga Aramaeanhon mobalik sa Kir, apan ingong mga destiyero. Kining tagnaa natuman sa dihang si Tiglat-pileser III, human hiphipi sa Judeanhon nga si Haring Ahaz sa pag-ilog niini, nag-ilog sa Damasco, ang Aramaeanhong kaulohan, ug nagdestiyero sa mga molupyo niini didto sa Kir.​—2Ha 16:7-9.

Ang Isaias 22:​5, 6 naghubit sa Kir nga nangandam batok “sa walog sa panan-awon” (giisip nga naghawas sa Jerusalem). Kining tagnaa gisabot sa kadaghanan nga natuman sa panahon sa pagsulong sa Asiryanhon nga si Haring Senakerib batok sa Juda. Sanglit ang Kir gilangkit sa Elam niini nga teksto, ang pipila nag-ingon nga kini lagmit nahimutang sa dapit nga nahimutangan usab sa Elam, sa S sa Suba sa Tigris. (Itandi ang Isa 21:​2, diin ang ilado nga silingan sa Elam, ang Media, gilangkit usab sa Elam.) Ang Gregong Septuagint wala mogamit sa “Kir” diha sa bisan hain sa gisitar na nga mga teksto apan migamit sa daghang nagkalainlaing pulong ilis sa Hebreohanong pulong nga qir. Busa ang aktuwal nga lokasyon nagpabiling dili tino.