Pagtukod Alang sa Kaugmaon nga Dayon
“Ang matag balay may nagtukod, nga ang Magtutukod sa tanang butang mao ang Diyos.”—HEBREOHANON 3:4, Weymouth.
1, 2. (a) Kinsay nagdesinyo sa arka, ug unsa ka detalyado ang mga tugon nga gihatag? (b) Nganong hinungdanon nga kita mosugot, sama kang Noe?
MGA 4,400 ka tuig kanhi gisugo ni Jehova si Noe nga magtukod ug arka sa pagluwas sa kinabuhi. Apan wala himoa sa Diyos nga si Noe ray magbuot kon unsang matanga sa estruktura nga tingali makalutaw ang iyang tukoron. Hinunoa, gihatag niya ang tinong mga tugon kon bahin sa materyales, plano, gitas-on, gilapdon, gihabogon, bentilasyon, ug interyor ug gawas nga mga panapos nga trabaho. “Ug gibuhat ni Noe ang tanan sumala sa gisugo sa Diyos kaniya. Siya nagbuhat sumala gayod niana.”—Genesis 6:13-16, 22.
2 Maayo kaayong panig-ingnan alang sa modernong-adlawng mga saksi ni Jehova! Sama kang Noe, kita gisaligan sa moluwas-kinabuhing buluhaton apan niining panahona nagalaom sa kaluwasan sa ‘minilyong buhi karon nga mahimong dili na gayod mamatay.’ Hinungdanon gayod nga kita magmasinugtanon, sama kang Noe! Pagkadinalian nga atong sundon ang sumbanan sa Usa nga labaw kay kang Noe, si Jesu-Kristo, sa pag-alagad nga ‘mga magwawali sa pagkamatarong’!—2 Pedro 2:5.
Usa ka Espirituwal nga Pagtukod
3. (a) Unsay mosangpot gikan sa pagtukod diha sa mga gipamulong ni Jesus? (b) Nganong ang pagwali ni Jesus nagtukod sa pagtuo?
3 Maoy 1,956 ka tuig na karon sukad gipakuratan ni Jesus ang kabanikanhan sa Galilea sa iyang pahayag: “Paghinulsol kamo, kamo nga katawhan, kay haduol na ang gingharian sa mga langit.” Iyang gipanig-ingon ang matag usa nga nagsugot sa iyang mga pulong ug nagtukod ibabaw niana ngadto sa “usa ka tawong maalamon, nga nagtukod sa iyang balay ibabaw sa bato.” Ang pagtuo nianang tawhana malig-on, dili matarog, dili mabalhin. Kana dili matumpag kon pit-oson. Ang pagwali ni Jesus nagtukod sa pagtuo. Kadto nagtandog sa mga kasingkasing sa mga tawo, nga lahi kaayo sa balaanong mga pahayag sa Hudiyong relihiyosong mga pangulo. Ang kasagarang katawhan natingala sa paagi ni Jesus sa pagpanudlo. Bisan ang mga sundalo nga gisugo sa pagdakop kaniya namalik nga walay dala, nga mipahayag: “Walay tawo ang sukad nakasulti ug sama kaniya.”—Mateo 4:17; 7:24, 25, 28; Juan 7:46.
4. (a) Giunsa ni Jesus pagtukod alang sa umaabot? (b) Unsang dakong bahin sa pagtukod ang nahitabo sa Pentekostes 33 K.P.?
4 Si Jesus nagtukod alang sa umaabot. Gitigom niya ang isigkamagbubuhat, sama kang Pedro, kinsa gitawag usab nga Cephas, nga nagkahulogang “usa ka bato.” Si Jesus miingon ngadto nianang tinun-ana: “Ikaw mao si Pedro, ug ibabaw niining bato akong pagatukoron ang akong kongregasyon.” Sa igong panahon si Pedro nahimong usa sa daghang “buhing mga bato” nga natukod ibabaw kang Jesus, ang “batong pamag-ang” sa kongregasyon. Ang maong kongregasyon natukod sa Pentekostes 33 K.P. sa diha nga ang nabanhaw nga Jesus, nga didto sa tuong kamot sa Diyos sa langit, nagbubo sa balaang espiritu diha sa nagpaabot nga mga tinun-an.—Mateo 16:18; 1 Pedro 2:4-6; Buhat 2:2-4, 32, 33.
5. Unsang modernong-adlawng mga hitabo ang dulot naglangkit sa Kristohanong kongregasyon?
5 Karong adlawa, ang Kristohanong kongregasyon dulot nalangkit sa pagkatuman sa mga katuyoan ni Jehova. Karon ang panahon sa “apokalipsis,” o “pagbutyag,” sa diha nga “ang mga butang nga mahitabo sa dili madugay” ginapadayag ngadto sa “mga ulipon” sa Diyos sa yuta. (Pinadayag 1:1-3, Ref. Bi., potnot) Karon mao ang panahon nga ang maong mga ulipon kinahanglang ‘magwali sa maayong balita sa Gingharian sa Diyos sa tibuok yuta ingong pamatuod,’ sa dili pa niya ipahinabo ang paghukom sa daotang sistema ni Satanas. Karon mao ang panahon nga ang Hari, si Jesu-Kristo, nga karon naentrono na sa mga langit, magabahinbahin sa maaghop, samag-karnerong katawhan gikan sa gahian, samag-kanding nga katawhan nga dili gusto nianang Ginghariana, ug magatigom sa maong “mga karnero” nganha sa iyang kongregasyon sa espirituwal nga “mga igsoon” una pa mohampak ang “dakong kasakitan.”—Mateo 24:14, 21; 25:31-40.
6. Unsa ang “arka” karong adlawa, ug sa unsang paagi kita mahimong maluwas?
6 Unsa ang modernong-adlawng arka sa kaluwasan? Kini ang espirituwal nga kahimtang nga nahimutangan sa mga Saksi ni Jehova sukad 1919, usa ka espirituwal nga paraiso. Sama sa mga sakop sa banay ni Noe, ang nahibilin sa dinihogang mga Kristohanon ug ilang mga kauban kinahanglang magpabilin sulod niana, nga magabuhat nga masinugtanon, bug-os kasingkasing, sa paghuman sa dakong espirituwal nga proyekto nga gituyo ni Jehova. Kini nga proyektoha mao “ang pagtigom pag-usab sa tanang butang diha kang Kristo, ang mga butang sa mga langit [sugod sa 33 K.P. uban sa pa-langit nga mga dinihogan] ug sa mga butang sa yuta [sugod ilabina sa 1935 uban sa internasyonal nga “dakong panon” nga destinado sa kinabuhing walay kataposan sa yuta].”—Efeso 1:10; Pinadayag 7:9, 14.
‘Pagtukod ug Pagtanom’
7. Unsang duhag-pilong buluhaton ang nagapadayon karon, ug sa unsang paagi makaambit kita sa kalipay sama kang Noe ug Jeremias?
7 Gisugo ni Jehova ang nahibiling dinihogang mga Kristohanon sa yuta, sama ra sa propetang Jeremias, “nga mapahamutang ibabaw sa kanasoran ug ibabaw sa mga gingharian, sa pagluka ug sa paggun-ob ug sa paglaglag ug sa pagtumpag, sa pagtukod ug sa pagtanom.” Busa karon nagapadayon ang duhag-pilo nga buluhaton: (1) sa pagpahayag sa paghukom ni Jehova batok sa daotang sistema sa kalibotan ni Satanas, ug (2) sa pagtukod ug pag-establisar sa usa ka kapunongan sa katawhan sa Diyos alang sa kaluwasan. (Jeremias 1:10; 24:6, 7; Isaias 26:20, 21) Pagkamalipayon sa nahibilin sa mga dinihogan ug nagkadaghang panon sa ilang mga kauban samtang sila nagapakig-ambit niining buluhatona karong adlawa! Kini ang matang sa kalipay nga naagoman gayod sa makugihong si Noe ug iyang banay sa ilang adlaw.
8. (a) Unsang pag-uswag sa magmamantala latas sa miaging 22 ka tuig ang mamatikdan? (b) Sa pagtumong sa mga panid 20-23, unsa ang pila ka nasod nga nagpahimulos ug talagsaong pag-uswag sa 1985?
8 Minilyon ba ang maluwas sa adlaw sa kasuko ni Jehova? Dako ang kalaoman niana, sumala sa ginapaila sa Taho sa Pag-alagad sa Tuig 1985 sa mga Saksi ni Jehova. Ang mga detalye niining tahoa makita dinhi sa mga panid 20-23. Labing makapaukyab ang pagmatikod sa maayo kaayong pag-uswag sa kinatas-ang gidaghanon sa mga magsasangyaw sa kanataran. Kini karon miuswag ngadto sa total nga 3,024,131 ka magwawali sa Gingharian. Ang 1,000,000 nga numero unang nakab-ot sa 1963, 2,000,000 sa 1974, ug karon kapin sa 3,000,000 sa 1985. Nianang 22 ka tuig, may 200-porsientong pag-uswag. Pagkamapasalamaton nato kang Jehova si kinsa, pinaagi sa iyang espiritu, nagapatubo sa mga butang!—Zacarias 4:6; 1 Corinto 3:6.
9. (a) Nganong ang pag-uswag sa payunir labaw pang talagsaon? (b) Unsay gisugyot sa tanan nga makahatag ug luna alang niana, ug ngano?
9 Labi pang talagsaon sa maong mga tuig mao ang pag-uswag sa bug-os-panahong mga magmamantala sa Gingharian. Bisan pa sa nagkalisod nga pangabuhi sa tibuok kalibotan, ang gidaghanon niining maisogong pundok sa “mga payunir” misulbong gikan sa binulan nga aberids nga 38,573 sa 1963 ngadto sa 322,821 sa 1985—usa ka 737-porsientong pag-uswag! Unsay ginapaila niini? Kini nagapakitang ang labing maayong espiritu sa pagsakripisyo-sa-kaugalingon nagalungtad sa katawhan sa Diyos, nga nahiuyon sa mga pulong ni Jesus sa Lucas 9:23. Kasagaran, gikinahanglan ang maampingon nga pagplano ug paghikaw-sa-kaugalingon aron molampos ang buluhatong pagpayunir. Apan dagko ang mga balos.—Roma 12:1, 2; Malakias 3:10.
10. (a) Ang mga magmamantala sa kongregasyon pagadayegon tungod sa unsa? (b) Unsang tulo ka bag-ong kinatas-ang mga ihap sa buluhaton ang makita dinhi, ug unsay ginapaila niini?
10 Ang minilyong magmamantala sa kongregasyon kinahanglang makigbisog usab sa mga kalisod nga ipahamtang kanila ni Satanas ug sa iyang kalibotan. Apan sila, usab, nagahatag sa Diyos sa ilang “halad sa pagdayeg.” (Hebreohanon 13:15; Roma 10:9, 10) Ang maong mga oras, bisag daghan o diyutay, nga gitaho ninyong matinumanong mga magmamantala sa kada bulan nahimong bahin sa bag-ong kinatas-ang ihap nga 590,540,205 ka oras sa pagsangyaw sa kanataran sa 1985. Kini 16.8-porsientong pag-uswag kay sa 1984! Ang bag-ong kinatas-ang mga ihap nga 224,725,918 balik-duaw ug 2,379,146 pagtuon sa Bibliya sa balay uban sa mga tawong interesado nagapailang ang mga magmamantala sa Gingharian bisan diin nagapanlimbasog nga mahimong maayong mga magtutudlo ingon man madasigong mga magwawali.—Mateo 28:19.
Pagtukod Alang sa Matuod nga Kalinaw ug Kasegurohan
11. Sa unsang paagi ang matuod nga paglaom sa kalinaw ug kasegurohan ginamantala, ug sa unsang gidak-on?
11 Sa hinapos sa 1985, giproklamar sa Hiniusang Kanasoran ang 1986 ingong Internasyonal nga Tuig sa Kalinaw. Sa dili pa dugay, daghag gipamulong ang HK mahitungod sa kalinaw ug kasegurohan. Apan ang labi pang hinungdanong proklamasyon, ang iya sa Kasulatanhong paglaom sa kalinaw ug kasegurohan, labawng mikusog sulod sa 1985 kay napahimutang sa mga Saksi ni Jehova diha sa kanataran sa kalibotan ang 38,805,561 Bibliya, libro, ug pulyeto, ingon man 300,545,609 magasin, ug nabatonan ang 1,719,930 suskrisyon alang sa Ang Bantayanang Torre ug Pagmata! Pinaagi sa basahon ug binaba, ang natukod nga Gingharian sa tinuod nga “Prinsipe sa Pakigdait” nakadawat sa kinalabwang pamatuod hangtod karon. Sa pagkamatuod, “sa kauswagan sa iyang kagamhanan ug sa pakigdait walay kataposan.”—Isaias 9:6, 7, King James Version.
12. Ang pag-uswag misangpot sa unsang dakong panginahanglan, ug sa unsang paagi ang katawhan ni Jehova nagkahiusa sa paningkamot sa pagtagana nianang panginahanglana?
12 Tungod sa dako kaayong pag-uswag sa kanataran kinahanglan ang pag-uswag sa suportadong organisasyon. Sulod sa 1985 ang gidaghanon sa mga kongregasyon sa mga Saksi ni Jehova sa tibuok kalibotan miuswag gikan sa 47,869 ngadto sa 49,716. Tungod niini gikinahanglan ang ginatos ka bag-ong tigomanan. Pagkanindot nga, diha sa daghang kayutaan, ang mga Saksi gipanalanginan sa ilang paningkamot sa pagsuportar sa galastohan sa mga Kingdom Hall! Kon diin may panginahanglan, ang mga indibiduwal ug mga kongregasyon sa kawalay-kahakog nagsuportar sa mga programa sa pagpanukod sa usag usa, mao nga nahitabo ang “panagkaangay” taliwala sa tibuok-kalibotang asosasyon.—2 Corinto 8:14, 15.
13. Sa unsang paagi ang mga indibiduwal makaamot ngadto sa mga proyekto sa pagtukod ug Kingdom Hall?
13 Sa kanasoran diin maayo ang kahimtang, ang mga sangang-buhatan sa Watch Tower Society naghatag usab ug pagpaluyo sa mga proyekto sa Kingdom Hall. Sa Tinipong Bansa ug Canada, daghang indibiduwal nagaamot ngadto sa espesyal nga Pondo alang sa Kingdom Hall, nga tungod niana posible ang mga pahulam alang sa dugang pagpanukod ug Kingdom Hall. Ang uban miamot sa ilang kusog ug mga kahanas, mao nga bisan ang daling natukod nga mga Kingdom Hall ginapatindog sulod sa usa ra ka hinapos-sa-semana. Pinaagi sa pagtrabaho nianang mga proyektoha nga “bug-os kalag ingon nga ngadto kang Jehova,” mabuhat sa iyang mga Saksi ang butang ginaisip sa mga tawo sa kalibotan nga imposible.—Colosas 3:23.
14. Sa unsang paagi natagan-an ang mga panginahanglan sa Assembly Hall?
14 Sa ubay-ubayng nasod, nahimong dakong suliran ang kakulang sa mga pasilidad nga nahiangay alang sa kaduha-sa-tuig sirkitong mga asembliya sa mga Saksi ni Jehova. Sa makausa pa, ang mga Saksi malipayong miatubang sa hagit pinaagi sa mga programa sa pagpanukod, diha sa samang espiritu nga gipadayag sa mga alagad sa Diyos sa karaang mga panahon. Pananglitan, dihang gikinahanglang mangitag materyales aron matukod ang tabernakulo, ang katigoman sa Israel sa kahiusa misugot sa sugo sa Diyos: “Gikan kaninyo himoa ang usa ka amot alang kang Jehova. Pasagding ang matag masinugtanon sa kasingkasing magadala niini ingong amot kang Jehova.” Kadtong katigomana mitagana ug labaw kay sa gikinahanglan, ug ang buluhaton nahuman dayon.—Exodo 35:5-19; 36:7.
15. (a) Unsang pag-uswag ang nahitabo sa mga sanga sa Watch Tower Society? (b) Sa unsang paagi ang buluhaton nalampos?
15 Samtang mouswag ang panginahanglan alang sa Bibliya ug gibase-sa-Bibliya nga mga basahon, daghan sa 94 ka sanga sa Watch Tower sa tibuok kalibotan ang kinahanglang magpadako sa ilang mga pasilidad. Ang imprentahan sa Brooklyn ug Watchtower Farms sa pagkakaron mao gihapon ang kinadak-an, apan 36 ka sanga sa Sosyedad karon nagaatiman sa ilang kaugalingong pag-imprenta sa magasin, ug 6 ka sanga ang nasangkapan usab sa pag-imprenta ug pagtahig mga libro. Niini kanila, ang Alemanya, Italya, ug Hapon nagagamag mga Bibliya. Ang bag-ong pabrika sa Selters, Alemanya, nagatrabaho sa bug-os nga katakos niini. Sa Ebina, Hapon, nagapadayon ang konstruksiyon sa unom-andanang dugang sa pabrika ug walo-andanang sumpay sa Balayng Bethel aron papuy-an sa laing 280 ka trabahante. Maingon nga ang katawhan ni Jehova nagsuportar sa pagtukod sa templo ni Solomon “uban ang hingpit nga kasingkasing,” mao usab karong adlawa ang katawhan sa Diyos diha sa nagkalainlaing kayutaan nagahimog “kinabubut-ong mga halad ngadto kang Jehova,” ug iyang ginadugang ang iyang panalangin aron malampos ang buluhaton.—1 Cronicas 22:14, 15; 29:7, 9, Tan-awa ang Ref. Bi., mga potnot.
16. Nganong gikinahanglan man ang maong dugang pagtukod ug pag-organisar?
16 Tinuod bang gikinahanglan kining tanang pagtukod ug pag-organisar? Gikinahanglan gayod, aron ang “matinumanon ug maalamong ulipon” magpadayon sa pagtagana sa espirituwal nga “pagkaon sa hustong panahon.” Ang maong pagkaon gikinahanglan kaayo aron mouswag ang “panimalay sa Diyos” ug alang sa tibuok-yutang pagwali sa abot ug 200 ka pinulongan. (Mateo 24:45; Efeso 2:19; 4:15, 16) Ang katawhan ni Jehova mismo nag-amot sa ilang mga kahanas sa paggama sa usa ka multilanguage electronic phototypesetting system (MEPS), nga karon gisuplay ngadto sa 26 Watch Tower nga mga sanga. Kini nakapaposible sa nagkahiusang tibuok-yuta offset nga pag-imprenta ug nakatabang sa dungang pagpahayag sa mensahe sa Gingharian diha sa daghang bahin sa yuta.—Itandi ang Isaias 52:7-9.
17. Unsang panginahanglan ang nagalungtad sa hedkuwarter sa Brooklyn, ug sa unsang paagi kini ginasulbad?
17 Mopatim-aw nga walay kataposan ang modernong-adlawng pag-uswag sa organisasyon ni Jehova. Bisan karon, ang pamilyang Bethel sa Brooklyn, New York, nga hedkuwarter sa Sosyedad miuswag sa gidak-ong napuno na ang tanang puy-anan. Kon kabubut-on man ni Jehova, tingali tukoron ang hataas nga estruktura aron masudlan ug usa ka libong dugang trabahante sa Bethel diha sa lote sa Sosyedad sa Columbia Heights. Apan kon ugaling kini dili matuman, mosalig kita sa dugang pagtultol ni Jehova niining butanga. Ang mga pag-ampo ug maunongong pagpaluyo sa tibuok-kalibotang asosasyon maylabot niining tanang pag-uswag pabilhan gayod.—Itandi ang Buhat 21:14; 2 Tesalonica 3:1.
18. Nganong dunay daghan kaayong proyekto sa pagtukod karong adlawa, bisan pag haduol na ang Armageddon?
18 ‘Apan ngano,’ tingali may mangutana, ‘nga adunay daghan kaayong proyekto sa pagpadako dihang kita haduol na kaayo sa Armageddon?’ Ang tubag mao nga ang organisasyon ni Jehova dili ‘manirado’ sa pagsingabot sa Armageddon. Kana ‘panahon sa pagsira’ alang lamang sa organisasyon ni Satanas. Ang organisasyon ni Jehova nagatukod alang sa kaugmaon nga dayon. Kon makalabang man o dili ang ginamag-tawong mga tinukod sa bagyo sa Armageddon, kita nasayod nga ang organisasyon sa Diyos molabang ingong nagapadayong organisasyon ug kini ug kadtong maunongong nagapaluyo niini gamiton ni Jehova, nga magatukod sa walay-kataposang kalinaw ug kasegurohan diha sa mahimayaong Paraiso sa yuta nga gisaad sa Diyos.—Pinadayag 7:9, 14-17; 21:1, 4, 5.
Pagtukod nga May Katuyoan
19. Unsang hagit ang makita diha sa taho sa Memoryal sa 1985?
19 Si Noe nagtukod nga may katuyoan sa unahan, ug kita kinahanglang mao usab. Ang usa ka bahin sa Taho sa Pag-alagad sa Tuig 1985 nagatagana sa dakong butang pamalandongon. Kini mao ang kahibulongan kaayong tumatambong nga 7,792,109 sa Memoryal sa kamatayon ni Jesus sa Abril 4, 1985—pag-uswag nga 375,135 kay sa total sa 1984. Kahibulongan gayod! Apan kanang numeroha naundan sa usa ka hagit. Tungod sa kinatas-ang ihap nga 3,024,131 magmamantala nga nakig-ambit sa pagsangyaw sa Gingharian, adunay mga 4,000,000 nga ubang nakig-uban kanato, labing menos sa usa ka sukod, nga kinahanglang magtukod pa alang sa umaabot pinaagi sa pagpakigbahin sa Kristohanong ministeryo. Sa unsang paagi kita makatabang kanila?
20. Unsay dinaliang panginahanglan ang anaa sa pag-atubang sa hagit, ug unsaon nato paghimo kini sa praktikal nga paagi?
20 Kadaghanan niining mga tawong interesado atong kaila. Sila tingali mga sakop sa pamilya, mga tawong atong gidumalahan sa mga pagtuon sa Bibliya, mga suskritor sa atong mga magasin, o uban pa. Ang uban tingali nainteresado sukad sa miaging Memoryal. Kita ba karon makahimog linaing paningkamot sa pag-atiman kanila, nga lig-onon sila pinaagig pagtuon sa Bibliya, aron sila makadangop sa kahikayan ni Jehova “hangtod moagi ang mga kagul-anan”? (Salmo 57:1) Ang “dakong kasakitan” mao unyay kang Jehova nga buhat sa pagbayaw, nga labi pang makahuloganon ug mahukmanon kay sa Lunop sa Adlaw ni Noe. Buot natong lig-onon kining mga interesado pinaagi sa nagahatag-kinabuhi nga mga kamatuoran, aron sila “mosangpit sa ngalan ni Jehova” ug dili mahianod. (Mateo 24:21, 22, 39; Sofonias 2:3; 3:8, 9) Atong tun-an ang Pulong sa Diyos uban kanila, nga gamiton ang tun-anang basahong Ikaw Mabuhing Walay Kataposan sa Paraiso sa Yuta o sa ubang motukod-sa-pagtuo nga basahon sa Bibliya.
21. Sa unsang paagi kita makatukod sa pagtuo sama kang Noe diha sa atong kaugalingon ug sa uban?
21 Si Jehova nga Diyos mao ang Batid nga Magtutukod ug Dakong Magtatagana sa katawhan. (Salmo 127:1; 145:16; Ecclesiastes 3:10-13) Siya mao ang nagdirihir kang Noe kon bahin sa desinyo ug pagtukod sa arka. Pinaagi sa masinugtanong kooperasyon sa Labawng Noe, si Jesu-Kristo, gihikay niya ang paglukat sa masinugtanong mga tawo gikan sa sala ug kamatayon. Pinaagi sa maong Anak iyang gitukod usab ang modernong-adlawng “arka,” ang mauswagong espirituwal nga paraiso diin ang mga lalaki ug mga babaye sa pagtuo mahimong makakaplag sa kaluwasan, uban sa kinabuhing walay kataposan sa unahan. (Mateo 20:26-28; Juan 3:16; 17:3) Hinaot atong tabangan ang daghan pang uban sa pagtukod sa pagtuo ug sa ingon mahulma ang bugkos sa panagsuod uban kang Jehova ug sa iyang Anak. Hinaot ato silang tabangan sa paghigugma sa pagkamatarong ug pagdumot sa pagkadaotan. (Hebreohanon 1:9) Sa ingon, nga may pagtuo nga sama sa kang Noe, kita makapadayon sa pagtukod nga nagkahiusa alang sa kaugmaon nga dayon.—1 Timoteo 4:15, 16.
PILA KA PANGUTANA SA PAGSUBLI—
◻ Giunsa ni Jesus pagtukod alang sa umaabot?
◻ Unsay imong nakitang talagsaon sa 1985 nga taho?
◻ Nganong gikinahanglan ang teokratikanhong mga pagpanukod?
◻ Sa unsang paagi kitang tanan makatukod nga may katuyoan?
[Kahon sa panid 24]
Usa ka kongregasyon sa usa ka nasod sa Aprika diin gidili ang buluhaton ni Jehova dunay 95 ka magmamantala, ngatanan sila nagasangyaw kada bulan. Ang ilang aberids sa ilang mga tigom maoy 130 apan 160 sa ilang mga pakigpulong publiko. Sila dunay tulo ka regular payunir ug karong bag-o walo ka auxiliary payunir. Sa unom ra ka bulan, 21 ka bag-ong magmamantala misugod sa pagsangyaw.
[Kahon/Mga Letrato sa panid 16, 17]
TIBUOK-YUTANG PAGTUKOD PINAAGI SA MGA SAKSI NI JEHOVA
Sa tibuok kalibotan, 322,821 payunir nagtaho kada bulan (24.7-porsientong pag-uswag)
Mga magmamantala sa tibuok kalibotan miuswag ngadto sa 3,024,131 (pag-uswag nga 6.4 porsiento)
Mga balik-duaw sa mga interesado nga may total nga 224,725,918 alang sa tuig (pag-uswag nga 14.8 porsiento)
Gidumalang mga pagtuon sa Bibliya sa balay maoy 2,379,146 (pag-uswag nga 16.2 porsiento)
[Mga Letrato]
Mga payunir nagalakaw alang sa balay-balay nga pagsangyaw, Brooklyn, New York
Katorseg-pinulongan nga kombensiyon, Montreal, Quebec, Canada
Pagsangyaw, Castle Comb, Wiltshire, Inglaterra
Grupo sa pagtuon sa Yap, Micronesia
Pipila ka tinukod gigamit sa pagsuportar sa tibuok-yutang espirituwal nga pagtukod.
Sa Brooklyn, ang pagpadala sa mga Bibliya ug basahon sa Bibliya gidumala gikan ning 1,000,000-tiil-kuwadradong estruktura sa 360 Furman Street
Kining maong Kingdom Hall (Downpatrick, Amihanang Irlandia) natukod sa 31 oras
Kining maong Assembly Hall sa Roma maoy usa sa kawhakawhaang ingong tigomanan sa tibuok yuta
Kining dugang sa Balayng Bethel sa Hapon karon ginatukod na
[Chart sa mga panid 20-23]
1985 TUIG SA PAG-ALAGAD NGA TAHO SA MGA SAKSI NI JEHOVA SA TIBUOK KALIBOTAN
(Tan-awa ang bound volume)
[Chart sa panid 25]
Walo ka nasod nga mitaho sa kinatas-ang ihap nga kapin sa 100,000 ka magmamantala sa 1985
U.S.A. 723,220
Brazil 177,904
Mexico 173,037
Italya 127,526
Nigeria 121,729
Alemanya 115,604
Britanya 103,522
Hapon 103,117