JEHOVA MAO ANG ATONG PAGKAMATARONG, SI

Ang ekspresyon nga gihubad gikan sa duha ka pulong nga Yehwahʹ Tsidh·qeʹnu, nga makaplagan sa Jeremias 23:6 ug 33:16.

Ang Jeremias 23:​5, 6 maoy usa ka Mesiyanikong tagna nga naghubit sa umalabot nga hari nga moturok o motungha gikan sa linya ni David aron “magpahamtang ug hustisya ug pagkamatarong diha sa yuta.” Sanglit siya magamando ingong hawas sa Diyos (sama kang David, ug sa uban, nga milingkod “sa trono ni Jehova” ingong dinihogang hari sa Diyos; 1Cr 29:23), ang tagna nag-ingon, “Mao kini ang iyang ngalan nga itawag kaniya, Si Jehova Mao ang Atong Pagkamatarong.” Walay pasukaranan sa pag-ingon, sama sa giingon sa pipila, nga kini nagkahulogan nga si Jesus nga Mesiyas ug si Jehova managsama ra, nga nahimong usa ra ka Diyos. Kini makita gikan sa kamatuoran nga ang susamang Mesiyanikong tagna diha sa Jeremias 33:14-16 nagpadapat sa samang ekspresyon ngadto sa Jerusalem, nga nag-ingon: “Ug mao kini ang itawag kaniya, Si Jehova Mao ang Atong Pagkamatarong.” Niining duha ka kahimtang ang ekspresyon nagpakita nga ang ngalan sa Diyos nga Jehova, nga gibutang diha sa iyang sinaad nga hari ug nganha usab sa iyang pinili nga kaulohan, maoy usa ka garantiya sa ilang pagkamatarong. Dugang pa, ang hustisya ug pagkamatarong nga nagagikan o gipahayag niini nga mga tinubdan maoy bunga sa bug-os nga pagkamahinalaron kang Jehova ug sa iyang kabubut-on, nga magdalag panalangin ug pagtultol ni Jehova.