JERAMEEL

[Hinaot Magpakitag Kaluoy ang Diyos; Ang Diyos Nagpakitag Kaluoy].

1. Ang panganayng anak ni Hesron nga apo ni Juda. Ang harianon ug Mesiyanikong kagikan masubay pinaagi sa igsoong lalaki ni Jerameel nga si Ram (lagmit mao usab si Arni). Gilakip ang usa ka detalyadong talaan sa kagikan alang sa mga kaliwat ni Jerameel diin ang pipila kanila namuyo sa habagatang bahin sa Juda.​—1Cr 2:​4, 5, 9-15, 25-42; 1Sa 27:10; Luc 3:33.

2. Anak nga lalaki o kaliwat sa usa ka Merarihanong Levihanon nga ginganlag Kis.​—1Cr 24:​26, 29; 23:21.

3. Usa sa tulo ka tawo nga gipadala ni Haring Jehoiakim sa iyang ikalima nga tuig aron sa pagdakop kang Jeremias ug Baruk. Apan, mipauli sila nga walay dala kay gitagoan man ni Jehova ang iyang matinumanong mga alagad.​—Jer 36:​9, 26.

Sanglit ang manununod ug gituohang panganayng anak ni Jehoiakim nga si Jehoiakin mga 12 anyos pa lang sa ikalimang tuig sa pagmando sa iyang amahan, ang ubang mga anak ni Jehoiakim lagmit gayod nga mas bata pa, bata pa kaayo aron ipadala sa usa ka misyon nga sama sa gihatag kang Jerameel. (2Ha 23:36; 24:​6, 8) Busa, ang pagtawag kang Jerameel nga “anak nga lalaki sa hari” lagmit nagkahulogan, dili nga siya anak sa hari, kondili nga siya membro sa harianong panimalay o usa ka opisyal nga may harianong kagikan.

Makapaikag ang pagkakaplag sa usa ka marka sa timbre nga giingong gikan sa ikapitong siglo W.K.P. nga mabasa: “Iya ni Jerameel nga anak sa hari.”​—Israel Exploration Journal, Jerusalem, 1978, Tomo 28, p. 53.